১৭. কোধৱগ্গো

২২১. কোধং জহে ৱিপ্পজহেয্য মানং, সংযোজনং সব্বমতিক্কমেয্য;

তং নামৰূপস্মিমসজ্জমানং, অকিঞ্চনং নানুপতন্তি দুক্খা.

২২২. যো ৱে উপ্পতিতং কোধং, ৰথং ভন্তংৱ ৱাৰযে [ধাৰযে (সী. স্যা. পী.)];

তমহং সাৰথিং ব্ৰূমি, ৰস্মিগ্গাহো ইতৰো জনো.

২২৩. অক্কোধেন জিনে কোধং, অসাধুং সাধুনা জিনে;

জিনে কদৰিযং দানেন, সচ্চেনালিকৱাদিনং.

২২৪. সচ্চং ভণে ন কুজ্ঝেয্য, দজ্জা অপ্পম্পি [দজ্জা’প্পস্মিম্পি (সী. পী.), দজ্জা অপ্পস্মি (স্যা. ক.)] যাচিতো;

এতেহি তীহি ঠানেহি, গচ্ছে দেৱান সন্তিকে.

২২৫. অহিংসকা যে মুনযো [অহিংসকাযা মুনযো (ক.)], নিচ্চং কাযেন সংৱুতা;

তে যন্তি অচ্চুতং ঠানং, যত্থ গন্ত্ৱা ন সোচৰে.

২২৬. সদা জাগৰমানানং, অহোৰত্তানুসিক্খিনং;

নিব্বানং অধিমুত্তানং, অত্থং গচ্ছন্তি আসৱা.

২২৭. পোৰাণমেতং অতুল, নেতং অজ্জতনামিৱ;

নিন্দন্তি তুণ্হিমাসীনং, নিন্দন্তি বহুভাণিনং;

মিতভাণিম্পি নিন্দন্তি, নত্থি লোকে অনিন্দিতো.

২২৮. ন চাহু ন চ ভৱিস্সতি, ন চেতৰহি ৱিজ্জতি;

একন্তং নিন্দিতো পোসো, একন্তং ৱা পসংসিতো.

২২৯. যং চে ৱিঞ্ঞূ পসংসন্তি, অনুৱিচ্চ সুৱে সুৱে;

অচ্ছিদ্দৱুত্তিং [অচ্ছিন্নৱুত্তিং (ক.)] মেধাৱিং, পঞ্ঞাসীলসমাহিতং.

২৩০. নিক্খং [নেক্খং (সী. স্যা. পী.)] জম্বোনদস্সেৱ, কো তং নিন্দিতুমৰহতি;

দেৱাপি নং পসংসন্তি, ব্ৰহ্মুনাপি পসংসিতো.

২৩১. কাযপ্পকোপং ৰক্খেয্য, কাযেন সংৱুতো সিযা;

কাযদুচ্চৰিতং হিত্ৱা, কাযেন সুচৰিতং চৰে.

২৩২. ৱচীপকোপং ৰক্খেয্য, ৱাচায সংৱুতো সিযা;

ৱচীদুচ্চৰিতং হিত্ৱা, ৱাচায সুচৰিতং চৰে.

২৩৩. মনোপকোপং ৰক্খেয্য, মনসা সংৱুতো সিযা;

মনোদুচ্চৰিতং হিত্ৱা, মনসা সুচৰিতং চৰে.

২৩৪. কাযেন সংৱুতা ধীৰা, অথো ৱাচায সংৱুতা;

মনসা সংৱুতা ধীৰা, তে ৱে সুপৰিসংৱুতা.

কোধৱগ্গো সত্তৰসমো নিট্ঠিতো.