১. যমকৱগ্গো

১. মনোপুব্বঙ্গমা ধম্মা, মনোসেট্ঠা মনোমযা;

মনসা চে পদুট্ঠেন, ভাসতি ৱা কৰোতি ৱা;

ততো নং দুক্খমন্ৱেতি, চক্কংৱ ৱহতো পদং.

২. মনোপুব্বঙ্গমা ধম্মা, মনোসেট্ঠা মনোমযা;

মনসা চে পসন্নেন, ভাসতি ৱা কৰোতি ৱা;

ততো নং সুখমন্ৱেতি, ছাযাৱ অনপাযিনী [অনুপাযিনী (ক.)].

৩. অক্কোচ্ছি মং অৱধি মং, অজিনি [অজিনী (?)] মং অহাসি মে;

যে চ তং উপনয্হন্তি, ৱেৰং তেসং ন সম্মতি.

৪. অক্কোচ্ছি মং অৱধি মং, অজিনি মং অহাসি মে;

যে চ তং নুপনয্হন্তি, ৱেৰং তেসূপসম্মতি.

৫. ন হি ৱেৰেন ৱেৰানি, সম্মন্তীধ কুদাচনং;

অৱেৰেন চ সম্মন্তি, এস ধম্মো সনন্তনো.

৬. পৰে চ ন ৱিজানন্তি, মযমেত্থ যমামসে;

যে চ তত্থ ৱিজানন্তি, ততো সম্মন্তি মেধগা.

৭. সুভানুপস্সিং ৱিহৰন্তং, ইন্দ্ৰিযেসু অসংৱুতং;

ভোজনম্হি চামত্তঞ্ঞুং, কুসীতং হীনৱীৰিযং;

তং ৱে পসহতি মাৰো, ৱাতো ৰুক্খংৱ দুব্বলং.

৮. অসুভানুপস্সিং ৱিহৰন্তং, ইন্দ্ৰিযেসু সুসংৱুতং;

ভোজনম্হি চ মত্তঞ্ঞুং, সদ্ধং আৰদ্ধৱীৰিযং;

তং ৱে নপ্পসহতি মাৰো, ৱাতো সেলংৱ পব্বতং.

৯. অনিক্কসাৱো কাসাৱং, যো ৱত্থং পৰিদহিস্সতি;

অপেতো দমসচ্চেন, ন সো কাসাৱমৰহতি.

১০. যো চ ৱন্তকসাৱস্স, সীলেসু সুসমাহিতো;

উপেতো দমসচ্চেন, স ৱে কাসাৱমৰহতি.

১১. অসাৰে সাৰমতিনো, সাৰে চাসাৰদস্সিনো;

তে সাৰং নাধিগচ্ছন্তি, মিচ্ছাসঙ্কপ্পগোচৰা.

১২. সাৰঞ্চ সাৰতো ঞত্ৱা, অসাৰঞ্চ অসাৰতো;

তে সাৰং অধিগচ্ছন্তি, সম্মাসঙ্কপ্পগোচৰা.

১৩. যথা অগাৰং দুচ্ছন্নং, ৱুট্ঠী সমতিৱিজ্ঝতি;

এৱং অভাৱিতং চিত্তং, ৰাগো সমতিৱিজ্ঝতি.

১৪. যথা অগাৰং সুছন্নং, ৱুট্ঠী ন সমতিৱিজ্ঝতি;

এৱং সুভাৱিতং চিত্তং, ৰাগো ন সমতিৱিজ্ঝতি.

১৫. ইধ সোচতি পেচ্চ সোচতি, পাপকাৰী উভযত্থ সোচতি;

সো সোচতি সো ৱিহঞ্ঞতি, দিস্ৱা কম্মকিলিট্ঠমত্তনো.

১৬. ইধ মোদতি পেচ্চ মোদতি, কতপুঞ্ঞো উভযত্থ মোদতি;

সো মোদতি সো পমোদতি, দিস্ৱা কম্মৱিসুদ্ধিমত্তনো.

১৭. ইধ তপ্পতি পেচ্চ তপ্পতি, পাপকাৰী [পাপকাৰি (?)] উভযত্থ তপ্পতি;

‘‘পাপং মে কত’’ন্তি তপ্পতি, ভিয্যো [ভীযো (সী.)] তপ্পতি দুগ্গতিং গতো.

১৮. ইধ নন্দতি পেচ্চ নন্দতি, কতপুঞ্ঞো উভযত্থ নন্দতি;

‘‘পুঞ্ঞং মে কত’’ন্তি নন্দতি, ভিয্যো নন্দতি সুগ্গতিং গতো.

১৯. বহুম্পি চে সংহিত [সহিতং (সী. স্যা. কং. পী.)] ভাসমানো, ন তক্কৰো হোতি নৰো পমত্তো;

গোপোৱ গাৱো গণযং পৰেসং, ন ভাগৱা সামঞ্ঞস্স হোতি.

২০. অপ্পম্পি চে সংহিত ভাসমানো, ধম্মস্স হোতি [হোতী (সী. পী.)] অনুধম্মচাৰী;

ৰাগঞ্চ দোসঞ্চ পহায মোহং, সম্মপ্পজানো সুৱিমুত্তচিত্তো;

অনুপাদিযানো ইধ ৱা হুৰং ৱা, স ভাগৱা সামঞ্ঞস্স হোতি.

যমকৱগ্গো পঠমো নিট্ঠিতো.