২. অপ্পমাদৱগ্গো

২১. অপ্পমাদো অমতপদং [অমতং পদং (ক.)], পমাদো মচ্চুনো পদং;

অপ্পমত্তা ন মীযন্তি, যে পমত্তা যথা মতা.

২২. এৱং [এতং (সী. স্যা. কং. পী.)] ৱিসেসতো ঞত্ৱা, অপ্পমাদম্হি পণ্ডিতা;

অপ্পমাদে পমোদন্তি, অৰিযানং গোচৰে ৰতা.

২৩. তে ঝাযিনো সাততিকা, নিচ্চং দড়্হপৰক্কমা;

ফুসন্তি ধীৰা নিব্বানং, যোগক্খেমং অনুত্তৰং.

২৪. উট্ঠানৱতো সতীমতো [সতিমতো (সী. স্যা. ক.)], সুচিকম্মস্স নিসম্মকাৰিনো;

সঞ্ঞতস্স ধম্মজীৱিনো, অপ্পমত্তস্স [অপমত্তস্স (?)] যসোভিৱড্ঢতি.

২৫. উট্ঠানেনপ্পমাদেন, সংযমেন দমেন চ;

দীপং কযিৰাথ মেধাৱী, যং ওঘো নাভিকীৰতি.

২৬. পমাদমনুযুঞ্জন্তি, বালা দুম্মেধিনো জনা;

অপ্পমাদঞ্চ মেধাৱী, ধনং সেট্ঠংৱ ৰক্খতি.

২৭. মা পমাদমনুযুঞ্জেথ, মা কামৰতিসন্থৱং [সন্ধৱং (ক)];

অপ্পমত্তো হি ঝাযন্তো, পপ্পোতি ৱিপুলং সুখং.

২৮. পমাদং অপ্পমাদেন, যদা নুদতি পণ্ডিতো;

পঞ্ঞাপাসাদমাৰুয্হ, অসোকো সোকিনিং পজং;

পব্বতট্ঠোৱ ভূমট্ঠে [ভুম্মট্ঠে (সী. স্যা.)], ধীৰো বালে অৱেক্খতি.

২৯. অপ্পমত্তো পমত্তেসু, সুত্তেসু বহুজাগৰো;

অবলস্সংৱ সীঘস্সো, হিত্ৱা যাতি সুমেধসো.

৩০. অপ্পমাদেন মঘৱা, দেৱানং সেট্ঠতং গতো;

অপ্পমাদং পসংসন্তি, পমাদো গৰহিতো সদা.

৩১. অপ্পমাদৰতো ভিক্খু, পমাদে ভযদস্সি ৱা;

সংযোজনং অণুং থূলং, ডহং অগ্গীৱ গচ্ছতি.

৩২. অপ্পমাদৰতো ভিক্খু, পমাদে ভযদস্সি ৱা;

অভব্বো পৰিহানায, নিব্বানস্সেৱ সন্তিকে.

অপ্পমাদৱগ্গো দুতিযো নিট্ঠিতো.