৭. মাতঙ্গচৰিযা

৬০. ‘‘পুনাপৰং যদা হোমি, জটিলো উগ্গতাপনো;

মাতঙ্গো নাম নামেন, সীলৱা সুসমাহিতো.

৬১. ‘‘অহঞ্চ ব্ৰাহ্মণো একো, গঙ্গাকূলে ৱসামুভো;

অহং ৱসামি উপৰি, হেট্ঠা ৱসতি ব্ৰাহ্মণো.

৬২. ‘‘ৱিচৰন্তো অনুকূলম্হি, উদ্ধং মে অস্সমদ্দস;

তত্থ মং পৰিভাসেত্ৱা, অভিসপি মুদ্ধফালনং.

৬৩. ‘‘যদিহং তস্স পকুপ্পেয্যং, যদি সীলং ন গোপযে;

ওলোকেত্ৱানহং তস্স, কৰেয্যং ছাৰিকং ৱিয.

৬৪. ‘‘যং সো তদা মং অভিসপি, কুপিতো দুট্ঠমানসো;

তস্সেৱ মত্থকে নিপতি, যোগেন তং পমোচযিং.

৬৫. ‘‘অনুৰক্খিং মম সীলং, নাৰক্খিং মম জীৱিতং;

সীলৱা হি তদা আসিং, বোধিযাযেৱ কাৰণা’’তি.

মাতঙ্গচৰিযং সত্তমং.