৯. ৱেস্সন্তৰচৰিযা

৬৭. ‘‘যা মে অহোসি জনিকা, ফুস্সতী [ফুসতী (সী.)] নাম খত্তিযা;

সা অতীতাসু জাতীসু, সক্কস্স মহেসী পিযা.

৬৮. ‘‘তস্সা আযুক্খযং ঞত্ৱা, দেৱিন্দো এতদব্ৰৱি;

‘দদামি তে দস ৱৰে, ৱৰভদ্দে যদিচ্ছসি’.

৬৯. ‘‘এৱং ৱুত্তা চ সা দেৱী, সক্কং পুনিদমব্ৰৱি;

‘কিং নু মে অপৰাধত্থি, কিং নু দেস্সা অহং তৱ;

ৰম্মা চাৱেসি মং ঠানা, ৱাতোৱ ধৰণীৰুহং’.

৭০. ‘‘এৱং ৱুত্তো চ সো সক্কো, পুন তস্সিদমব্ৰৱি;

‘ন চেৱ তে কতং পাপং, ন চ মে ত্ৱংসি অপ্পিযা.

৭১. ‘‘‘এত্তকংযেৱ তে আযু, চৱনকালো ভৱিস্সতি;

পটিগ্গণ্হ মযা দিন্নে, ৱৰে দস ৱৰুত্তমে’.

৭২. ‘‘সক্কেন সা দিন্নৱৰা, তুট্ঠহট্ঠা পমোদিতা;

মমং অব্ভন্তৰং কত্ৱা, ফুস্সতী দস ৱৰে ৱৰী.

৭৩. ‘‘ততো চুতা সা ফুস্সতী, খত্তিযে উপপজ্জথ;

জেতুত্তৰম্হি নগৰে, সঞ্জযেন সমাগমি.

৭৪. ‘‘যদাহং ফুস্সতিযা কুচ্ছিং, ওক্কন্তো পিযমাতুযা;

মম তেজেন মে মাতা, সদা দানৰতা অহু.

৭৫. ‘‘অধনে আতুৰে জিণ্ণে, যাচকে অদ্ধিকে [পথিকে (ক.)] জনে;

সমণে ব্ৰাহ্মণে খীণে, দেতি দানং অকিঞ্চনে.

৭৬. ‘‘দস মাসে ধাৰযিত্ৱান, কৰোন্তে পুৰং পদক্খিণং;

ৱেস্সানং ৱীথিযা মজ্ঝে, জনেসি ফুস্সতী মমং.

৭৭. ‘‘ন ময্হং মত্তিকং নামং, নপি পেত্তিকসম্ভৱং;

জাতেত্থ ৱেস্সৱীথিযা, তস্মা ৱেস্সন্তৰো অহু.

৭৮. ‘‘যদাহং দাৰকো হোমি, জাতিযা অট্ঠৱস্সিকো;

তদা নিসজ্জ পাসাদে, দানং দাতুং ৱিচিন্তযিং.

৭৯. ‘‘‘হদযং দদেয্যং চক্খুং, মংসম্পি ৰুধিৰম্পি চ;

দদেয্যং কাযং সাৱেত্ৱা, যদি কোচি যাচযে মমং’.

৮০. ‘‘সভাৱং চিন্তযন্তস্স, অকম্পিতমসণ্ঠিতং;

অকম্পি তত্থ পথৱী, সিনেৰুৱনৱটংসকা.

৮১. ‘‘অন্ৱদ্ধমাসে পন্নৰসে, পুণ্ণমাসে উপোসথে;

পচ্চযং নাগমাৰুয্হ, দানং দাতুং উপাগমিং.

৮২. ‘‘কলিঙ্গৰট্ঠৱিসযা, ব্ৰাহ্মণা উপগঞ্ছু মং;

অযাচুং মং হত্থিনাগং, ধঞ্ঞং মঙ্গলসম্মতং.

৮৩. ‘‘অৱুট্ঠিকো জনপদো, দুব্ভিক্খো ছাতকো মহা;

দদাহি পৱৰং নাগং, সব্বসেতং গজুত্তমং.

৮৪. ‘‘দদামি ন ৱিকম্পামি, যং মং যাচন্তি ব্ৰাহ্মণা;

সন্তং নপ্পতিগূহামি [নপ্পতিগুয্হামি (সী. ক.)], দানে মে ৰমতে মনো.

৮৫. ‘‘ন মে যাচকমনুপ্পত্তে, পটিক্খেপো অনুচ্ছৱো;

‘মা মে ভিজ্জি সমাদানং, দস্সামি ৱিপুলং গজং’.

৮৬. ‘‘নাগং গহেত্ৱা সোণ্ডায, ভিঙ্গাৰে ৰতনামযে;

জলং হত্থে আকিৰিত্ৱা, ব্ৰাহ্মণানং অদং গজং.

৮৭. ‘‘পুনাপৰং দদন্তস্স, সব্বসেতং গজুত্তমং;

তদাপি পথৱী কম্পি, সিনেৰুৱনৱটংসকা.

৮৮. ‘‘তস্স নাগস্স দানেন, সিৱযো কুদ্ধা সমাগতা;

পব্বাজেসুং সকা ৰট্ঠা, ‘ৱঙ্কং গচ্ছতু পব্বতং’.

৮৯. ‘‘তেসং নিচ্ছুভমানানং, অকম্পিত্থমসণ্ঠিতং;

মহাদানং পৱত্তেতুং, একং ৱৰমযাচিসং.

৯০. ‘‘যাচিতা সিৱযো সব্বে, একং ৱৰমদংসু মে;

সাৱযিত্ৱা কণ্ণভেৰিং, মহাদানং দদামহং.

৯১. ‘‘অথেত্থ ৱত্ততী সদ্দো, তুমুলো ভেৰৱো মহা;

দানেনিমং নীহৰন্তি, পুন দানং দদাতযং.

৯২. ‘‘হত্থিং অস্সে ৰথে দত্ৱা, দাসিং দাসং গৱং ধনং;

মহাদানং দদিত্ৱান, নগৰা নিক্খমিং তদা.

৯৩. ‘‘নিক্খমিত্ৱান নগৰা, নিৱত্তিত্ৱা ৱিলোকিতে;

তদাপি পথৱী কম্পি, সিনেৰুৱনৱটংসকা.

৯৪. ‘‘চতুৱাহিং ৰথং দত্ৱা, ঠত্ৱা চাতুম্মহাপথে;

একাকিযো অদুতিযো, মদ্দিদেৱিং ইদমব্ৰৱিং.

৯৫. ‘‘‘ত্ৱং মদ্দি কণ্হং গণ্হাহি, লহুকা এসা কনিট্ঠিকা;

অহং জালিং গহেস্সামি, গৰুকো ভাতিকো হি সো’.

৯৬. ‘‘পদুমং পুণ্ডৰীকংৱ, মদ্দী কণ্হাজিনগ্গহী;

অহং সুৱণ্ণবিম্বংৱ, জালিং খত্তিযমগ্গহিং.

৯৭. ‘‘অভিজাতা সুখুমালা, খত্তিযা চতুৰো জনা;

ৱিসমং সমং অক্কমন্তা, ৱঙ্কং গচ্ছাম পব্বতং.

৯৮. ‘‘যে কেচি মনুজা এন্তি, অনুমগ্গে পটিপ্পথে;

মগ্গন্তে পটিপুচ্ছাম, ‘কুহিং ৱঙ্কন্ত [ৱঙ্কত (সী.)] পব্বতো’.

৯৯. ‘‘তে তত্থ অম্হে পস্সিত্ৱা, কৰুণং গিৰমুদীৰযুং;

দুক্খং তে পটিৱেদেন্তি, দূৰে ৱঙ্কন্তপব্বতো.

১০০. ‘‘যদি পস্সন্তি পৱনে, দাৰকা ফলিনে দুমে;

তেসং ফলানং হেতুম্হি, উপৰোদন্তি দাৰকা.

১০১. ‘‘ৰোদন্তে দাৰকে দিস্ৱা, উব্বিদ্ধা [উব্বিগ্গা (স্যা. কং.)] ৱিপুলা দুমা;

সযমেৱোণমিত্ৱান, উপগচ্ছন্তি দাৰকে.

১০২. ‘‘ইদং অচ্ছৰিযং দিস্ৱা, অব্ভুতং লোমহংসনং;

সাহুকাৰং [সাধুকাৰং (সব্বত্থ)] পৱত্তেসি, মদ্দী সব্বঙ্গসোভনা.

১০৩. ‘‘অচ্ছেৰং ৱত লোকস্মিং, অব্ভুতং লোমহংসনং;

ৱেস্সন্তৰস্স তেজেন, সযমেৱোণতা দুমা.

১০৪. ‘‘সঙ্খিপিংসু পথং যক্খা, অনুকম্পায দাৰকে;

নিক্খন্তদিৱসেনেৱ [নিক্খন্তদিৱসেযেৱ (সী.)], চেতৰট্ঠমুপাগমুং.

১০৫. ‘‘সট্ঠিৰাজসহস্সানি, তদা ৱসন্তি মাতুলে;

সব্বে পঞ্জলিকা হুত্ৱা, ৰোদমানা উপাগমুং.

১০৬. ‘‘তত্থ ৱত্তেত্ৱা সল্লাপং, চেতেহি চেতপুত্তেহি;

তে ততো নিক্খমিত্ৱান, ৱঙ্কং অগমু পব্বতং.

১০৭. ‘‘আমন্তযিত্ৱা দেৱিন্দো, ৱিস্সকম্মং [ৱিসুকম্মং (ক.)] মহিদ্ধিকং;

অস্সমং সুকতং ৰম্মং, পণ্ণসালং সুমাপয.

১০৮. ‘‘সক্কস্স ৱচনং সুত্ৱা, ৱিস্সকম্মো মহিদ্ধিকো;

অস্সমং সুকতং ৰম্মং, পণ্ণসালং সুমাপযি.

১০৯. ‘‘অজ্ঝোগাহেত্ৱা পৱনং, অপ্পসদ্দং নিৰাকুলং;

চতুৰো জনা মযং তত্থ, ৱসাম পব্বতন্তৰে.

১১০. ‘‘অহঞ্চ মদ্দিদেৱী চ, জালী কণ্হাজিনা চুভো;

অঞ্ঞমঞ্ঞং সোকনুদা, ৱসাম অস্সমে তদা.

১১১. ‘‘দাৰকে অনুৰক্খন্তো, অসুঞ্ঞো হোমি অস্সমে;

মদ্দী ফলং আহৰিত্ৱা, পোসেতি সা তযো জনে.

১১২. ‘‘পৱনে ৱসমানস্স, অদ্ধিকো মং উপাগমি;

আযাচি পুত্তকে ময্হং, জালিং কণ্হাজিনং চুভো.

১১৩. ‘‘যাচকং উপগতং দিস্ৱা, হাসো মে উপপজ্জথ;

উভো পুত্তে গহেত্ৱান, অদাসিং ব্ৰাহ্মণে তদা.

১১৪. ‘‘সকে পুত্তে চজন্তস্স, জূজকে ব্ৰাহ্মণে যদা;

তদাপি পথৱী কম্পি, সিনেৰুৱনৱটংসকা.

১১৫. ‘‘পুনদেৱ সক্কো ওৰুয্হ, হুত্ৱা ব্ৰাহ্মণসন্নিভো;

আযাচি মং মদ্দিদেৱিং, সীলৱন্তিং পতিব্বতং.

১১৬. ‘‘মদ্দিং হত্থে গহেত্ৱান, উদকঞ্জলি পূৰিয;

পসন্নমনসঙ্কপ্পো, তস্স মদ্দিং অদাসহং.

১১৭. ‘‘মদ্দিযা দীযমানায, গগনে দেৱা পমোদিতা;

তদাপি পথৱী কম্পি, সিনেৰুৱনৱটংসকা.

১১৮. ‘‘জালিং কণ্হাজিনং ধীতং, মদ্দিদেৱিং পতিব্বতং;

চজমানো ন চিন্তেসিং, বোধিযাযেৱ কাৰণা.

১১৯. ‘‘ন মে দেস্সা উভো পুত্তা, মদ্দিদেৱী ন দেস্সিযা;

সব্বঞ্ঞুতং পিযং ময্হং, তস্মা পিযে অদাসহং.

১২০. ‘‘পুনাপৰং ব্ৰহাৰঞ্ঞে, মাতাপিতুসমাগমে;

কৰুণং পৰিদেৱন্তে, সল্লপন্তে সুখং দুখং.

১২১. ‘‘হিৰোত্তপ্পেন গৰুনা [গৰুনং (স্যা. ক.)], উভিন্নং উপসঙ্কমি;

তদাপি পথৱী কম্পি, সিনেৰুৱনৱটংসকা.

১২২. ‘‘পুনাপৰং ব্ৰহাৰঞ্ঞা, নিক্খমিত্ৱা সঞাতিভি;

পৱিসামি পুৰং ৰম্মং, জেতুত্তৰং পুৰুত্তমং.

১২৩. ‘‘ৰতনানি সত্ত ৱস্সিংসু, মহামেঘো পৱস্সথ;

তদাপি পথৱী কম্পি, সিনেৰুৱনৱটংসকা.

১২৪. ‘‘অচেতনাযং পথৱী, অৱিঞ্ঞায সুখং দুখং;

সাপি দানবলা ময্হং, সত্তক্খত্তুং পকম্পথা’’তি.

ৱেস্সন্তৰচৰিযং নৱমং.