১০. সসপণ্ডিতচৰিযা

১২৫. ‘‘পুনাপৰং যদা হোমি, সসকো পৱনচাৰকো;

তিণপণ্ণসাকফলভক্খো, পৰহেঠনৱিৱজ্জিতো.

১২৬. ‘‘মক্কটো চ সিঙ্গালো চ, সুত্তপোতো চহং তদা;

ৱসাম একসামন্তা, সাযং পাতো চ দিস্সৰে [সাযং পাতো পদিস্সৰে (ক.)].

১২৭. ‘‘অহং তে অনুসাসামি, কিৰিযে কল্যাণপাপকে;

‘পাপানি পৰিৱজ্জেথ, কল্যাণে অভিনিৱিস্সথ’.

১২৮. ‘‘উপোসথম্হি দিৱসে, চন্দং দিস্ৱান পূৰিতং;

এতেসং তত্থ আচিক্খিং, দিৱসো অজ্জুপোসথো.

১২৯. ‘‘দানানি পটিযাদেথ, দক্খিণেয্যস্স দাতৱে;

দত্ৱা দানং দক্খিণেয্যে, উপৱস্সথুপোসথং.

১৩০. ‘‘তে মে সাধূতি ৱত্ৱান, যথাসত্তি যথাবলং;

দানানি পটিযাদেত্ৱা, দক্খিণেয্যং গৱেসিসুং [গৱেসয্যুং (ক.)].

১৩১. ‘‘অহং নিসজ্জ চিন্তেসিং, দানং দক্খিণনুচ্ছৱং;

‘যদিহং লভে দক্খিণেয্যং, কিং মে দানং ভৱিস্সতি.

১৩২. ‘‘‘ন মে অত্থি তিলা মুগ্গা, মাসা ৱা তণ্ডুলা ঘতং;

অহং তিণেন যাপেমি, ন সক্কা তিণ দাতৱে.

১৩৩. ‘‘‘যদি কোচি এতি দক্খিণেয্যো, ভিক্খায মম সন্তিকে;

দজ্জাহং সকমত্তানং, ন সো তুচ্ছো গমিস্সতি’.

১৩৪. ‘‘মম সঙ্কপ্পমঞ্ঞায, সক্কো ব্ৰাহ্মণৱণ্ণিনা;

আসযং মে উপাগচ্ছি, দানৱীমংসনায মে.

১৩৫. ‘‘তমহং দিস্ৱান সন্তুট্ঠো, ইদং ৱচনমব্ৰৱিং;

‘সাধু খোসি অনুপ্পত্তো, ঘাসহেতু মমন্তিকে.

১৩৬. ‘‘‘অদিন্নপুব্বং দানৱৰং, অজ্জ দস্সামি তে অহং;

তুৱং সীলগুণূপেতো, অযুত্তং তে পৰহেঠনং.

১৩৭. ‘‘‘এহি অগ্গিং পদীপেহি, নানাকট্ঠে সমানয;

অহং পচিস্সমত্তানং, পক্কং ত্ৱং ভক্খযিস্সসি’.

১৩৮. ‘‘‘সাধূ’তি সো হট্ঠমনো, নানাকট্ঠে সমানযি;

মহন্তং অকাসি চিতকং, কত্ৱা অঙ্গাৰগব্ভকং.

১৩৯. ‘‘অগ্গিং তত্থ পদীপেসি, যথা সো খিপ্পং মহা ভৱে;

ফোটেত্ৱা ৰজগতে গত্তে, একমন্তং উপাৱিসিং.

১৪০. ‘‘যদা মহাকট্ঠপুঞ্জো, আদিত্তো ধমধমাযতি [ধুমধুমাযতি (সী.), ধমমাযতি (ক.)];

তদুপ্পতিত্ৱা পপতিং, মজ্ঝে জালসিখন্তৰে.

১৪১. ‘‘যথা সীতোদকং নাম, পৱিট্ঠং যস্স কস্সচি;

সমেতি দৰথপৰিড়াহং, অস্সাদং দেতি পীতি চ.

১৪২. ‘‘তথেৱ জলিতং অগ্গিং, পৱিট্ঠস্স মমং তদা;

সব্বং সমেতি দৰথং, যথা সীতোদকং ৱিয.

১৪৩. ‘‘ছৱিং চম্মং মংসং ন্হাৰুং, অট্ঠিং হদযবন্ধনং;

কেৱলং সকলং কাযং, ব্ৰাহ্মণস্স অদাসহ’’ন্তি.

সসপণ্ডিতচৰিযং দসমং.

অকিত্তিৱগ্গো পঠমো.

তস্সুদ্দানং –

অকিত্তিব্ৰাহ্মণো সঙ্খো, কুৰুৰাজা ধনঞ্চযো;

মহাসুদস্সনো ৰাজা, মহাগোৱিন্দব্ৰাহ্মণো.

নিমি চন্দকুমাৰো চ, সিৱি ৱেস্সন্তৰো সসো;

অহমেৱ তদা আসিং, যো তে দানৱৰে অদা.

এতে দানপৰিক্খাৰা, এতে দানস্স পাৰমী;

জীৱিতং যাচকে দত্ৱা, ইমং পাৰমি পূৰযিং.

ভিক্খায উপগতং দিস্ৱা, সকত্তানং পৰিচ্চজিং;

দানেন মে সমো নত্থি, এসা মে দানপাৰমীতি.

দানপাৰমিনিদ্দেসো নিট্ঠিতো.