১০. অসনবোধিযত্থেৰঅপদানং

৭৮. ‘‘জাতিযা সত্তৱস্সোহং, অদ্দসং লোকনাযকং;

পসন্নচিত্তো সুমনো, উপগচ্ছিং নৰুত্তমং.

৭৯. ‘‘তিস্সস্সাহং ভগৱতো, লোকজেট্ঠস্স তাদিনো;

হট্ঠো হট্ঠেন চিত্তেন, ৰোপযিং বোধিমুত্তমং.

৮০. ‘‘অসনো নামধেয্যেন, ধৰণীৰুহপাদপো;

পঞ্চৱস্সে পৰিচৰিং, অসনং বোধিমুত্তমং.

৮১. ‘‘পুপ্ফিতং পাদপং দিস্ৱা, অব্ভুতং লোমহংসনং;

সকং কম্মং পকিত্তেন্তো, বুদ্ধসেট্ঠং উপাগমিং.

৮২. ‘‘তিস্সো তদা সো সম্বুদ্ধো, সযম্ভূ অগ্গপুগ্গলো;

ভিক্খুসঙ্ঘে নিসীদিত্ৱা, ইমা গাথা অভাসথ.

৮৩. ‘‘‘যেনাযং ৰোপিতা বোধি, বুদ্ধপূজা চ সক্কতা;

তমহং কিত্তযিস্সামি, সুণাথ মম ভাসতো.

৮৪. ‘‘‘তিংসকপ্পানি দেৱেসু, দেৱৰজ্জং কৰিস্সতি;

চতুসট্ঠি চক্খত্তুং সো, চক্কৱত্তী ভৱিস্সতি.

৮৫. ‘‘‘তুসিতা হি চৱিত্ৱান, সুক্কমূলেন চোদিতো;

দ্ৱে সম্পত্তী অনুভোত্ৱা, মনুস্সত্তে ৰমিস্সতি.

৮৬. ‘‘‘পধানপহিতত্তো সো, উপসন্তো নিৰূপধি;

সব্বাসৱে পৰিঞ্ঞায, নিব্বাযিস্সতিনাসৱো’.

৮৭. ‘‘ৱিৱেকমনুযুত্তোহং, উপসন্তো নিৰূপধি;

নাগোৱ বন্ধনং ছেত্ৱা, ৱিহৰামি অনাসৱো.

৮৮. ‘‘দ্ৱেনৱুতে ইতো কপ্পে, বোধিং ৰোপেসহং তদা;

দুগ্গতিং নাভিজানামি, বোধিৰোপস্সিদং ফলং.

৮৯. ‘‘চতুসত্ততিতো কপ্পে, দণ্ডসেনোতি ৱিস্সুতো;

সত্তৰতনসম্পন্নো, চক্কৱত্তী তদা অহুং.

৯০. ‘‘তেসত্ততিম্হিতো কপ্পে, সত্তাহেসুং মহীপতী;

সমন্তনেমিনামেন, ৰাজানো চক্কৱত্তিনো.

৯১. ‘‘পণ্ণৱীসতিতো কপ্পে, পুণ্ণকো নাম খত্তিযো;

সত্তৰতনসম্পন্নো, চক্কৱত্তী মহব্বলো.

৯২. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা অসনবোধিযো থেৰো ইমা গাথাযো অভাসিত্থাতি.

অসনবোধিযত্থেৰস্সাপদানং দসমং.

বীজনিৱগ্গো ছট্ঠো.