৭. সকচিন্তনিযৱগ্গো

১. সকচিন্তনিযত্থেৰঅপদানং

১. ‘‘পৱনং কাননং দিস্ৱা, অপ্পসদ্দমন্নাৱিলং;

ইসীনং অনুচিণ্ণংৱ, আহুতীনং পটিগ্গহং.

২. ‘‘থূপং কত্ৱান পুলিনং [ৱেড়ুনা (অট্ঠ.), ৱেড়িনং (স্যা.)], নানাপুপ্ফং সমোকিৰিং;

সম্মুখা ৱিয সম্বুদ্ধং, নিম্মিতং অভিৱন্দহং.

৩. ‘‘সত্তৰতনসম্পন্নো, ৰাজা ৰট্ঠম্হি ইস্সৰো;

সককম্মাভিৰদ্ধোহং, পুপ্ফপূজাযিদং [থূপপূজাযিদং (সী.)] ফলং.

৪. ‘‘একনৱুতিতো কপ্পে, যং পুপ্ফমভিৰোপযিং;

দুগ্গতিং নাভিজানামি, পুপ্ফপূজাযিদং [থূপপূজাযিদং (সী.)] ফলং.

৫. ‘‘অসীতিকপ্পেনন্তযসো, চক্কৱত্তী অহোসহং;

সত্তৰতনসম্পন্নো, চতুদীপম্হি ইস্সৰো.

৬. ‘‘পটিসম্ভিদা চতস্সো, ৱিমোক্খাপি চ অট্ঠিমে;

ছড়ভিঞ্ঞা সচ্ছিকতা, কতং বুদ্ধস্স সাসনং’’.

ইত্থং সুদং আযস্মা সকচিন্তনিযো থেৰো ইমা গাথাযো অভাসিত্থাতি.

সকচিন্তনিযত্থেৰস্সাপদানং পঠমং.

২. অৱোপুপ্ফিযত্থেৰঅপদানং

৭. ‘‘ৱিহাৰা অভিনিক্খম্ম, অব্ভুট্ঠহিয [অব্ভুট্ঠাসি চ (স্যা. ক.)] চঙ্কমে;

চতুসচ্চং পকাসন্তো, দেসেতি [দেসেন্তো (স্যা. ক.)] অমতং পদং.

৮. ‘‘সিখিস্স গিৰমঞ্ঞায, বুদ্ধসেট্ঠস্স তাদিনো;

নানাপুপ্ফং গহেত্ৱান, আকাসম্হি সমোকিৰিং.

৯. ‘‘তেন কম্মেন দ্ৱিপদিন্দ, লোকজেট্ঠ নৰাসভ;

পত্তোম্হি অচলং ঠানং, হিত্ৱা জযপৰাজযং.

১০. ‘‘একত্তিংসে ইতো কপ্পে, যং পুপ্ফমভিৰোপযিং;

দুগ্গতিং নাভিজানামি, পুপ্ফপূজাযিদং ফলং.

১১. ‘‘ইতো ৱীসতিকপ্পম্হি, সুমেধো নাম খত্তিযো;

সত্তৰতনসম্পন্নো, চক্কৱত্তী মহব্বলো.

১২. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা অৱোপুপ্ফিযো থেৰো ইমা গাথাযো অভাসিত্থাতি.

অৱোপুপ্ফিযত্থেৰস্সাপদানং দুতিযং.

৩. পচ্চাগমনিযত্থেৰঅপদানং

১৩. ‘‘সিন্ধুযা নদিযা তীৰে, চক্কৱাকো অহং তদা;

সুদ্ধসেৱালভক্খোহং, পাপেসু চ সুসঞ্ঞতো.

১৪. ‘‘অদ্দসং ৱিৰজং বুদ্ধং, গচ্ছন্তং অনিলঞ্জসে;

তুণ্ডেন সালং পগ্গয্হ, ৱিপস্সিস্সাভিৰোপযিং.

১৫. ‘‘যস্স সদ্ধা তথাগতে, অচলা সুপতিট্ঠিতা;

তেন চিত্তপ্পসাদেন, দুগ্গতিং সো ন গচ্ছতি.

১৬. ‘‘স্ৱাগতং ৱত মে আসি, বুদ্ধসেট্ঠস্স সন্তিকে;

ৱিহঙ্গমেন সন্তেন, সুবীজং ৰোপিতং মযা.

১৭. ‘‘একনৱুতিতো কপ্পে, যং পুপ্ফমভিৰোপযিং;

দুগ্গতিং নাভিজানামি, বুদ্ধপূজাযিদং [পুপ্ফপূজাযিদং (সী.)] ফলং.

১৮. ‘‘সুচাৰুদস্সনা নাম, অট্ঠেতে একনামকা;

কপ্পে সত্তৰসে আসুং, চক্কৱত্তী মহব্বলা.

১৯. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা পচ্চাগমনিযো থেৰো ইমা গাথাযো অভাসিত্থাতি.

পচ্চাগমনিযত্থেৰস্সাপদানং ততিযং.

৪. পৰপ্পসাদকত্থেৰঅপদানং

২০. ‘‘উসভং পৱৰং ৱীৰং, মহেসিং ৱিজিতাৱিনং;

সুৱণ্ণৱণ্ণং সম্বুদ্ধং, কো দিস্ৱা নপ্পসীদতি.

২১. ‘‘হিমৱাৱাপৰিমেয্যো, সাগৰোৱ দুৰুত্তৰো;

তথেৱ ঝানং বুদ্ধস্স, কো দিস্ৱা নপ্পসীদতি.

২২. ‘‘ৱসুধা যথাপ্পমেয্যা, চিত্তা ৱনৱটংসকা;

তথেৱ সীলং বুদ্ধস্স, কো দিস্ৱা নপ্পসীদতি.

২৩. ‘‘অনিলঞ্জসাসঙ্খুব্ভো [অনিলজোৱ অসঙ্খোভো (সী.)], যথাকাসো অসঙ্খিযো;

তথেৱ ঞাণং বুদ্ধস্স, কো দিস্ৱা নপ্পসীদতি.

২৪. ‘‘ইমাহি চতুগাথাহি, ব্ৰাহ্মণো সেনসৱ্হযো;

বুদ্ধসেট্ঠং থৱিত্ৱান, সিদ্ধত্থং অপৰাজিতং.

২৫. ‘‘চতুন্নৱুতিকপ্পানি, দুগ্গতিং নুপপজ্জথ;

সুগতিং সুখসম্পত্তিং [সুগতীসু সুসুম্পত্তিং (সী. স্যা.)], অনুভোসিমনপ্পকং.

২৬. ‘‘চতুন্নৱুতিতো কপ্পে, থৱিত্ৱা লোকনাযকং;

দুগ্গতিং নাভিজানামি, থোমনায [থোমনস্স (স্যা.)] ইদং ফলং.

২৭. ‘‘চাতুদ্দসম্হি কপ্পম্হি, চতুৰো আসুমুগ্গতা;

সত্তৰতনসম্পন্না, চক্কৱত্তী মহব্বলা.

২৮. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা পৰপ্পসাদকো থেৰো ইমা গাথাযো অভাসিত্থাতি.

পৰপ্পসাদকত্থেৰস্সাপদানং চতুত্থং.

৫. ভিসদাযকত্থেৰঅপদানং

২৯. ‘‘ৱেস্সভূ নাম নামেন, ইসীনং ততিযো অহু;

কাননং ৱনমোগয্হ, ৱিহাসি পুৰিসুত্তমো.

৩০. ‘‘ভিসমুড়ালং গণ্হিত্ৱা, অগমং বুদ্ধসন্তিকং;

তঞ্চ বুদ্ধস্স পাদাসিং, পসন্নো সেহি পাণিভি.

৩১. ‘‘কৰেন চ পৰামট্ঠো, ৱেস্সভূৱৰবুদ্ধিনা;

সুখাহং নাভিজানামি, সমং তেন কুতোত্তৰিং.

৩২. ‘‘চৰিমো ৱত্ততে ময্হং, ভৱা সব্বে সমূহতা;

হত্থিনাগেন সন্তেন, কুসলং ৰোপিতং মযা [নাগোৱ বন্ধনং ছেত্ৱা, ৱিহৰামি অনাসৱো (স্যা.)].

৩৩. ‘‘একত্তিংসে ইতো কপ্পে, যং কম্মমকৰিং তদা;

দুগ্গতিং নাভিজানামি, ভিসদানস্সিদং ফলং.

৩৪. ‘‘সমোধানা চ ৰাজানো, সোড়স মনুজাধিপা;

কপ্পম্হি চুদ্দসে [তেৰসে (সী. স্যা.)] আসুং, চক্কৱত্তী মহব্বলা.

৩৫. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা ভিসদাযকো থেৰো ইমা গাথাযো অভাসিত্থাতি.

ভিসদাযকত্থেৰস্সাপদানং পঞ্চমং.

৬. সুচিন্তিতত্থেৰঅপদানং

৩৬. ‘‘গিৰিদুগ্গচৰো আসিং, অভিজাতোৱ কেসৰী;

মিগসঙ্ঘং ৱধিত্ৱান, জীৱামি পব্বতন্তৰে.

৩৭. ‘‘অত্থদস্সী তু ভগৱা, সব্বঞ্ঞূ ৱদতং ৱৰো;

মমুদ্ধৰিতুকামো সো, আগচ্ছি পব্বতুত্তমং.

৩৮. ‘‘পসদঞ্চ মিগং হন্ত্ৱা, ভক্খিতুং সমুপাগমিং;

ভগৱা তম্হি সমযে, ভিক্খমানো [সিক্খাচাৰো (স্যা.)] উপাগমি.

৩৯. ‘‘ৱৰমংসানি পগ্গয্হ, অদাসিং তস্স সত্থুনো;

অনুমোদি মহাৱীৰো, নিব্বাপেন্তো মমং তদা.

৪০. ‘‘তেন চিত্তপ্পসাদেন, গিৰিদুগ্গং পৱিসিং অহং;

পীতিং উপ্পাদযিত্ৱান, তত্থ কালঙ্কতো অহং.

৪১. ‘‘এতেন মংসদানেন, চিত্তস্স পণিধীহি চ;

পন্নৰসে কপ্পসতে, দেৱলোকে ৰমিং অহং.

৪২. ‘‘অৱসেসেসু কপ্পেসু, কুসলং চিন্তিতং [নিচিতং (সী.), কৰিতং (স্যা.)] মযা;

তেনেৱ মংসদানেন, বুদ্ধানুস্সৰণেন চ.

৪৩. ‘‘অট্ঠত্তিংসম্হি কপ্পম্হি, অট্ঠ দীঘাযুনামকা;

সট্ঠিম্হিতো কপ্পসতে, দুৱে ৱৰুণনামকা [সৰণনামকা (স্যা.)].

৪৪. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা সুচিন্তিতো থেৰো ইমা গাথাযো অভাসিত্থাতি.

সুচিন্তিতত্থেৰস্সাপদানং ছট্ঠং.

৭. ৱত্থদাযকত্থেৰঅপদানং

৪৫. ‘‘পক্খিজাতো তদা আসিং, সুপণ্ণো গৰুড়াধিপো;

অদ্দসং ৱিৰজং বুদ্ধং, গচ্ছন্তং গন্ধমাদনং.

৪৬. ‘‘জহিত্ৱা গৰুড়ৱণ্ণং, মাণৱকং অধাৰযিং;

একং ৱত্থং মযা দিন্নং, দ্ৱিপদিন্দস্স তাদিনো.

৪৭. ‘‘তঞ্চ দুস্সং পটিগ্গয্হ, বুদ্ধো লোকগ্গনাযকো;

অন্তলিক্খে ঠিতো সত্থা, ইমা গাথা অভাসথ.

৪৮. ‘‘‘ইমিনা ৱত্থদানেন, চিত্তস্স পণিধীহি চ;

পহায গৰুড়ং যোনিং, দেৱলোকে ৰমিস্সতি’.

৪৯. ‘‘অত্থদস্সী তু ভগৱা, লোকজেট্ঠো নৰাসভো;

ৱত্থদানং পসংসিত্ৱা, পক্কামি উত্তৰামুখো.

৫০. ‘‘ভৱে নিব্বত্তমানম্হি, হোন্তি মে ৱত্থসম্পদা;

আকাসে ছদনং হোতি, ৱত্থদানস্সিদং ফলং.

৫১. ‘‘অৰুণৱা [অৰুণকা (সী.), অৰুণসা (স্যা.)] সত্ত জনা, চক্কৱত্তী মহব্বলা;

ছত্তিংসতিম্হি আসিংসু, কপ্পম্হি মনুজাধিপা.

৫২. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা ৱত্থদাযকো থেৰো ইমা গাথাযো অভাসিত্থাতি.

ৱত্থদাযকত্থেৰস্সাপদানং সত্তমং.

৮. অম্বদাযকত্থেৰঅপদানং

৫৩. ‘‘অনোমদস্সী ভগৱা, নিসিন্নো পব্বতন্তৰে;

মেত্তায অফৰি লোকে, অপ্পমাণে নিৰূপধি.

৫৪. ‘‘কপি অহং তদা আসিং, হিমৱন্তে নগুত্তমে;

দিস্ৱা অনোমদস্সিং তং [অনোমং অমিতং (সী.), অনোমমধিতং (স্যা.)], বুদ্ধে চিত্তং পসাদযিং.

৫৫. ‘‘অৱিদূৰে হিমৱন্তস্স, অম্বাসুং ফলিনো তদা;

ততো পক্কং গহেত্ৱান, অম্বং সমধুকং অদং.

৫৬. ‘‘তং মে বুদ্ধো ৱিযাকাসি, অনোমদস্সী মহামুনি;

ইমিনা মধুদানেন, অম্বদানেন চূভযং.

৫৭. ‘‘সত্তপঞ্ঞাসকপ্পম্হি, দেৱলোকে ৰমিস্সতি;

অৱসেসেসু কপ্পেসু, ৱোকিণ্ণং সংসৰিস্সতি.

৫৮. ‘‘খেপেত্ৱা পাপকং কম্মং, পৰিপক্কায বুদ্ধিযা;

ৱিনিপাতমগন্ত্ৱান, কিলেসে ঝাপযিস্সতি.

৫৯. ‘‘দমেন উত্তমেনাহং, দমিতোম্হি মহেসিনা;

পত্তোম্হি অচলং ঠানং, হিত্ৱা জযপৰাজযং.

৬০. ‘‘সত্তসত্ততিকপ্পসতে, অম্বট্ঠজসনামকা;

চতুদ্দস তে ৰাজানো, চক্কৱত্তী মহব্বলা.

৬১. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা অম্বদাযকো থেৰো ইমা গাথাযো অভাসিত্থাতি.

অম্বদাযকত্থেৰস্সাপদানং অট্ঠমং.

৯. সুমনত্থেৰঅপদানং

৬২. ‘‘সুমনো নাম নামেন, মালাকাৰো অহং তদা;

অদ্দসং ৱিৰজং বুদ্ধং, লোকাহুতিপটিগ্গহং.

৬৩. ‘‘উভো হত্থেহি পগ্গয্হ, সুমনং পুপ্ফমুত্তমং;

বুদ্ধস্স অভিৰোপেসিং, সিখিনো লোকবন্ধুনো.

৬৪. ‘‘ইমায পুপ্ফপূজায, চেতনাপণিধীহি চ;

দুগ্গতিং নাভিজানামি, বুদ্ধপূজাযিদং ফলং.

৬৫. ‘‘একত্তিংসে ইতো কপ্পে, যং পুপ্ফমভিৰোপযিং;

দুগ্গতিং নাভিজানামি, বুদ্ধপূজাযিদং [পুপ্ফপূজাযিদং (সী.)] ফলং.

৬৬. ‘‘ছব্বীসতিম্হি কপ্পম্হি, চত্তাৰোসুং মহাযসা;