৬. বীজনিৱগ্গো

১. ৱিধূপনদাযকত্থেৰঅপদানং

১. ‘‘পদুমুত্তৰবুদ্ধস্স, লোকজেট্ঠস্স তাদিনো;

বীজনিকা [ৱীজনিকা (সী. স্যা.)] মযা দিন্না, দ্ৱিপদিন্দস্স তাদিনো.

২. ‘‘সকং চিত্তং পসাদেত্ৱা, পগ্গহেত্ৱান অঞ্জলিং;

সম্বুদ্ধমভিৱাদেত্ৱা, পক্কমিং উত্তৰামুখো.

৩. ‘‘বীজনিং পগ্গহেত্ৱান, সত্থা লোকগ্গনাযকো [লোকে অনুত্তৰো (সী.)];

ভিক্খুসঙ্ঘে ঠিতো সন্তো, ইমা গাথা অভাসথ.

৪. ‘‘‘ইমিনা বীজনিদানেন, চিত্তস্স পণিধীহি [চেতনাপণিধীহি (অঞ্ঞত্থ)] চ;

কপ্পানং সতসহস্সং, ৱিনিপাতং ন গচ্ছতি’.

৫. ‘‘আৰদ্ধৱীৰিযো পহিতত্তো, চেতোগুণসমাহিতো;

জাতিযা সত্তৱস্সোহং, অৰহত্তং অপাপুণিং.

৬. ‘‘সট্ঠিকপ্পসহস্সম্হি, বীজমানসনামকা;

সোড়সাসিংসু ৰাজানো, চক্কৱত্তী মহব্বলা.

৭. ‘‘পটিসম্ভিদা চতস্সো, ৱিমোক্খাপি চ অট্ঠিমে;

ছড়ভিঞ্ঞা সচ্ছিকতা, কতং বুদ্ধস্স সাসনং’’.

ইত্থং সুদং আযস্মা ৱিধূপনদাযকো থেৰো ইমা গাথাযো অভাসিত্থাতি.

ৱিধূপনদাযকত্থেৰস্সাপদানং পঠমং.

২. সতৰংসিত্থেৰঅপদানং

৮. ‘‘উব্বিদ্ধং সেলমাৰুয্হ, নিসীদি পুৰিসুত্তমো;

পব্বতস্সাৱিদূৰম্হি, ব্ৰাহ্মণো মন্তপাৰগূ.

৯. ‘‘উপৱিট্ঠং মহাৱীৰং, দেৱদেৱং নৰাসভং;

অঞ্জলিং পগ্গহেত্ৱান, সন্থৱিং লোকনাযকং.

১০. ‘‘‘এস বুদ্ধো মহাৱীৰো, ৱৰধম্মপ্পকাসকো;

জলতি অগ্গিখন্ধোৱ, ভিক্খুসঙ্ঘপুৰক্খতো.

১১. ‘‘‘মহাসমুদ্দোৱ‘ক্খুব্ভো [’ক্খোভো (সী. স্যা.)], অণ্ণৱোৱ দুৰুত্তৰো;

মিগৰাজাৱসম্ভীতো [ছম্ভিতো (ক.)], ধম্মং দেসেতি চক্খুমা’.

১২. ‘‘মম সঙ্কপ্পমঞ্ঞায, পদুমুত্তৰনাযকো;

ভিক্খুসঙ্ঘে ঠিতো সত্থা, ইমা গাথা অভাসথ.

১৩. ‘‘‘যেনাযং [যেনাহং (ক.)] অঞ্জলী দিন্নো, বুদ্ধসেট্ঠো চ থোমিতো;

তিংসকপ্পসহস্সানি, দেৱৰজ্জং কৰিস্সতি.

১৪. ‘‘‘কপ্পসতসহস্সম্হি, অঙ্গীৰসসনামকো;

ৱিৱট্টচ্ছদো [ৱিৱত্থচ্ছদ্দো (সী.)] সম্বুদ্ধো, উপ্পজ্জিস্সতি তাৱদে.

১৫. ‘‘‘তস্স ধম্মেসু দাযাদো, ওৰসো ধম্মনিম্মিতো;

সতৰংসীতি নামেন, অৰহা সো ভৱিস্সতি’.

১৬. ‘‘জাতিযা সত্তৱস্সোহং, পব্বজিং অনগাৰিযং;

সতৰংসিম্হি নামেন, পভা নিদ্ধাৱতে মম.

১৭. ‘‘মণ্ডপে ৰুক্খমূলে ৱা, ঝাযী ঝানৰতো অহং;

ধাৰেমি অন্তিমং দেহং, সম্মাসম্বুদ্ধসাসনে.

১৮. ‘‘সট্ঠিকপ্পসহস্সম্হি, চতুৰো ৰামনামকা;

সত্তৰতনসম্পন্না, চক্কৱত্তী মহব্বলা.

১৯. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা সতৰংসি থেৰো ইমা গাথাযো অভাসিত্থাতি.

সতৰংসিত্থেৰস্সাপদানং দুতিযং.

৩. সযনদাযকত্থেৰঅপদানং

২০. ‘‘পদুমুত্তৰবুদ্ধস্স, সব্বলোকানুকম্পিনো;

সযনং তস্স পাদাসিং, ৱিপ্পসন্নেন চেতসা.

২১. ‘‘তেন সযনদানেন, সুখেত্তে বীজসম্পদা;

ভোগা নিব্বত্তৰে তস্স, সযনস্স ইদং ফলং.

২২. ‘‘আকাসে সেয্যং কপ্পেমি, ধাৰেমি পথৱিং ইমং;

পাণেসু মে ইস্সৰিযং, সযনস্স ইদং ফলং.

২৩. ‘‘পঞ্চকপ্পসহস্সম্হি, অট্ঠ আসুং মহাতেজা [মহাৱৰা (সী.), মহাৱীৰা (স্যা.)];

চতুত্তিংসে কপ্পসতে, চতুৰো চ মহব্বলা.

২৪. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা সযনদাযকো থেৰো ইমা গাথাযো অভাসিত্থাতি.

সযনদাযকত্থেৰস্সাপদানং ততিযং.

৪. গন্ধোদকিযত্থেৰঅপদানং

২৫. ‘‘পদুমুত্তৰবুদ্ধস্স, মহাবোধিমহো অহু;

ৱিচিত্তং ঘটমাদায, গন্ধোদকমদাসহং.

২৬. ‘‘ন্হানকালে চ বোধিযা, মহামেঘো পৱস্সথ;

নিন্নাদো চ মহা আসি, অসনিযা ফলন্তিযা.

২৭. ‘‘তেনেৱাসনিৱেগেন, তত্থ কালঙ্কতো [কালকতো (সী. স্যা.)] অহং [অহুং (সী.)];

দেৱলোকে ঠিতো সন্তো, ইমা গাথা অভাসহং.

২৮. ‘‘‘অহো বুদ্ধো অহো ধম্মো, অহো নো সত্থুসম্পদা;

কড়েৱৰং [কলেবৰং (সী.)] মে পতিতং, দেৱলোকে ৰমামহং.

২৯. ‘‘‘উব্বিদ্ধং ভৱনং ময্হং, সতভূমং সমুগ্গতং;

কঞ্ঞাসতসহস্সানি, পৰিৱাৰেন্তি মং সদা.

৩০. ‘‘‘আবাধা মে ন ৱিজ্জন্তি, সোকো ময্হং ন ৱিজ্জতি;

পৰিড়াহং ন পস্সামি, পুঞ্ঞকম্মস্সিদং ফলং.

৩১. ‘‘‘অট্ঠৱীসে কপ্পসতে, ৰাজা সংৱসিতো অহুং;

সত্তৰতনসম্পন্নো, চক্কৱত্তী মহব্বলো’.

৩২. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা গন্ধোদকিযো থেৰো ইমা গাথাযো অভাসিত্থাতি.

গন্ধোদকিযত্থেৰস্সাপদানং চতুত্থং.

৫. ওপৱয্হত্থেৰঅপদানং

৩৩. ‘‘পদুমুত্তৰবুদ্ধস্স, আজানীযমদাসহং;

নিয্যাদেত্ৱান সম্বুদ্ধে [সম্বুদ্ধং (সী. ক.)], অগমাসিং সকং ঘৰং.

৩৪. ‘‘দেৱলো নাম নামেন, সত্থুনো অগ্গসাৱকো;

ৱৰধম্মস্স দাযাদো, আগচ্ছি মম সন্তিকং.

৩৫. ‘‘সপত্তভাৰো ভগৱা, আজানেয্যো ন কপ্পতি;

তৱ সঙ্কপ্পমঞ্ঞায, অধিৱাসেসি চক্খুমা.

৩৬. ‘‘অগ্ঘাপেত্ৱা ৱাতজৱং, সিন্ধৱং সীঘৱাহনং;

পদুমুত্তৰবুদ্ধস্স, খমনীযমদাসহং.

৩৭. ‘‘যং যং যোনুপপজ্জামি, দেৱত্তং অথ মানুসং [দেৱে চ মানুসে ভৱে (সী. ক.)];

খমনীযং ৱাতজৱং, চিত্তং নিব্বত্ততে [আজানীযা ৱাতজৱা, ৱিত্তি নিব্বত্তৰে (স্যা.), খমনীযা ৱাতজৱা, চিত্তা নিব্বত্তৰে (সী.)] মম.

৩৮. ‘‘লাভং তেসং সুলদ্ধংৱ, যে লভন্তুপসম্পদং;

পুনপি পযিৰুপাসেয্যং, বুদ্ধো লোকে সচে ভৱে.

৩৯. ‘‘অট্ঠৱীসতিক্খত্তুংহং, ৰাজা আসিং মহব্বলো;

চাতুৰন্তো ৱিজিতাৱী, জম্বুসণ্ডস্স [জম্বুদীপস্স (স্যা.), জম্বুমণ্ডস্স (ক.)] জম্বুইস্সৰো.

৪০. ‘‘ইদং পচ্ছিমকং ময্হং, চৰিমো ৱত্ততে ভৱো;

পত্তোস্মি অচলং ঠানং, হিত্ৱা জযপৰাজযং.

৪১. ‘‘চতুতিংসসহস্সম্হি, মহাতেজোসি খত্তিযো;

সতৰতনসম্পন্নো, চক্কৱত্তী মহব্বলো.

৪২. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা ওপৱয্হো থেৰো ইমা গাথাযো অভাসিত্থাতি.

ওপৱয্হত্থেৰস্সাপদানং পঞ্চমং.

৬. সপৰিৱাৰাসনত্থেৰঅপদানং

৪৩. ‘‘পদুমুত্তৰবুদ্ধস্স, পিণ্ডপাতং অদাসহং;

গন্ত্ৱা কিলিট্ঠকং ঠানং [তং ভোজনট্ঠানং (সী.)], মল্লিকাহি পৰিক্খিতং [পৰিক্খিপিং (সী.)].

৪৪. ‘‘তম্হাসনম্হি আসীনো, বুদ্ধো লোকগ্গনাযকো;

অকিত্তযি পিণ্ডপাতং, উজুভূতো সমাহিতো.

৪৫. ‘‘যথাপি ভদ্দকে খেত্তে, বীজং অপ্পম্পি ৰোপিতং;

সম্মা ধাৰং পৱেচ্ছন্তে, ফলং তোসেতি কস্সকং.

৪৬. ‘‘তথেৱাযং পিণ্ডপাতো, সুখেত্তে ৰোপিতো তযা;

ভৱে নিব্বত্তমানম্হি, ফলং তে [নিব্বত্তমানং হি, ফলতো (সী.)] তোসযিস্সতি [তপ্পযিস্সতি (ক.)].

৪৭. ‘‘ইদং ৱত্ৱান সম্বুদ্ধো, জলজুত্তমনামকো;

পিণ্ডপাতং গহেত্ৱান, পক্কামি উত্তৰামুখো.

৪৮. ‘‘সংৱুতো পাতিমোক্খস্মিং, ইন্দ্ৰিযেসু চ পঞ্চসু;

পৱিৱেকমনুযুত্তো, ৱিহৰামি অনাসৱো.

৪৯. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা সপৰিৱাৰাসনো থেৰো ইমা গাথাযো অভাসিত্থাতি.

সপৰিৱাৰাসনত্থেৰস্সাপদানং ছট্ঠং.

৭. পঞ্চদীপকত্থেৰঅপদানং

৫০. ‘‘পদুমুত্তৰবুদ্ধস্স, সব্বভূতানুকম্পিনো;

সদ্দহিত্ৱান [সুসণ্ঠহিত্ৱা (সী.)] সদ্ধম্মে, উজুদিট্ঠি অহোসহং.

৫১. ‘‘পদীপদানং পাদাসিং, পৰিৱাৰেত্ৱান বোধিযং;

সদ্দহন্তো পদীপানি, অকৰিং তাৱদে অহং.

৫২. ‘‘যং যং যোনুপপজ্জামি, দেৱত্তং অথ মানুসং;

আকাসে উক্কং ধাৰেন্তি, দীপদানস্সিদং ফলং.

৫৩. ‘‘তিৰোকুট্টং তিৰোসেলং, সমতিগ্গয্হ পব্বতং;

সমন্তা যোজনসতং, দস্সনং অনুভোমহং.

৫৪. ‘‘তেন কম্মাৱসেসেন, পত্তোম্হি আসৱক্খযং;

ধাৰেমি অন্তিমং দেহং, দ্ৱিপদিন্দস্স সাসনে.

৫৫. ‘‘চতুত্তিংসে কপ্পসতে, সতচক্খুসনামকা;

ৰাজাহেসুং মহাতেজা, চক্কৱত্তী মহব্বলা.

৫৬. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা পঞ্চদীপকো থেৰো ইমা গাথাযো অভাসিত্থাতি.

পঞ্চদীপকত্থেৰস্সাপদানং সত্তমং.

৮. ধজদাযকত্থেৰঅপদানং

৫৭. ‘‘পদুমুত্তৰবুদ্ধস্স, বোধিযা পাদপুত্তমে;

হট্ঠো হট্ঠেন চিত্তেন, ধজমাৰোপযিং অহং.

৫৮. ‘‘পতিতপত্তানি গণ্হিত্ৱা, বহিদ্ধা ছড্ডযিং অহং;

অন্তোসুদ্ধং বহিসুদ্ধং, অধিমুত্তমনাসৱং.

৫৯. ‘‘সম্মুখা ৱিয সম্বুদ্ধং, অৱন্দিং বোধিমুত্তমং;

পদুমুত্তৰো লোকৱিদূ, আহুতীনং পটিগ্গহো.

৬০. ‘‘ভিক্খুসঙ্ঘে ঠিতো সত্থা, ইমা গাথা অভাসথ;

‘‘‘ইমিনা ধজদানেন, উপট্ঠানেন চূভযং.

৬১. ‘‘‘কপ্পানং সতসহস্সং, দুগ্গতিং সো ন গচ্ছতি;

দেৱেসু দেৱসোভগ্যং, অনুভোস্সতিনপ্পকং.

৬২. ‘‘‘অনেকসতক্খত্তুঞ্চ, ৰাজা ৰট্ঠে ভৱিস্সতি;

উগ্গতো নাম নামেন, চক্কৱত্তী ভৱিস্সতি.

৬৩. ‘‘‘সম্পত্তিং অনুভোত্ৱান, সুক্কমূলেন চোদিতো;

গোতমস্স ভগৱতো, সাসনেভিৰমিস্সতি’.

৬৪. ‘‘পধানপহিতত্তোম্হি, উপসন্তো নিৰূপধি;

ধাৰেমি অন্তিমং দেহং, সম্মাসম্বুদ্ধসাসনে.

৬৫. ‘‘একপঞ্ঞাসসহস্সে, কপ্পে উগ্গতসৱ্হযো [সৱ্হযা (স্যা.)];

পঞ্ঞাসসতসহস্সে, খত্তিযো মেঘসৱ্হযো [খত্তিযা খেমসৱ্হযা (স্যা.)].

৬৬. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা ধজদাযকো থেৰো ইমা গাথাযো অভাসিত্থাতি.

ধজদাযকত্থেৰস্সাপদানং অট্ঠমং.