৮. ভদ্দজিত্থেৰঅপদানং

৯৮. ‘‘ওগয্হ যং পোক্খৰণিং, নানাকুঞ্জৰসেৱিতং;

উদ্ধৰামি ভিসং তত্থ, ঘাসহেতু অহং তদা.

৯৯. ‘‘ভগৱা তম্হি সমযে, পদুমুত্তৰসৱ্হযো;

ৰত্তম্বৰধৰো বুদ্ধো, গচ্ছতে অনিলঞ্জসে.

১০০. ‘‘ধুনন্তো পংসুকূলানি, সদ্দং অস্সোসহং তদা;

উদ্ধং নিজ্ঝাযমানোহং, অদ্দসং লোকনাযকং.

১০১. ‘‘তত্থেৱ ঠিতকো সন্তো, আযাচিং লোকনাযকং;

মধুং ভিসেহি সহিতং, খীৰং সপ্পিং মুড়ালিকং [মধুং ভিসেহি পচতি, খীৰসপ্পি মুলালিভি (ক.) ভিসদাযকত্থেৰাপদানেপি].

১০২. ‘‘পটিগ্গণ্হাতু মে বুদ্ধো, অনুকম্পায চক্খুমা;

ততো কাৰুণিকো সত্থা, ওৰোহিত্ৱা মহাযসো.

১০৩. ‘‘পটিগ্গণ্হি মম ভিক্খং, অনুকম্পায চক্খুমা;

পটিগ্গহেত্ৱা সম্বুদ্ধো, অকা মে অনুমোদনং.

১০৪. ‘‘‘সুখী হোতু মহাপুঞ্ঞ, গতি তুয্হং সমিজ্ঝতু;

ইমিনা ভিসদানেন, লভস্সু ৱিপুলং সুখং’.

১০৫. ‘‘ইদং ৱত্ৱান সম্বুদ্ধো, জলজুত্তমনামকো;

ভিক্খমাদায সম্বুদ্ধো, আকাসেনাগমা জিনো.

১০৬. ‘‘ততো ভিসং গহেত্ৱান, অগচ্ছিং মম অস্সমং;

ভিসং ৰুক্খে লগ্গেত্ৱান, মম দানং অনুস্সৰিং.

১০৭. ‘‘মহাৱাতো উট্ঠহিত্ৱা, সঞ্চালেসি ৱনং তদা;

আকাসো অভিনাদিত্থ, অসনী চ ফলী তদা.

১০৮. ‘‘ততো মে অসনীপাতো, মত্থকে নিপতী তদা;

সোহং নিসিন্নকো সন্তো, তত্থ কালঙ্কতো অহং.

১০৯. ‘‘পুঞ্ঞকম্মেন সঞ্ঞুত্তো, তুসিতং উপপজ্জহং;

কড়েৱৰং মে পতিতং, দেৱলোকে ৰমামহং.

১১০. ‘‘ছড়সীতিসহস্সানি, নাৰিযো সমলঙ্কতা;

সাযং পাতং উপট্ঠন্তি, ভিসদানস্সিদং ফলং.

১১১. ‘‘মনুস্সযোনিমাগন্ত্ৱা, সুখিতো হোমহং তদা;

ভোগা মে ঊনতা নত্থি, ভিসদানস্সিদং ফলং.

১১২. ‘‘অনুকম্পিতকো তেন, দেৱদেৱেন তাদিনা;

সব্বাসৱপৰিক্খীণা, নত্থি দানি পুনব্ভৱো.

১১৩. ‘‘সতসহস্সিতো কপ্পে, যং ভিসং অদদিং তদা;

দুগ্গতিং নাভিজানামি, ভিসদানস্সিদং ফলং.

১১৪. ‘‘কিলেসা ঝাপিতা ময্হং…পে… ৱিহৰামি অনাসৱো.

১১৫. ‘‘স্ৱাগতং ৱত মে আসি…পে… কতং বুদ্ধস্স সাসনং.

১১৬. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা ভদ্দজিত্থেৰো ইমা গাথাযো

অভাসিত্থাতি.

ভদ্দজিত্থেৰস্সাপদানং অট্ঠমং.