২. নদীকস্সপত্থেৰঅপদানং

২৯. ‘‘পদুমুত্তৰস্স ভগৱতো, লোকজেট্ঠস্স তাদিনো;

পিণ্ডচাৰং চৰন্তস্স, ৱাৰতো উত্তমং যসং;

অগ্গফলং গহেত্ৱান, অদাসিং সত্থুনো অহং.

৩০. ‘‘তেন কম্মেন দেৱিন্দো, লোকজেট্ঠো নৰাসভো;

সম্পত্তোম্হি অচলং ঠানং, হিত্ৱা জযপৰাজযং.

৩১. ‘‘সতসহস্সিতো কপ্পে, যং ফলং অদদিং তদা;

দুগ্গতিং নাভিজানামি, অগ্গদানস্সিদং ফলং.

৩২. ‘‘কিলেসা ঝাপিতা ময্হং…পে… ৱিহৰামি অনাসৱো.

৩৩. ‘‘স্ৱাগতং ৱত মে আসি…পে… কতং বুদ্ধস্স সাসনং.

৩৪. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা নদীকস্সপো থেৰো ইমা গাথাযো

অভাসিত্থাতি.

নদীকস্সপত্থেৰস্সাপদানং দুতিযং.