৩. গযাকস্সপত্থেৰঅপদানং

৩৫. ‘‘অজিনচম্মৱত্থোহং [অজিনৱত্তং নিৱত্তোহং (সী.)], খাৰিভাৰধৰো তদা;

খাৰিকং হাৰযিত্ৱান, কোলং অহাসি অস্সমং.

৩৬. ‘‘ভগৱা তম্হি সমযে, একো অদুতিযো জিনো;

মমস্সমং উপাগচ্ছি, জোতেন্তো সব্বকালিকং.

৩৭. ‘‘সকং চিত্তং পসাদেত্ৱা, অভিৱাদেত্ৱান সুব্বতং;

উভো হত্থেহি পগ্গয্হ, কোলং বুদ্ধস্সদাসহং.

৩৮. ‘‘একতিংসে ইতো কপ্পে, যং ফলং অদদিং তদা;

দুগ্গতিং নাভিজানামি, কোলদানস্সিদং ফলং.

৩৯. ‘‘কিলেসা ঝাপিতা ময্হং…পে… ৱিহৰামি অনাসৱো.

৪০. ‘‘স্ৱাগতং ৱত মে আসি…পে… কতং বুদ্ধস্স সাসনং.

৪১. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা গযাকস্সপো থেৰো ইমা গাথাযো

অভাসিত্থাতি.

গযাকস্সপত্থেৰস্সাপদানং ততিযং.