১০. উপৱানত্থেৰঅপদানং

১২২. ‘‘পদুমুত্তৰো নাম জিনো, সব্বধম্মান পাৰগূ;

জলিত্ৱা অগ্গিক্খন্ধোৱ, সম্বুদ্ধো পৰিনিব্বুতো.

১২৩. ‘‘মহাজনা সমাগম্ম, পূজযিত্ৱা তথাগতং;

চিতং কত্ৱান সুগতং, সৰীৰং অভিৰোপযুং.

১২৪. ‘‘সৰীৰকিচ্চং কত্ৱান, ধাতুং তত্থ সমানযুং;

সদেৱমনুস্সা সব্বে, বুদ্ধথূপং অকংসু তে.

১২৫. ‘‘পঠমা কঞ্চনমযা, দুতিযা চ মণিমযা;

ততিযা ৰূপিযমযা, চতুত্থী ফলিকামযা.

১২৬. ‘‘তত্থ পঞ্চমিকা চেৱ [তত্থ পঞ্চমিকা চেতি (সী.)], লোহিতঙ্কমযা অহু;

ছট্ঠা মসাৰগল্লস্স, সব্বং ৰতনমযূপৰি.

১২৭. ‘‘জঙ্ঘা মণিমযা আসি, ৱেদিকা ৰতনামযা;

সব্বসোণ্ণমযো থূপো, উদ্ধং যোজনমুগ্গতো.

১২৮. ‘‘দেৱা তত্থ সমাগন্ত্ৱা, একতো মন্তযুং তদা;

‘মযম্পি থূপং কস্সাম, লোকনাথস্স তাদিনো.

১২৯. ‘‘‘ধাতু আৱেণিকা নত্থি, সৰীৰং একপিণ্ডিতং;

ইমম্হি বুদ্ধথূপম্হি, কস্সাম কঞ্চুকং মযং’.

১৩০. ‘‘দেৱা সত্তহি ৰত্নেহি, অঞ্ঞং ৱড্ঢেসুং যোজনং;

থূপো দ্ৱিযোজনুব্বেধো, তিমিৰং ব্যপহন্তি সো.

১৩১. ‘‘নাগা তত্থ সমাগন্ত্ৱা, একতো মন্তযুং তদা;

‘মনুস্সা চেৱ দেৱা চ, বুদ্ধথূপং অকংসু তে.

১৩২. ‘‘‘মা নো পমত্তা অস্সুম্হ, অপ্পমত্তা সদেৱকা;

মযম্পি থূপং কস্সাম, লোকনাথস্স তাদিনো’.

১৩৩. ‘‘ইন্দনীলং মহানীলং, অথো জোতিৰসং মণিং;

একতো সন্নিপাতেত্ৱা, বুদ্ধথূপং অছাদযুং.

১৩৪. ‘‘সব্বং মণিমযং আসি, যাৱতা [তাৱতা (ক.)] বুদ্ধচেতিযং;

তিযোজনসমুব্বেধং, আলোককৰণং তদা.

১৩৫. ‘‘গৰুড়া চ সমাগন্ত্ৱা, একতো মন্তযুং তদা;

‘মনুস্সা দেৱনাগা চ, বুদ্ধপূজং অকংসু তে.

১৩৬. ‘‘‘মা নো পমত্তা অস্সুম্হ, অপ্পমত্তা সদেৱকা;

মযম্পি থূপং কস্সাম, লোকনাথস্স তাদিনো’.

১৩৭. ‘‘সব্বং মণিমযং থূপং, অকৰুং তে চ কঞ্চুকং;

যোজনং তেপি ৱড্ঢেসুং, আযতং বুদ্ধচেতিযং.

১৩৮. ‘‘চতুযোজনমুব্বেধো, বুদ্ধথূপো ৱিৰোচতি;

ওভাসেতি দিসা সব্বা, সতৰংসীৱ উগ্গতো.

১৩৯. ‘‘কুম্ভণ্ডা চ সমাগন্ত্ৱা, একতো মন্তযুং তদা;

‘মনুস্সা চেৱ দেৱা চ, নাগা চ গৰুড়া তথা.

১৪০. ‘‘‘পচ্চেকং বুদ্ধসেট্ঠস্স, অকংসু থূপমুত্তমং;

মা নো পমত্তা অস্সুম্হ, অপ্পমত্তা সদেৱকা.

১৪১. ‘‘‘মযম্পি থূপং কস্সাম, লোকনাথস্স তাদিনো;

ৰতনেহি ছাদেস্সাম, আযতং বুদ্ধচেতিযং’.

১৪২. ‘‘যোজনং তেপি ৱড্ঢেসুং, আযতং বুদ্ধচেতিযং;

পঞ্চযোজনমুব্বেধো, থূপো ওভাসতে তদা.

১৪৩. ‘‘যক্খা তত্থ সমাগন্ত্ৱা, একতো মন্তযুং তদা;

‘মনুস্সা দেৱনাগা চ, গৰুড়া চ কুম্ভণ্ডকা.

১৪৪. ‘‘‘পচ্চেকং বুদ্ধসেট্ঠস্স, অকংসু থূপমুত্তমং;

মা নো পমত্তা অস্সুম্হ, অপ্পমত্তা সদেৱকা.

১৪৫. ‘‘‘মযম্পি থূপং কস্সাম, লোকনাথস্স তাদিনো;

ফলিকা ছাদযিস্সাম, আযতং বুদ্ধচেতিযং’.

১৪৬. ‘‘যোজনং তেপি ৱড্ঢেসুং, আযতং বুদ্ধচেতিযং;

ছযোজনিকমুব্বেধো, থূপো ওভাসতে তদা.

১৪৭. ‘‘গন্ধব্বা চ সমাগন্ত্ৱা, একতো মন্তযুং তদা;

‘মনুজা দেৱতা নাগা, কুম্ভণ্ডা গৰুড়া তথা [কুম্ভণ্ডা চ যক্খা তথা (সী.)].

১৪৮. ‘‘‘সব্বে অকংসু বুদ্ধথূপং, মযমেত্থ অকাৰকা;

মযম্পি থূপং কস্সাম, লোকনাথস্স তাদিনো’.

১৪৯. ‘‘ৱেদিযো সত্ত কত্ৱান, ধজং ছত্তং অকংসু তে;

সব্বসোণ্ণমযং থূপং, গন্ধব্বা কাৰযুং তদা.

১৫০. ‘‘সত্তযোজনমুব্বেধো, থূপো ওভাসতে তদা;

ৰত্তিন্দিৱা ন ঞাযন্তি, আলোকো হোতি সব্বদা.

১৫১. ‘‘অভিভোন্তি ন তস্সাভা, চন্দসূৰা সতাৰকা;

সমন্তা যোজনসতে, পদীপোপি ন পজ্জলি.

১৫২. ‘‘তেন কালেন যে কেচি, থূপং পূজেন্তি মানুসা;

ন তে থূপং আৰুহন্তি, অম্বৰে উক্খিপন্তি তে.

১৫৩. ‘‘দেৱেহি ঠপিতো যক্খো, অভিসম্মতনামকো;

ধজং ৱা পুপ্ফদামং ৱা, অভিৰোপেতি উত্তৰিং.

১৫৪. ‘‘ন তে পস্সন্তি তং যক্খং, দামং পস্সন্তি গচ্ছতো;

এৱং পস্সিত্ৱা গচ্ছন্তা, সব্বে গচ্ছন্তি সুগ্গতিং.

১৫৫. ‘‘ৱিৰুদ্ধা যে পাৱচনে, পসন্না যে চ সাসনে;

পাটিহীৰং দট্ঠুকামা, থূপং পূজেন্তি মানুসা.

১৫৬. ‘‘নগৰে হংসৱতিযা, অহোসিং ভতকো তদা;

আমোদিতং জনং দিস্ৱা, এৱং চিন্তেসহং তদা.

১৫৭. ‘‘‘উড়াৰো ভগৱা নেসো, যস্স ধাতুঘৰে দিসং;

ইমা চ জনতা তুট্ঠা, কাৰং কুব্বং ন তপ্পৰে.

১৫৮. ‘‘‘অহম্পি কাৰং কস্সামি, লোকনাথস্স তাদিনো;

তস্স ধম্মেসু দাযাদো, ভৱিস্সামি অনাগতে’.

১৫৯. ‘‘সুধোতং ৰজকেনাহং, উত্তৰেয্যং পটং মম;

ৱেড়গ্গে আলগ্গেত্ৱান, ধজং উক্খিপিমম্বৰে.

১৬০. ‘‘অভিসম্মতকো গয্হ, অম্বৰে হাসি মে ধজং;

ৱাতেৰিতং ধজং দিস্ৱা, ভিয্যো হাসং জনেসহং.

১৬১. ‘‘তত্থ চিত্তং পসাদেত্ৱা, সমণং উপসঙ্কমিং;

তং ভিক্খুং অভিৱাদেত্ৱা, ৱিপাকং পুচ্ছহং ধজে.

১৬২. ‘‘সো মে কথেসি আনন্দী, পীতিসঞ্জননং মম;

‘তস্স ধজস্স ৱিপাকং, অনুভোস্সসি সব্বদা.

১৬৩. ‘‘‘হত্থিঅস্সৰথাপত্তী, সেনা চ চতুৰঙ্গিনী;

পৰিৱাৰেস্সন্তি তং নিচ্চং, ধজদানস্সিদং ফলং.

১৬৪. ‘‘‘সট্ঠিতুৰিযসহস্সানি, ভেৰিযো সমলঙ্কতা;

পৰিৱাৰেস্সন্তি তং নিচ্চং, ধজদানস্সিদং ফলং.

১৬৫. ‘‘‘ছড়সীতিসহস্সানি, নাৰিযো সমলঙ্কতা;

ৱিচিত্তৱত্থাভৰণা, আমুক্কমণিকুণ্ডলা.

১৬৬. ‘‘‘আড়াৰপম্হা হসুলা, সুসঞ্ঞা [সুত্থনা (সী.) অপ. থেৰ ২.৪৮.১৯ মণিপূজকত্থেৰাপদানেপি] তনুমজ্ঝিমা;

পৰিৱাৰেস্সন্তি তং নিচ্চং, ধজদানস্সিদং ফলং.

১৬৭. ‘‘‘তিংসকপ্পসহস্সানি, দেৱলোকে ৰমিস্সসি;

অসীতিক্খত্তুং দেৱিন্দো, দেৱৰজ্জং কৰিস্সসি.

১৬৮. ‘‘‘সহস্সক্খত্তুং ৰাজা চ, চক্কৱত্তী ভৱিস্সতি;

পদেসৰজ্জং ৱিপুলং, গণনাতো অসঙ্খিযং.

১৬৯. ‘‘‘কপ্পসতসহস্সম্হি, ওক্কাককুলসম্ভৱো;

গোতমো নাম গোত্তেন, সত্থা লোকে ভৱিস্সতি.

১৭০. ‘‘‘দেৱলোকা চৱিত্ৱান, সুক্কমূলেন চোদিতো;

পুঞ্ঞকম্মেন সঞ্ঞুত্তো, ব্ৰহ্মবন্ধু ভৱিস্সসি.

১৭১. ‘‘‘অসীতিকোটিং ছড্ডেত্ৱা, দাসে কম্মকৰে বহূ;

গোতমস্স ভগৱতো, সাসনে পব্বজিস্সসি.

১৭২. ‘‘‘আৰাধযিত্ৱা সম্বুদ্ধং, গোতমং সক্যপুঙ্গৱং;

উপৱানোতি নামেন, হেস্সসি সত্থু সাৱকো’.

১৭৩. ‘‘সতসহস্সে কতং কম্মং, ফলং দস্সেসি মে ইধ;

সুমুত্তো সৰৱেগোৱ, কিলেসে ঝাপযিং [কিলেসা ঝাপিতা (সী.)] মম.

১৭৪. ‘‘চক্কৱত্তিস্স সন্তস্স, চাতুদ্দীপিস্সৰস্স মে;

তীণি যোজনানি সামন্তা, উস্সীযন্তি ধজা সদা.

১৭৫. ‘‘সতসহস্সিতো কপ্পে, যং কম্মমকৰিং তদা;

দুগ্গতিং নাভিজানামি, ধজদানস্সিদং ফলং.

১৭৬. ‘‘কিলেসা ঝাপিতা ময্হং…পে… ৱিহৰামি অনাসৱো.

১৭৭. ‘‘স্ৱাগতং ৱত মে আসি…পে… কতং বুদ্ধস্স সাসনং.

১৭৮. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা উপৱানত্থেৰো ইমা গাথাযো

অভাসিত্থাতি.

উপৱানত্থেৰস্সাপদানং দসমং.