১১. ৰট্ঠপালত্থেৰঅপদানং

১৭৯. ‘‘পদুমুত্তৰস্স ভগৱতো, লোকজেট্ঠস্স তাদিনো;

ৱৰনাগো মযা দিন্নো, ঈসাদন্তো উৰূড়্হৱা.

১৮০. ‘‘সেতচ্ছত্তোপসোভিতো, সকপ্পনো [সীদব্বনো (সী.)] সহত্থিপো;

অগ্ঘাপেত্ৱান তং সব্বং, সঙ্ঘাৰামং অকাৰযিং.

১৮১. ‘‘চতুপঞ্ঞাসসহস্সানি, পাসাদে কাৰযিং অহং;

মহোঘদানং [মহগ্ঘঞ্চ (সী.), মযা ভত্তং (ক.) অপ. থেৰ ১.২.৯৯] কৰিত্ৱান, নিয্যাদেসিং মহেসিনো.

১৮২. ‘‘অনুমোদি মহাৱীৰো, সযম্ভূ অগ্গপুগ্গলো;

সব্বে জনে হাসযন্তো, দেসেসি অমতং পদং.

১৮৩. ‘‘তং মে বুদ্ধো ৱিযাকাসি, জলজুত্তমনামকো;

ভিক্খুসঙ্ঘে নিসীদিত্ৱা, ইমা গাথা অভাসথ.

১৮৪. ‘‘‘চতুপঞ্ঞাসসহস্সানি, পাসাদে কাৰযী অযং;

কথযিস্সামি ৱিপাকং, সুণাথ মম ভাসতো.

১৮৫. ‘‘‘অট্ঠাৰসসহস্সানি, কূটাগাৰা ভৱিস্সৰে;

ব্যম্হুত্তমম্হি নিব্বত্তা, সব্বসোণ্ণমযা চ তে.

১৮৬. ‘‘‘পঞ্ঞাসক্খত্তুং দেৱিন্দো, দেৱৰজ্জং কৰিস্সতি;

অট্ঠপঞ্ঞাসক্খত্তুঞ্চ, চক্কৱত্তী ভৱিস্সতি.

১৮৭. ‘‘‘কপ্পসতসহস্সম্হি, ওক্কাককুলসম্ভৱো;

গোতমো নাম গোত্তেন, সত্থা লোকে ভৱিস্সতি.

১৮৮. ‘‘‘দেৱলোকা চৱিত্ৱান, সুক্কমূলেন চোদিতো;

অড্ঢে কুলে মহাভোগে, নিব্বত্তিস্সতি তাৱদে.

১৮৯. ‘‘‘সো পচ্ছা পব্বজিত্ৱান, সুক্কমূলেন চোদিতো;

ৰট্ঠপালোতি নামেন, হেস্সতি সত্থু সাৱকো.

১৯০. ‘‘‘পধানপহিতত্তো সো, উপসন্তো নিৰূপধি;

সব্বাসৱে পৰিঞ্ঞায, নিব্বাযিস্সতিনাসৱো’.

১৯১. ‘‘উট্ঠায অভিনিক্খম্ম, জহিতা ভোগসম্পদা;

খেড়পিণ্ডেৱ ভোগম্হি, পেমং ময্হং ন ৱিজ্জতি.

১৯২. ‘‘ৱীৰিযং মে ধুৰধোৰয্হং, যোগক্খেমাধিৱাহনং;

ধাৰেমি অন্তিমং দেহং, সম্মাসম্বুদ্ধসাসনে.

১৯৩. ‘‘কিলেসা ঝাপিতা ময্হং…পে… ৱিহৰামি অনাসৱো.

১৯৪. ‘‘স্ৱাগতং ৱত মে আসি…পে… কতং বুদ্ধস্স সাসনং.

১৯৫. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা ৰট্ঠপালো থেৰো ইমা গাথাযো

অভাসিত্থাতি.

ৰট্ঠপালত্থেৰস্সাপদানং একাদসমং.

যসৱগ্গো ছপঞ্ঞাসমো.