১. যসত্থেৰঅপদানং

১. ‘‘মহাসমুদ্দং ওগ্গয্হ, ভৱনং মে সুনিম্মিতং;

সুনিম্মিতা পোক্খৰণী, চক্কৱাকূপকূজিতা.

২. ‘‘মন্দাৰকেহি সঞ্ছন্না, পদুমুপ্পলকেহি চ;

নদী চ সন্দতে তত্থ, সুপতিত্থা মনোৰমা.

৩. ‘‘মচ্ছকচ্ছপসঞ্ছন্না, নানাদিজসমোত্থটা [নানামিগসমোত্থটা (স্যা.)];

মযূৰকোঞ্চাভিৰুদা, কোকিলাদীহি ৱগ্গুহি.

৪. ‘‘পাৰেৱতা ৰৱিহংসা, চক্কৱাকা নদীচৰা;

তিত্তিৰা সাড়িকা চেত্থ, পাৱকা [সম্বকা (ক.)] জীৱংজীৱকা.

৫. ‘‘হংসাকোঞ্চাভিনদিতা, কোসিযা পিঙ্গলা [পিঙ্গলী (সী.), সিঙ্গলী, সিঙ্ঘলী (ক.)] বহূ;

সত্তৰতনসম্পন্না, মণিমুত্তপৱাড়িকা.

৬. ‘‘সব্বে সোণ্ণমযা ৰুক্খা, নানাখন্ধসমেৰিতা;

উজ্জোতেন্তি দিৱাৰত্তিং, ভৱনং সব্বকালিকং.

৭. ‘‘সট্ঠিতুৰিযসহস্সানি, সাযং পাতো পৱজ্জৰে;

সোড়সিত্থিসহস্সানি, পৰিৱাৰেন্তি মং সদা.

৮. ‘‘অভিনিক্খম্ম ভৱনা, সুমেধং লোকনাযকং;

পসন্নচিত্তো সুমনো, ৱন্দযিং তং [সব্বদস্সিং (ক.)] মহাযসং.

৯. ‘‘সম্বুদ্ধং অভিৱাদেত্ৱা, সসঙ্ঘং তং নিমন্তযিং;

অধিৱাসেসি সো ধীৰো, সুমেধো লোকনাযকো.

১০. ‘‘মম ধম্মকথং কত্ৱা, উয্যোজেসি মহামুনি;

সম্বুদ্ধং অভিৱাদেত্ৱা, ভৱনং মে উপাগমিং.

১১. ‘‘আমন্তযিং পৰিজনং, সব্বে সন্নিপতুং তদা;

‘পুব্বণ্হসমযং বুদ্ধো, ভৱনং আগমিস্সতি’.

১২. ‘‘‘লাভা অম্হং সুলদ্ধা নো, যে ৱসাম তৱন্তিকে;

মযম্পি বুদ্ধসেট্ঠস্স, পূজযিস্সাম সত্থুনো’.

১৩. ‘‘অন্নং পানং পট্ঠপেত্ৱা, কালং আৰোচযিং অহং;

ৱসীসতসহস্সেহি, উপেসি লোকনাযকো.

১৪. ‘‘পঞ্চঙ্গিকেহি তুৰিযেহি, পচ্চুগ্গমমকাসহং;

সব্বসোণ্ণমযে পীঠে, নিসীদি পুৰিসুত্তমো.

১৫. ‘‘উপৰিচ্ছদনং আসি, সব্বসোণ্ণমযং তদা;

বীজনীযো পৱাযন্তি, ভিক্খুসঙ্ঘং অনুত্তৰং.

১৬. ‘‘পহূতেনন্নপানেন, ভিক্খুসঙ্ঘং অতপ্পযিং;

পচ্চেকদুস্সযুগলে, ভিক্খুসঙ্ঘস্সদাসহং.

১৭. ‘‘যং ৱদেতি সুমেধো সো, আহুতীনং পটিগ্গহো;

ভিক্খুসঙ্ঘে নিসীদিত্ৱা, ইমা গাথা অভাসথ.

১৮. ‘‘‘যো মং অন্নেন পানেন, সব্বে ইমে চ তপ্পযি;

তমহং কিত্তযিস্সামি, সুণাথ মম ভাসতো.

১৯. ‘‘‘অট্ঠাৰসে কপ্পসতে, দেৱলোকে ৰমিস্সতি;

সহস্সক্খত্তুং ৰাজাযং, চক্কৱত্তী ভৱিস্সতি.

২০. ‘‘‘উপগচ্ছতি যং যোনিং, দেৱত্তং অথ মানুসং;

সব্বসোণ্ণমযং তস্স, ছদনং ধাৰযিস্সতি.

২১. ‘‘‘তিংসকপ্পসহস্সম্হি, ওক্কাককুলসম্ভৱো;

গোতমো নাম গোত্তেন, সত্থা লোকে ভৱিস্সতি.

২২. ‘‘‘তস্স ধম্মেসু দাযাদো, ওৰসো ধম্মনিম্মিতো;

সব্বাসৱে পৰিঞ্ঞায, নিব্বাযিস্সতিনাসৱো.

২৩. ‘‘‘ভিক্খুসঙ্ঘে নিসীদিত্ৱা, সীহনাদং নদিস্সতি’;

চিতকে ছত্তং ধাৰেন্তি, হেট্ঠা ছত্তম্হি ডয্হথ.

২৪. ‘‘সামঞ্ঞং মে অনুপ্পত্তং, কিলেসা ঝাপিতা মযা;

মণ্ডপে ৰুক্খমূলে ৱা, সন্তাসো মে ন ৱিজ্জতি.

২৫. ‘‘তিংসকপ্পসহস্সম্হি, যং দানমদদিং তদা;

দুগ্গতিং নাভিজানামি, সব্বদানস্সিদং ফলং.

২৬. ‘‘কিলেসা ঝাপিতা ময্হং, ভৱা সব্বে সমূহতা;

নাগোৱ বন্ধনং ছেত্ৱা, ৱিহৰামি অনাসৱো.

২৭. ‘‘স্ৱাগতং ৱত মে আসি, মম বুদ্ধস্স সন্তিকে;

তিস্সো ৱিজ্জা অনুপ্পত্তা, কতং বুদ্ধস্স সাসনং.

২৮. ‘‘পটিসম্ভিদা চতস্সো, ৱিমোক্খাপি চ অট্ঠিমে;

ছড়ভিঞ্ঞা সচ্ছিকতা, কতং বুদ্ধস্স সাসনং’’.

ইত্থং সুদং আযস্মা যসো থেৰো ইমা গাথাযো অভাসিত্থাতি.

যসত্থেৰস্সাপদানং পঠমং.