৯. ৱনৱচ্ছত্থেৰঅপদানং

২৫১. ‘‘ইমম্হি ভদ্দকে কপ্পে, ব্ৰহ্মবন্ধু মহাযসো;

কস্সপো নাম গোত্তেন, উপ্পজ্জি ৱদতং ৱৰো.

২৫২. ‘‘তদাহং পব্বজিত্ৱান, তস্স বুদ্ধস্স সাসনে;

যাৱজীৱং চৰিত্ৱান, ব্ৰহ্মচাৰং ততো চুতো.

২৫৩. ‘‘তেন কম্মেন সুকতেন, চেতনাপণিধীহি চ;

জহিত্ৱা মানুসং দেহং, তাৱতিংসমগচ্ছহং.

২৫৪. ‘‘ততো চুতো অৰঞ্ঞম্হি, কপোতো আসহং তহিং;

ৱসতে গুণসম্পন্নো, ভিক্খু ঝানৰতো সদা.

২৫৫. ‘‘মেত্তচিত্তো কাৰুণিকো, সদা পমুদিতাননো;

উপেক্খকো মহাৱীৰো, অপ্পমঞ্ঞাসু কোৱিদো.

২৫৬. ‘‘ৱিনীৱৰণসঙ্কপ্পে, সব্বসত্তহিতাসযে;

ৱিসট্ঠো নচিৰেনাসিং, তস্মিং সুগতসাৱকে.

২৫৭. ‘‘উপেচ্চ পাদমূলম্হি, নিসিন্নস্স তদাস্সমে;

কদাচি সামিসং দেতি, ধম্মং দেসেসি চেকদা.

২৫৮. ‘‘তদা ৱিপুলপেমেন, উপাসিত্ৱা জিনত্ৰজং;

ততো চুতো গতো সগ্গং, পৱাসো সঘৰং যথা.

২৫৯. ‘‘সগ্গা চুতো মনুস্সেসু, নিব্বত্তো পুঞ্ঞকম্মুনা;

অগাৰং ছড্ডযিত্ৱান, পব্বজিং বহুসো অহং.

২৬০. ‘‘সমণো তাপসো ৱিপ্পো, পৰিব্বজো তথেৱহং;

হুত্ৱা ৱসিং অৰঞ্ঞম্হি, অনেকসতসো অহং.

২৬১. ‘‘পচ্ছিমে চ ভৱে দানি, ৰম্মে কপিলৱত্থৱে;

ৱচ্ছগোত্তো দিজো তস্স, জাযায অহমোক্কমিং.

২৬২. ‘‘মাতু মে দোহড়ো আসি, তিৰোকুচ্ছিগতস্স মে;

জাযমানসমীপম্হি, ৱনৱাসায নিচ্ছযো.

২৬৩. ‘‘ততো মে অজনী মাতা, ৰমণীযে ৱনন্তৰে;

গব্ভতো নিক্খমন্তং মং, কাসাযেন পটিগ্গহুং.

২৬৪. ‘‘ততো কুমাৰো সিদ্ধত্থো, জাতো সক্যকুলদ্ধজো;

তস্স মিত্তো পিযো আসিং, সংৱিসট্ঠো সুমানিযো.

২৬৫. ‘‘সত্তসাৰেভিনিক্খন্তে, ওহায ৱিপুলং যসং;

অহম্পি পব্বজিত্ৱান, হিমৱন্তমুপাগমিং.

২৬৬. ‘‘ৱনালযং ভাৱনীযং, কস্সপং ধুতৱাদিকং;

দিস্ৱা সুত্ৱা জিনুপ্পাদং, উপেসিং নৰসাৰথিং.

২৬৭. ‘‘সো মে ধম্মমদেসেসি, সব্বত্থং সম্পকাসযং;

ততোহং পব্বজিত্ৱান, ৱনমেৱ পুনাগমং [পুনাগমিং (সী. পী.), পুনোক্কমং (স্যা.)].

২৬৮. ‘‘তত্থাপ্পমত্তো ৱিহৰং, ছড়ভিঞ্ঞা অফস্সযিং [অপস্সযিং (স্যা. ক.)];

অহো সুলদ্ধলাভোম্হি, সুমিত্তেনানুকম্পিতো.

২৬৯. ‘‘কিলেসা ঝাপিতা ময্হং…পে… ৱিহৰামি অনাসৱো.

২৭০. ‘‘স্ৱাগতং ৱত মে আসি…পে… কতং বুদ্ধস্স সাসনং.

২৭১. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা ৱনৱচ্ছো থেৰো ইমা গাথাযো

অভাসিত্থাতি.

ৱনৱচ্ছত্থেৰস্সাপদানং নৱমং.