১০. চূড়সুগন্ধত্থেৰঅপদানং

২৭২. ‘‘ইমম্হি ভদ্দকে কপ্পে, ব্ৰহ্মবন্ধু মহাযসো;

কস্সপো নাম গোত্তেন, উপ্পজ্জি ৱদতং ৱৰো.

২৭৩. ‘‘অনুব্যঞ্জনসম্পন্নো, বাত্তিংসৱৰলক্খণো;

ব্যামপ্পভাপৰিৱুতো, ৰংসিজালসমোত্থটো.

২৭৪. ‘‘অস্সাসেতা যথা চন্দো, সূৰিযোৱ পভঙ্কৰো;

নিব্বাপেতা যথা মেঘো, সাগৰোৱ গুণাকৰো.

২৭৫. ‘‘ধৰণীৰিৱ সীলেন, হিমৱাৱ সমাধিনা;

আকাসো ৱিয পঞ্ঞায, অসঙ্গো অনিলো যথা.

২৭৬. ‘‘তদাহং বাৰাণসিযং, উপপন্নো মহাকুলে;

পহূতধনধঞ্ঞস্মিং, নানাৰতনসঞ্চযে.

২৭৭. ‘‘মহতা পৰিৱাৰেন, নিসিন্নং লোকনাযকং;

উপেচ্চ ধম্মমস্সোসিং, অমতংৱ মনোহৰং.

২৭৮. ‘‘দ্ৱত্তিংসলক্খণধৰো, সনক্খত্তোৱ চন্দিমা;

অনুব্যঞ্জনসম্পন্নো, সালৰাজাৱ ফুল্লিতো.

২৭৯. ‘‘ৰংসিজালপৰিক্খিত্তো, দিত্তোৱ কনকাচলো;

ব্যামপ্পভাপৰিৱুতো, সতৰংসী দিৱাকৰো.

২৮০. ‘‘সোণ্ণাননো জিনৱৰো, সমণীৱ [ৰম্মণীৱ (স্যা.)] সিলুচ্চযো;

কৰুণাপুণ্ণহদযো, গুণেন ৱিয সাগৰো.

২৮১. ‘‘লোকৱিস্সুতকিত্তি চ, সিনেৰূৱ নগুত্তমো;

যসসা ৱিত্থতো ৱীৰো, আকাসসদিসো মুনি.

২৮২. ‘‘অসঙ্গচিত্তো সব্বত্থ, অনিলো ৱিয নাযকো;

পতিট্ঠা সব্বভূতানং, মহীৱ মুনিসত্তমো.

২৮৩. ‘‘অনুপলিত্তো লোকেন, তোযেন পদুমং যথা;

কুৱাদগচ্ছদহনো, অগ্গিখন্ধোৱ সোভসি [সোভতি (সী.), সো ৱসি (স্যা. ক.)].

২৮৪. ‘‘অগধো ৱিয সব্বত্থ, কিলেসৱিসনাসকো;

গন্ধমাদনসেলোৱ, গুণগন্ধৱিভূসিতো.

২৮৫. ‘‘গুণানং আকৰো ৱীৰো, ৰতনানংৱ সাগৰো;

সিন্ধূৱ ৱনৰাজীনং, কিলেসমলহাৰকো.

২৮৬. ‘‘ৱিজযীৱ মহাযোধো, মাৰসেনাৱমদ্দনো;

চক্কৱত্তীৱ সো ৰাজা, বোজ্ঝঙ্গৰতনিস্সৰো.

২৮৭. ‘‘মহাভিসক্কসঙ্কাসো, দোসব্যাধিতিকিচ্ছকো;

সল্লকত্তো যথা ৱেজ্জো, দিট্ঠিগণ্ডৱিফালকো.

২৮৮. ‘‘সো তদা লোকপজ্জোতো, সনৰামৰসক্কতো;

পৰিসাসু নৰাদিচ্চো, ধম্মং দেসযতে জিনো.

২৮৯. ‘‘দানং দত্ৱা মহাভোগো, সীলেন সুগতূপগো;

ভাৱনায চ নিব্বাতি, ইচ্চেৱমনুসাসথ.

২৯০. ‘‘দেসনং তং মহস্সাদং, আদিমজ্ঝন্তসোভণং;

সুণন্তি পৰিসা সব্বা, অমতংৱ মহাৰসং.

২৯১. ‘‘সুত্ৱা সুমধুৰং ধম্মং, পসন্নো জিনসাসনে;

সুগতং সৰণং গন্ত্ৱা, যাৱজীৱং নমস্সহং.

২৯২. ‘‘মুনিনো গন্ধকুটিযা, ওপুঞ্জেসিং [উব্বট্টেসিং (স্যা.)] তদা মহিং;

চতুজ্জাতেন গন্ধেন, মাসে অট্ঠ দিনেস্ৱহং.

২৯৩. ‘‘পণিধায সুগন্ধত্তং, সৰীৰৱিস্সগন্ধিনো [সৰীৰস্স ৱিগন্ধিনো (সী. স্যা. পী.)];

তদা জিনো ৱিযাকাসি, সুগন্ধতনুলাভিতং.

২৯৪. ‘‘‘যো যং গন্ধকুটিভূমিং, গন্ধেনোপুঞ্জতে সকিং;

তেন কম্মৱিপাকেন, উপপন্নো তহিং তহিং.

২৯৫. ‘‘‘সুগন্ধদেহো সব্বত্থ, ভৱিস্সতি অযং নৰো;

গুণগন্ধযুত্তো হুত্ৱা, নিব্বাযিস্সতিনাসৱো’.

২৯৬. ‘‘তেন কম্মেন সুকতেন, চেতনাপণিধীহি চ;

জহিত্ৱা মানুসং দেহং, তাৱতিংসমগচ্ছহং.

২৯৭. ‘‘পচ্ছিমে চ ভৱে দানি, জাতো ৱিপ্পকুলে অহং;

গব্ভং মে ৱসতো মাতা, দেহেনাসি সুগন্ধিতা.

২৯৮. ‘‘যদা চ মাতুকুচ্ছিম্হা, নিক্খমামি তদা পুৰী [পুৰং (স্যা. ক.)];

সাৱত্থিসব্বগন্ধেহি, ৱাসিতা ৱিয ৱাযথ.

২৯৯. ‘‘পুপ্ফৱস্সঞ্চ সুৰভি, দিব্বগন্ধং মনোৰমং;

ধূপানি চ মহগ্ঘানি, উপৱাযিংসু তাৱদে.

৩০০. ‘‘দেৱা চ সব্বগন্ধেহি, ধূপপুপ্ফেহি তং ঘৰং;

ৱাসযিংসু সুগন্ধেন, যস্মিং জাতো অহং ঘৰে.

৩০১. ‘‘যদা চ তৰুণো ভদ্দো, পঠমে যোব্বনে ঠিতো;

তদা সেলং [সেসং (স্যা.)] সপৰিসং, ৱিনেত্ৱা নৰসাৰথি.

৩০২. ‘‘তেহি সব্বেহি পৰিৱুতো [সহিতো (সী. স্যা. পী.)], সাৱত্থিপুৰমাগতো;

তদা বুদ্ধানুভাৱং তং, দিস্ৱা পব্বজিতো অহং.

৩০৩. ‘‘সীলং সমাধিপঞ্ঞঞ্চ, ৱিমুত্তিঞ্চ অনুত্তৰং;

ভাৱেত্ৱা চতুৰো ধম্মে, পাপুণিং আসৱক্খযং.

৩০৪. ‘‘যদা পব্বজিতো চাহং, যদা চ অৰহা অহুং;

নিব্বাযিস্সং যদা চাহং, গন্ধৱস্সো তদা অহু.

৩০৫. ‘‘সৰীৰগন্ধো চ সদাতিসেতি [সদা ৱাসেতি (ক.)] মে, মহাৰহং চন্দনচম্পকুপ্পলং;

তথেৱ গন্ধে ইতৰে চ সব্বসো, পসয্হ ৱাযামি ততো তহিং [যহিং (স্যা.)] তহিং.

৩০৬. ‘‘কিলেসা ঝাপিতা ময্হং…পে… ৱিহৰামি অনাসৱো.

৩০৭. ‘‘স্ৱাগতং ৱত মে আসি…পে… কতং বুদ্ধস্স সাসনং.

৩০৮. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা চূড়সুগন্ধো থেৰো ইমা গাথাযো অভাসিত্থাতি;

চূড়সুগন্ধত্থেৰস্সাপদানং দসমং.

ভদ্দিযৱগ্গো পঞ্চপঞ্ঞাসমো.