৮. লোমসকঙ্গিযত্থেৰঅপদানং

২২৫. ‘‘ইমম্হি ভদ্দকে কপ্পে, ব্ৰহ্মবন্ধু মহাযসো;

কস্সপো নাম গোত্তেন, উপ্পজ্জি ৱদতং ৱৰো.

২২৬. ‘‘তদাহং চন্দনো চেৱ, পব্বজিত্ৱান সাসনে;

আপাণকোটিকং ধম্মং, পূৰযিত্ৱান সাসনে.

২২৭. ‘‘ততো চুতা সন্তুসিতং, উপপন্না উভো মযং;

তত্থ দিব্বেহি নচ্চেহি, গীতেহি ৱাদিতেহি চ.

২২৮. ‘‘ৰূপাদিদসহঙ্গেহি, অভিভোত্ৱান সেসকে;

যাৱতাযুং ৱসিত্ৱান, অনুভোত্ৱা মহাসুখং.

২২৯. ‘‘ততো চৱিত্ৱা তিদসং, চন্দনো উপপজ্জথ;

অহং কপিলৱত্থুস্মিং, অজাযিং সাকিযত্ৰজো.

২৩০. ‘‘যদা উদাযিত্থেৰেন, অজ্ঝিট্ঠো লোকনাযকো;

অনুকম্পিয সক্যানং, উপেসি কপিলৱ্হযং.

২৩১. ‘‘তদাতিমানিনো সক্যা, ন বুদ্ধস্স গুণঞ্ঞুনো;

পণমন্তি ন সম্বুদ্ধং, জাতিথদ্ধা অনাদৰা.

২৩২. ‘‘তেসং সঙ্কপ্পমঞ্ঞায, আকাসে চঙ্কমী জিনো;

পজ্জুন্নো ৱিয ৱস্সিত্থ, পজ্জলিত্থ যথা সিখী.

২৩৩. ‘‘দস্সেত্ৱা ৰূপমতুলং, পুন অন্তৰধাযথ;

একোপি হুত্ৱা বহুধা, অহোসি পুনৰেককো.

২৩৪. ‘‘অন্ধকাৰং পকাসঞ্চ, দস্সযিত্ৱা অনেকধা;

পাটিহেৰং কৰিত্ৱান, ৱিনযী ঞাতকে মুনি.

২৩৫. ‘‘চাতুদ্দীপো মহামেঘো, তাৱদেৱ পৱস্সথ;

তদা হি জাতকং বুদ্ধো, ৱেস্সন্তৰমদেসযি.

২৩৬. ‘‘তদা তে খত্তিযা সব্বে, নিহন্ত্ৱা জাতিজং মদং;

উপেসুং সৰণং বুদ্ধং, আহ সুদ্ধোদনো তদা.

২৩৭. ‘‘‘ইদং ততিযং তৱ ভূৰিপঞ্ঞ, পাদানি ৱন্দামি সমন্তচক্খু;

যদাভিজাতো পথৱী পকম্পযী, যদা চ তং নজ্জহি জম্বুছাযা’.

২৩৮. ‘‘তদা বুদ্ধানুভাৱং তং, দিস্ৱা ৱিম্হিতমানসো;

পব্বজিত্ৱান তত্থেৱ, নিৱসিং মাতুপূজকো.

২৩৯. ‘‘চন্দনো দেৱপুত্তো মং, উপগন্ত্ৱানুপুচ্ছথ;

ভদ্দেকৰত্তস্স তদা, সঙ্খেপৱিত্থাৰং নযং.

২৪০. ‘‘চোদিতোহং তদা তেন, উপেচ্চ নৰনাযকং;

ভদ্দেকৰত্তং সুত্ৱান, সংৱিগ্গো ৱনমামকো.

২৪১. ‘‘তদা মাতৰমপুচ্ছিং, ৱনে ৱচ্ছামি এককো;

সুখুমালোতি মে মাতা, ৱাৰযী তং [তে (স্যা. পী. ক.)] তদা ৱচং.

২৪২. ‘‘কাসং [দব্বং (সী. স্যা. পী.)] কুসং পোটকিলং, উসীৰং মুঞ্জপব্বজং [মুঞ্জবব্বজং (সী. পী.)];

উৰসা পনুদিস্সামি, ৱিৱেকমনুব্ৰূহযং.

২৪৩. ‘‘তদা ৱনং পৱিট্ঠোহং, সৰিত্ৱা জিনসাসনং;

ভদ্দেকৰত্তওৱাদং, অৰহত্তমপাপুণিং.

২৪৪. ‘‘‘অতীতং নান্ৱাগমেয্য, নপ্পটিকঙ্খে অনাগতং;

যদতীতং পহীনং তং, অপ্পত্তঞ্চ অনাগতং.

২৪৫. ‘‘‘পচ্চুপ্পন্নঞ্চ যো ধম্মং, তত্থ তত্থ ৱিপস্সতি;

অসংহীৰং অসংকুপ্পং, তং ৱিদ্ৱা মনুব্ৰূহযে.

২৪৬. ‘‘‘অজ্জেৱ কিচ্চমাতপ্পং, কো জঞ্ঞা মৰণং সুৱে;

ন হি নো সঙ্গৰং [সঙ্কৰং (ক.)] তেন, মহাসেনেন মচ্চুনা.

২৪৭. ‘‘‘এৱংৱিহাৰিং আতাপিং, অহোৰত্তমতন্দিতং;

তং ৱে ভদ্দেকৰত্তোতি, সন্তো আচিক্খতে মুনি’.

২৪৮. ‘‘কিলেসা ঝাপিতা ময্হং…পে… ৱিহৰামি অনাসৱো.

২৪৯. ‘‘স্ৱাগতং ৱত মে আসি…পে… কতং বুদ্ধস্স সাসনং.

২৫০. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা লোমসকঙ্গিযো [লোমসঙ্খিযো (স্যা. ক.)] থেৰো ইমা গাথাযো

অভাসিত্থাতি.

লোমসকঙ্গিযত্থেৰস্সাপদানং অট্ঠমং.