৭. অভযত্থেৰঅপদানং

১৯৫. ‘‘পদুমুত্তৰো নাম জিনো, সব্বধম্মেসু চক্খুমা;

ইতো সতসহস্সম্হি, কপ্পে উপ্পজ্জি নাযকো.

১৯৬. ‘‘সৰণগমনে কিঞ্চি, নিৱেসেসি তথাগতো;

কিঞ্চি সীলে নিৱেসেসি, দসকম্মপথুত্তমে.

১৯৭. ‘‘দেতি কস্সচি সো ৱীৰো, সামঞ্ঞফলমুত্তমং;

সমাপত্তী তথা অট্ঠ, তিস্সো ৱিজ্জা পৱচ্ছতি.

১৯৮. ‘‘ছড়ভিঞ্ঞাসু যোজেসি, কিঞ্চি সত্তং নৰুত্তমো;

দেতি কস্সচি নাথো সো, চতস্সো পটিসম্ভিদা.

১৯৯. ‘‘বোধনেয্যং পজং দিস্ৱা, অসঙ্খেয্যম্পি যোজনং [অসঙ্খেয্যেপি যোজনে সী. স্যা. পী.)];

খণেন উপগন্ত্ৱান, ৱিনেতি নৰসাৰথি.

২০০. ‘‘তদাহং হংসৱতিযং, অহোসিং ব্ৰাহ্মণত্ৰজো;

পাৰগূ সব্বৱেদানং, ৱেয্যাকৰণসম্মতো.

২০১. ‘‘নিৰুত্তিযা চ কুসলো, নিঘণ্ডুম্হি ৱিসাৰদো;

পদকো কেটুভৱিদূ, ছন্দোৱিচিতিকোৱিদো.

২০২. ‘‘জঙ্ঘাৱিহাৰং ৱিচৰং, হংসাৰামমুপেচ্চহং;

অদ্দসং ৱৰদং [ৱদতং (সী. পী.), পৱৰং (স্যা.)] সেট্ঠং, মহাজনপুৰক্খতং.

২০৩. ‘‘দেসেন্তং ৱিৰজং ধম্মং, পচ্চনীকমতী অহং;

উপেত্ৱা তস্স কল্যাণং, সুত্ৱান ৱিমলং অহং [ৱাক্যানি, সুত্ৱান ৱিমলানহং (সী. স্যা. পী.)].

২০৪. ‘‘ব্যাহতং পুনৰুত্তং ৱা, অপত্থং ৱা নিৰত্থকং;

নাদ্দসং তস্স মুনিনো, ততো পব্বজিতো অহং.

২০৫. ‘‘নচিৰেনেৱ কালেন, সব্বসত্তৱিসাৰদো;

নিপুণো বুদ্ধৱচনে, অহোসিং গুণিসম্মতো.

২০৬. ‘‘তদা চতস্সো গাথাযো, গন্থযিত্ৱা সুব্যঞ্জনা;

সন্থৱিত্ৱা তিলোকগ্গং, দেসযিস্সং দিনে দিনে.

২০৭. ‘‘ৱিৰত্তোসি মহাৱীৰো, সংসাৰে সভযে ৱসং;

কৰুণায ন নিব্বাযি, ততো কাৰুণিকো মুনি.

২০৮. ‘‘পুথুজ্জনো ৱযো সন্তো, ন কিলেসৱসো অহু;

সম্পজানো সতিযুত্তো, তস্মা এসো অচিন্তিযো.

২০৯. ‘‘দুব্বলানি কিলেসানি, যস্সাসযগতানি মে;

ঞাণগ্গিপৰিদড্ঢানি, ন খীযিংসু তমব্ভুতং.

২১০. ‘‘যো সব্বলোকস্স গৰু, লোকো [লোকে (স্যা. ক.)] যস্স তথা গৰু;

তথাপি লোকাচৰিযো, লোকো তস্সানুৱত্তকো.

২১১. ‘‘এৱমাদীহি সম্বুদ্ধং, কিত্তযং ধম্মদেসনং;

যাৱজীৱং কৰিত্ৱান, গতো সগ্গং ততো চুতো.

২১২. ‘‘সতসহস্সিতো কপ্পে, যং বুদ্ধমভিকিত্তযিং;

দুগ্গতিং নাভিজানামি, কিত্তনায ইদং ফলং.

২১৩. ‘‘দেৱলোকে মহাৰজ্জং, পাদেসিং কঞ্চনগ্ঘিযং [দিব্বানুভোজহং তদা (স্যা.), ৰজ্জং পাদেসি কংচযং (সী.)];

চক্কৱত্তী মহাৰজ্জং, বহুসোনুভৱিং অহং.

২১৪. ‘‘দুৱে ভৱে পজাযামি, দেৱত্তে অথ মানুসে;

অঞ্ঞং গতিং ন জানামি, কিত্তনায ইদং ফলং.

২১৫. ‘‘দুৱে কুলে পজাযামি, খত্তিযে অথ ব্ৰাহ্মণে;

নীচে কুলে ন জাযামি, কিত্তনায ইদং ফলং.

২১৬. ‘‘পচ্ছিমে চ ভৱে দানি, গিৰিব্বজপুৰুত্তমে;

ৰঞ্ঞোহং বিম্বিসাৰস্স, পুত্তো নামেন চাভযো.

২১৭. ‘‘পাপমিত্তৱসং গন্ত্ৱা, নিগণ্ঠেন ৱিমোহিতো;

পেসিতো নাটপুত্তেন, বুদ্ধসেট্ঠমুপেচ্চহং.

২১৮. ‘‘পুচ্ছিত্ৱা নিপুণং পঞ্হং, সুত্ৱা ব্যাকৰণুত্তমং;

পব্বজিত্ৱান নচিৰং, অৰহত্তমপাপুণিং.

২১৯. ‘‘কিত্তযিত্ৱা জিনৱৰং, কিত্তিতো হোমি সব্বদা;

সুগন্ধদেহৱদনো, আসিং সুখসমপ্পিতো.

২২০. ‘‘তিক্খহাসলহুপঞ্ঞো, মহাপঞ্ঞো তথেৱহং;

ৱিচিত্তপটিভানো চ, তস্স কম্মস্স ৱাহসা.

২২১. ‘‘অভিত্থৱিত্ৱা পদুমুত্তৰাহং, পসন্নচিত্তো অসমং সযম্ভুং;

ন গচ্ছি কপ্পানি অপাযভূমিং, সতং সহস্সানি বলেন তস্স.

২২২. ‘‘কিলেসা ঝাপিতা ময্হং…পে… ৱিহৰামি অনাসৱো.

২২৩. ‘‘স্ৱাগতং ৱত মে আসি…পে… কতং বুদ্ধস্স সাসনং.

২২৪. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা অভযো থেৰো ইমা গাথাযো

অভাসিত্থাতি.

অভযত্থেৰস্সাপদানং সত্তমং.