৬. কাড়ুদাযিত্থেৰঅপদানং

১৬৫. ‘‘পদুমুত্তৰো নাম জিনো, সব্বধম্মেসু চক্খুমা;

ইতো সতসহস্সম্হি, কপ্পে উপ্পজ্জি নাযকো.

১৬৬. ‘‘নাযকানং ৱৰো সত্থা, গুণাগুণৱিদূ জিনো;

কতঞ্ঞূ কতৱেদী চ, তিত্থে যোজেতি পাণিনে [পাণিনো (সী. স্যা পী.)].

১৬৭. ‘‘সব্বঞ্ঞুতেন ঞাণেন, তুলযিত্ৱা দযাসযো;

দেসেতি পৱৰং ধম্মং, অনন্তগুণসঞ্চযো.

১৬৮. ‘‘স কদাচি মহাৱীৰো, অনন্তজিনসংসৰি [অনন্তজনসংসদি (সী.), অনন্তজনসংসুধি (স্যা.), অনন্তজনসংসৰী (পী.)];

দেসেতি মধুৰং ধম্মং, চতুসচ্চূপসঞ্হিতং.

১৬৯. ‘‘সুত্ৱান তং ধম্মৱৰং, আদিমজ্ঝন্তসোভণং;

পাণসতসহস্সানং, ধম্মাভিসমযো অহু.

১৭০. ‘‘নিন্নাদিতা তদা ভূমি, গজ্জিংসু চ পযোধৰা;

সাধুকাৰং পৱত্তিংসু, দেৱব্ৰহ্মনৰাসুৰা.

১৭১. ‘‘‘অহো কাৰুণিকো সত্থা, অহো সদ্ধম্মদেসনা;

অহো ভৱসমুদ্দম্হি, নিমুগ্গে উদ্ধৰী জিনো’.

১৭২. ‘‘এৱং পৱেদজাতেসু, সনৰামৰব্ৰহ্মসু;

কুলপ্পসাদকানগ্গং, সাৱকং ৱণ্ণযী জিনো.

১৭৩. ‘‘তদাহং হংসৱতিযং, জাতোমচ্চকুলে অহুং;

পাসাদিকো দস্সনিযো, পহূতধনধঞ্ঞৱা.

১৭৪. ‘‘হংসাৰামমুপেচ্চাহং, ৱন্দিত্ৱা তং তথাগতং;

সুণিত্ৱা মধুৰং ধম্মং, কাৰং কত্ৱা চ তাদিনো.

১৭৫. ‘‘নিপচ্চ পাদমূলেহং, ইমং ৱচনমব্ৰৱিং;

‘কুলপ্পসাদকানগ্গো, যো তযা সন্থুতো [যো তৱ সাসনে (স্যা.)] মুনে.

১৭৬. ‘‘‘তাদিসো হোমহং ৱীৰ [তাদিসোহং মহাৱীৰ (স্যা. ক.)], বুদ্ধসেট্ঠস্স সাসনে’;

তদা মহাকাৰুণিকো, সিঞ্চন্তো ৱা মতেন মং.

১৭৭. ‘‘আহ মং ‘পুত্ত উত্তিট্ঠ, লচ্ছসে তং মনোৰথং;

কথং নাম জিনে কাৰং, কত্ৱান ৱিফলো সিযা.

১৭৮. ‘‘‘সতসহস্সিতো কপ্পে, ওক্কাককুলসম্ভৱো;

গোতমো নাম গোত্তেন, সত্থা লোকে ভৱিস্সতি.

১৭৯. ‘‘‘তস্স ধম্মেসু দাযাদো, ওৰসো ধম্মনিম্মিতো;

উদাযি নাম নামেন, হেস্সতি সত্থু সাৱকো’.

১৮০. ‘‘তং সুত্ৱা মুদিতো হুত্ৱা, যাৱজীৱং তদা জিনং;

মেত্তচিত্তো পৰিচৰিং, পচ্চযেহি ৱিনাযকং.

১৮১. ‘‘তেন কম্মৱিপাকেন, চেতনাপণিধীহি চ;

জহিত্ৱা মানুসং দেহং, তাৱতিংসমগচ্ছহং.

১৮২. ‘‘পচ্ছিমে চ ভৱে দানি, ৰম্মে কপিলৱত্থৱে;

জাতো মহামচ্চকুলে, সুদ্ধোদনমহীপতে [সুদ্ধোদনো মহীপতি (স্যা.)].

১৮৩. ‘‘তদা অজাযি সিদ্ধত্থো, ৰম্মে লুম্বিনিকাননে;

হিতায সব্বলোকস্স, সুখায চ নৰাসভো.

১৮৪. ‘‘তদহেৱ অহং জাতো, সহ তেনেৱ ৱড্ঢিতো;

পিযো সহাযো দযিতো, ৱিযত্তো নীতিকোৱিদো.

১৮৫. ‘‘একূনতিংসো ৱযসা, নিক্খমিত্ৱা অগাৰতো [নিক্খন্তো পব্বজিত্থসো (সী. স্যা.)];

ছব্বস্সং ৱীতিনামেত্ৱা, আসি বুদ্ধো ৱিনাযকো.

১৮৬. ‘‘জেত্ৱা সসেনকং মাৰং, খেপযিত্ৱান আসৱে;

ভৱণ্ণৱং তৰিত্ৱান, বুদ্ধো আসি সদেৱকে.

১৮৭. ‘‘ইসিৱ্হযং গমিত্ৱান [ইসিৱ্হযং পতনং গন্ত্ৱা (স্যা.)], ৱিনেত্ৱা পঞ্চৱগ্গিযে;

ততো ৱিনেসি ভগৱা, গন্ত্ৱা গন্ত্ৱা তহিং তহিং.

১৮৮. ‘‘ৱেনেয্যে ৱিনযন্তো সো, সঙ্গণ্হন্তো সদেৱকং;

উপেচ্চ মগধে গিৰিং [মাগদগিৰিং (সী.), মঙ্গলাগিৰিং (পী.)], ৱিহৰিত্থ তদা জিনো.

১৮৯. ‘‘তদা সুদ্ধোদনেনাহং, ভূমিপালেন পেসিতো;

গন্ত্ৱা দিস্ৱা দসবলং, পব্বজিত্ৱাৰহা অহুং.

১৯০. ‘‘তদা মহেসিং যাচিত্ৱা, পাপযিং কপিলৱ্হযং;

ততো পুৰাহং গন্ত্ৱান, পসাদেসিং মহাকুলং.

১৯১. ‘‘জিনো তস্মিং গুণে তুট্ঠো, মং মহাপৰিসায সো [মমাহ পুৰিসাসভো (স্যা. পী.)];

কুলপ্পসাদকানগ্গং, পঞ্ঞাপেসি ৱিনাযকো.

১৯২. ‘‘কিলেসা ঝাপিতা ময্হং…পে… ৱিহৰামি অনাসৱো.

১৯৩. ‘‘স্ৱাগতং ৱত মে আসি…পে… কতং বুদ্ধস্স সাসনং.

১৯৪. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা কাড়ুদাযিথেৰো ইমা গাথাযো

অভাসিত্থাতি.

কাড়ুদাযিত্থেৰস্সাপদানং ছট্ঠং.