৫. নন্দকত্থেৰঅপদানং

১৪৩. ‘‘পদুমুত্তৰো নাম জিনো, সব্বধম্মেসু চক্খুমা;

ইতো সতসহস্সম্হি, কপ্পে উপ্পজ্জি নাযকো.

১৪৪. ‘‘হিতায সব্বসত্তানং, সুখায ৱদতং ৱৰো;

অত্থায পুৰিসাজঞ্ঞো, পটিপন্নো সদেৱকে.

১৪৫. ‘‘যসগ্গপত্তো সিৰিমা, কিত্তিৱণ্ণভতো [কিত্তিৱণ্ণ ভটো (স্যা. ক.)] জিনো;

পূজিতো সব্বলোকস্স, দিসা সব্বাসু ৱিস্সুতো.

১৪৬. ‘‘উত্তিণ্ণৱিচিকিচ্ছো সো, ৱীতিৱত্তকথংকথো;

পৰিপুণ্ণমনসঙ্কপ্পো, পত্তো সম্বোধিমুত্তমং.

১৪৭. ‘‘অনুপ্পন্নস্স মগ্গস্স, উপ্পাদেতা নৰুত্তমো;

অনক্খাতঞ্চ অক্খাসি, অসঞ্জাতঞ্চ সঞ্জনী.

১৪৮. ‘‘মগ্গঞ্ঞূ মগ্গৱিদূ [সো মগ্গৱিদূ (সী. পী.)] চ, মগ্গক্খাযী নৰাসভো;

মগ্গস্স কুসলো সত্থা, সাৰথীনং ৱৰুত্তমো [নৰুত্তমো (স্যা.)].

১৪৯. ‘‘তদা মহাকাৰুণিকো, ধম্মং দেসেসি নাযকো;

নিমুগ্গে কামপঙ্কম্হি [মোহপঙ্কম্হি (সী. স্যা.), মোহমগ্গম্হি (পী.)], সমুদ্ধৰতি পাণিনে.

১৫০. ‘‘ভিক্খুনীনং ওৱদনে, সাৱকং সেট্ঠসম্মতং;

ৱণ্ণযং এতদগ্গম্হি, পঞ্ঞপেসি মহামুনি.

১৫১. ‘‘তং সুত্ৱাহং পমুদিতো, নিমন্তেত্ৱা তথাগতং;

ভোজযিত্ৱা সসঙ্ঘং তং, পত্থযিং ঠানমুত্তমং.

১৫২. ‘‘তদা পমুদিতো নাথো, মং অৱোচ মহাইসি;

‘সুখী ভৱস্সু দীঘাৱু [দীঘাযু (সী. স্যা.)], লচ্ছসে তং মনোৰথং.

১৫৩. ‘‘‘সতসহস্সিতো কপ্পে, ওক্কাককুলসম্ভৱো;

গোতমো নাম গোত্তেন, সত্থা লোকে ভৱিস্সতি.

১৫৪. ‘‘‘তস্স ধম্মেসু দাযাদো, ওৰসো ধম্মনিম্মিতো;

নন্দকো নাম নামেন, হেস্সতি সত্থু সাৱকো’.

১৫৫. ‘‘তেন কম্মেন সুকতেন, চেতনাপণিধীহি চ;

জহিত্ৱা মানুসং দেহং, তাৱতিংসূপগো অহং.

১৫৬. ‘‘পচ্ছিমে চ ভৱে দানি, জাতো সেট্ঠিকুলে অহং;

সাৱত্থিযং পুৰে ৱৰে, ইদ্ধে ফীতে মহদ্ধনে.

১৫৭. ‘‘পুৰপ্পৱেসে সুগতং, দিস্ৱা ৱিম্হিতমানসো;

জেতাৰামপটিগ্গাহে, পব্বজিং অনগাৰিযং.

১৫৮. ‘‘নচিৰেনেৱ কালেন, অৰহত্তমপাপুণিং;

ততোহং তিণ্ণসংসাৰো, সাসিতো সব্বদস্সিনা.

১৫৯. ‘‘ভিক্খুনীনং ধম্মকথং, পটিপুচ্ছাকৰিং অহং;

সাসিতা তা মযা সব্বা, অভৱিংসু অনাসৱা.

১৬০. ‘‘সতানি পঞ্চনূনানি, তদা তুট্ঠো মহাহিতো;

ভিক্খুনীনং ওৱদতং, অগ্গট্ঠানে ঠপেসি মং.

১৬১. ‘‘সতসহস্সে কতং কম্মং, ফলং দস্সেসি মে ইধ;

সুমুত্তো সৰৱেগোৱ, কিলেসে ঝাপযিং মম.

১৬২. ‘‘কিলেসা ঝাপিতা ময্হং…পে… ৱিহৰামি অনাসৱো.

১৬৩. ‘‘স্ৱাগতং ৱত মে আসি…পে… কতং বুদ্ধস্স সাসনং.

১৬৪. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা নন্দকো থেৰো ইমা গাথাযো

অভাসিত্থাতি.

নন্দকত্থেৰস্সাপদানং পঞ্চমং.