৪. ৱঙ্গীসত্থেৰঅপদানং

৯৬. ‘‘পদুমুত্তৰো নাম জিনো, সব্বধম্মেসু চক্খুমা;

ইতো সতসহস্সম্হি, কপ্পে উপ্পজ্জি নাযকো.

৯৭. ‘‘যথাপি সাগৰে ঊমি, গগনে ৱিয তাৰকা;

এৱং পাৱচনং তস্স, অৰহন্তেহি চিত্তিতং.

৯৮. ‘‘সদেৱাসুৰনাগেহি, মনুজেহি পুৰক্খতো;

সমণব্ৰাহ্মণাকিণ্ণে, জনমজ্ঝে জিনুত্তমো.

৯৯. ‘‘পভাহি অনুৰঞ্জন্তো, লোকে [লোকং (সী.)] লোকন্তগূ জিনো;

ৱচনেন ৱিবোধেন্তো, ৱেনেয্যপদুমানি সো.

১০০. ‘‘ৱেসাৰজ্জেহি সম্পন্নো, চতূহি পুৰিসুত্তমো;

পহীনভযসাৰজ্জো, খেমপ্পত্তো ৱিসাৰদো.

১০১. ‘‘আসভং পৱৰং ঠানং, বুদ্ধভূমিঞ্চ কেৱলং;

পটিজানাতি লোকগ্গো, নত্থি সঞ্চোদকো ক্ৱচি.

১০২. ‘‘সীহনাদমসম্ভীতং, নদতো তস্স তাদিনো;

দেৱো নৰো ৱা ব্ৰহ্মা ৱা, পটিৱত্তা ন ৱিজ্জতি.

১০৩. ‘‘দেসেন্তো পৱৰং ধম্মং, সন্তাৰেন্তো সদেৱকং;

ধম্মচক্কং পৱত্তেতি, পৰিসাসু ৱিসাৰদো.

১০৪. ‘‘পটিভানৱতং অগ্গং, সাৱকং সাধুসম্মতং;

গুণং বহুং পকিত্তেত্ৱা, এতদগ্গে ঠপেসি তং.

১০৫. ‘‘তদাহং হংসৱতিযং, ব্ৰাহ্মণো সাধুসম্মতো;

সব্বৱেদৱিদূ জাতো, ৱাগীসো ৱাদিসূদনো.

১০৬. ‘‘উপেচ্চ তং মহাৱীৰং, সুত্ৱাহং ধম্মদেসনং;

পীতিৱৰং পটিলভিং, সাৱকস্স গুণে ৰতো.

১০৭. ‘‘নিমন্তেত্ৱাৱ সুগতং, সসঙ্ঘং লোকনন্দনং;

সত্তাহং ভোজযিত্ৱাহং, দুস্সেহচ্ছাদযিং তদা.

১০৮. ‘‘নিপচ্চ সিৰসা পাদে, কতোকাসো কতঞ্জলী;

একমন্তং ঠিতো হট্ঠো, সন্থৱিং জিনমুত্তমং.

১০৯. ‘‘‘নমো তে ৱাদিমদ্দন [ৱাদিসদ্দুল (সী. পী.), ৱাদিসূদন (স্যা.)], নমো তে ইসিসত্তম [পুৰিসুত্তম (সী. পী.)];

নমো তে সব্বলোকগ্গ, নমো তে অভযঙ্কৰ.

১১০. ‘‘‘নমো তে মাৰমথন [মাৰমসন (অট্ঠ.)], নমো তে দিট্ঠিসূদন;

নমো তে সন্তিসুখদ, নমো তে সৰণঙ্কৰ.

১১১. ‘‘‘অনাথানং ভৱং নাথো, ভীতানং অভযপ্পদো;

ৱিস্সামভূমি [ৱিস্সাসং ভূমি (স্যা.), ৱিস্সানভূমি (পী.)] সন্তানং, সৰণং সৰণেসিনং’.

১১২. ‘‘এৱমাদীহি সম্বুদ্ধং, সন্থৱিত্ৱা মহাগুণং;

অৱোচং ৱাদিসূদস্স [ৱাদিসূৰস্স (সী. স্যা. পী.)], গতিং পপ্পোমি ভিক্খুনো.

১১৩. ‘‘তদা অৱোচ ভগৱা, অনন্তপটিভানৱা;

‘যো সো বুদ্ধং অভোজেসি, সত্তাহং সহসাৱকং.

১১৪. ‘‘‘গুণঞ্চ মে পকিত্তেসি, পসন্নো সেহি পাণিভি;

এসো পত্থযতে ঠানং, ৱাদিসূদস্স ভিক্খুনো.

১১৫. ‘‘‘অনাগতম্হি অদ্ধানে, লচ্ছসে তং মনোৰথং;

দেৱমানুসসম্পত্তিং, অনুভোত্ৱা অনপ্পকং.

১১৬. ‘‘‘সতসহস্সিতো কপ্পে, ওক্কাককুলসম্ভৱো;

গোতমো নাম গোত্তেন, সত্থা লোকে ভৱিস্সতি.

১১৭. ‘‘‘তস্স ধম্মেসু দাযাদো, ওৰসো ধম্মনিম্মিতো;

ৱঙ্গীসো নাম নামেন, হেস্সতি সত্থু সাৱকো’.

১১৮. ‘‘তং সুত্ৱা মুদিতো হুত্ৱা, যাৱজীৱং তদা জিনং;

পচ্চযেহি উপট্ঠাসিং, মেত্তচিত্তো তথাগতং.

১১৯. ‘‘তেন কম্মেন সুকতেন, চেতনাপণিধীহি চ;

জহিত্ৱা মানুসং দেহং, তুসিতং [তাৱতিংসং (স্যা.)] অগমাসহং.

১২০. ‘‘পচ্ছিমে চ ভৱে দানি, জাতো ৱিপ্পকুলে [পৰিব্বাজকুলে (সী. স্যা. পী.)] অহং;

পচ্চাজাতো [সম্পত্তো চ (ক.)] যদা আসিং, জাতিযা সত্তৱস্সিকো.

১২১. ‘‘সব্বৱেদৱিদূ জাতো, ৱাদসত্থৱিসাৰদো;

ৱাদিস্সৰো [ৱগ্গুস্সৰো (স্যা. পী.)] চিত্তকথী, পৰৱাদপ্পমদ্দনো.

১২২. ‘‘ৱঙ্গে জাতোতি ৱঙ্গীসো, ৱচনে ইস্সৰোতি ৱা;

ৱঙ্গীসো ইতি মে নামং, অভৱী লোকসম্মতং.

১২৩. ‘‘যদাহং ৱিঞ্ঞুতং পত্তো, ঠিতো পঠমযোব্বনে;

তদা ৰাজগহে ৰম্মে, সাৰিপুত্তমহদ্দসং [মথদ্দসং (সী. পী.), চ অদ্দসং (স্যা.)].

পঞ্চৱীসতিমং ভাণৱাৰং.

১২৪. ‘‘পিণ্ডায ৱিচৰন্তং তং, পত্তপাণিং সুসংৱুতং;

অলোলক্খিং মিতভাণিং, যুগমত্তং নিদক্খিতং [নিৰিক্খতং (সী. পী.), উদিক্খতং (স্যা.)].

১২৫. ‘‘তং দিস্ৱা ৱিম্হিতো হুত্ৱা, অৱোচং মমনুচ্ছৱং [মননুচ্ছৱং (সী. স্যা.)];

কণিকাৰংৱ নিচিতং [কণিকাৰপৰিচিতং (পী.), খণিকং ঠানৰচিতং (সী.)], চিত্তং গাথাপদং অহং.

১২৬. ‘‘আচিক্খি সো মে সত্থাৰং, সম্বুদ্ধং লোকনাযকং;

তদা সো পণ্ডিতো ৱীৰো, উত্তৰিং [উত্তৰং (সী. পী.)] সমৱোচ মে.

১২৭. ‘‘ৱিৰাগসংহিতং ৱাক্যং, কত্ৱা দুদ্দসমুত্তমং;

ৱিচিত্তপটিভানেহি, তোসিতো তেন তাদিনা.

১২৮. ‘‘নিপচ্চ সিৰসা পাদে, ‘পব্বাজেহী’তি মং ব্ৰৱি;

ততো মং স মহাপঞ্ঞো, বুদ্ধসেট্ঠমুপানযি.

১২৯. ‘‘নিপচ্চ সিৰসা পাদে, নিসীদিং সত্থু সন্তিকে;

মমাহ ৱদতং সেট্ঠো, কচ্চি ৱঙ্গীস জানাসি [সচ্চং ৱঙ্গীস কচ্চি তে (স্যা.)].

১৩০. ‘‘কিঞ্চি সিপ্পন্তি তস্সাহং, ‘জানামী’তি চ অব্ৰৱিং;

মতসীসং ৱনচ্ছুদ্ধং, অপি বাৰসৱস্সিকং;

তৱ ৱিজ্জাৱিসেসেন, সচে সক্কোসি ৱাচয [ভাসয (সী. পী.)].

১৩১. ‘‘আমোতি মে পটিঞ্ঞাতে, তীণি সীসানি দস্সযি;

নিৰযনৰদেৱেসু, উপপন্নে অৱাচযিং.

১৩২. ‘‘তদা খীণাসৱস্সেৱ [পচ্চেকবুদ্ধস্স (সী. পী.)], সীসং দস্সেসি নাযকো;

ততোহং ৱিহতাৰব্ভো, পব্বজ্জং সমযাচিসং.

১৩৩. ‘‘পব্বজিত্ৱান সুগতং, সন্থৱামি তহিং তহিং;

ততো মং কব্বৱিত্তোসি [কৱিচিত্তোতি (স্যা. পী.)], উজ্ঝাযন্তিহ ভিক্খৱো.

১৩৪. ‘‘ততো ৱীমংসনত্থং মে, আহ বুদ্ধো ৱিনাযকো;

তক্কিকা পনিমা গাথা, ঠানসো পটিভন্তি তং.

১৩৫. ‘‘ন কব্বৱিত্তোহং ৱীৰ, ঠানসো পটিভন্তি মং;

তেন হি দানি ৱঙ্গীস, ঠানসো সন্থৱাহি মং.

১৩৬. ‘‘তদাহং সন্থৱিং ৱীৰং, গাথাহি ইসিসত্তমং;

ঠানসো মে তদা তুট্ঠো, জিনো অগ্গে ঠপেসি মং.

১৩৭. ‘‘পটিভানেন চিত্তেন, অঞ্ঞেসমতিমঞ্ঞহং;

পেসলে তেন সংৱিগ্গো, অৰহত্তমপাপুণিং.

১৩৮. ‘‘‘পটিভানৱতং অগ্গো, অঞ্ঞো কোচি ন ৱিজ্জতি;

যথাযং ভিক্খু ৱঙ্গীসো, এৱং ধাৰেথ ভিক্খৱো’.

১৩৯. ‘‘সতসহস্সে কতং কম্মং, ফলং দস্সেসি মে ইধ;

সুমুত্তো সৰৱেগোৱ কিলেসে ঝাপযিং মম.

১৪০. ‘‘কিলেসা ঝাপিতা ময্হং…পে… ৱিহৰামি অনাসৱো.

১৪১. ‘‘স্ৱাগতং ৱত মে আসি…পে… কতং বুদ্ধস্স সাসনং.

১৪২. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা ৱঙ্গীসো থেৰো ইমা গাথাযো

অভাসিত্থাতি.

ৱঙ্গীসত্থেৰস্সাপদানং চতুত্থং.