৩. সীৱলিত্থেৰঅপদানং

৫৪. ‘‘পদুমুত্তৰো নাম জিনো, সব্বধম্মেসু চক্খুমা;

ইতো সতসহস্সম্হি, কপ্পে উপ্পজ্জি নাযকো.

৫৫. ‘‘সীলং তস্স অসঙ্খেয্যং, সমাধি ৱজিৰূপমো;

অসঙ্খেয্যং ঞাণৱৰং, ৱিমুত্তি চ অনোপমা.

৫৬. ‘‘মনুজামৰনাগানং, ব্ৰহ্মানঞ্চ সমাগমে;

সমণব্ৰাহ্মণাকিণ্ণে, ধম্মং দেসেসি নাযকো.

৫৭. ‘‘সসাৱকং মহালাভিং, পুঞ্ঞৱন্তং জুতিন্ধৰং;

ঠপেসি এতদগ্গম্হি, পৰিসাসু ৱিসাৰদো.

৫৮. ‘‘তদাহং খত্তিযো আসিং, নগৰে হংসসৱ্হযে;

সুত্ৱা জিনস্স তং ৱাক্যং, সাৱকস্স গুণং বহুং.

৫৯. ‘‘নিমন্তযিত্ৱা সত্তাহং, ভোজযিত্ৱা সসাৱকং;

মহাদানং দদিত্ৱান, তং ঠানমভিপত্থযিং.

৬০. ‘‘তদা মং ৱিনতং পাদে, দিস্ৱান পুৰিসাসভো;

সৰেন মহতা ৱীৰো [সুস্সৰেন মহাৱীৰো (সী. পী.)], ইদং ৱচনমব্ৰৱি.

৬১. ‘‘‘ততো জিনস্স ৱচনং, সোতুকামা মহাজনা;

দেৱদানৱগন্ধব্বা, ব্ৰহ্মানো চ মহিদ্ধিকা’.

৬২. ‘‘সমণব্ৰাহ্মণা চেৱ, নমস্সিংসু কতঞ্জলী;

‘নমো তে পুৰিসাজঞ্ঞ, নমো তে পুৰিসুত্তম.

৬৩. ‘‘‘খত্তিযেন মহাদানং, দিন্নং সত্তাহিকম্পি ৱো [সত্তহিকং মি ৱো (সী.), সত্তহিকাধিকং (স্যা.), সত্তহিকং ৱিভো (পী.)];

সোতুকামা ফলং তস্স, ব্যাকৰোহি মহামুনে’.

৬৪. ‘‘ততো অৱোচ ভগৱা, ‘সুণাথ মম ভাসিতং;

অপ্পমেয্যম্হি বুদ্ধম্হি, সসঙ্ঘম্হি পতিট্ঠিতা [সংঘম্হি সুপ্পতিট্ঠিতা (সী. পী.)].

৬৫. ‘‘‘দক্খিণা তায [দক্খিণাদায (স্যা. পী.)] কো ৱত্তা, অপ্পমেয্যফলা হি সা;

অপি চে স মহাভোগো, ঠানং পত্থেতি উত্তমং.

৬৬. ‘‘‘লাভী ৱিপুললাভানং, যথা ভিক্খু সুদস্সনো;

তথাহম্পি ভৱেয্যন্তি, লচ্ছসে তং অনাগতে.

৬৭. ‘‘‘সতসহস্সিতো কপ্পে, ওক্কাককুলসম্ভৱো;

গোতমো নাম গোত্তেন, সত্থা লোকে ভৱিস্সতি.

৬৮. ‘‘‘তস্স ধম্মেসু দাযাদো, ওৰসো ধম্মনিম্মিতো;

সীৱলি নাম নামেন, হেস্সতি সত্থু সাৱকো’.

৬৯. ‘‘তেন কম্মেন সুকতেন, চেতনাপণিধীহি চ;

জহিত্ৱা মানুসং দেহং, তাৱতিংসূপগো অহং.

৭০. ‘‘একনৱুতিতো কপ্পে, ৱিপস্সী লোকনাযকো;

উপ্পজ্জি চাৰুদস্সনো, সব্বধম্মৱিপস্সকো.

৭১. ‘‘তদাহং বন্ধুমতিযং, কুলস্সঞ্ঞতৰস্স চ;

দযিতো পস্সিতো চেৱ, আসিং কম্মন্তৱাৱটো [কম্মন্তব্যাৱটো (সী. স্যা. ক.)].

৭২. ‘‘তদা অঞ্ঞতৰো পূগো, ৱিপস্সিস্স মহেসিনো;

পৰিৱেসং অকাৰযি, মহন্তমতিৱিস্সুতং.

৭৩. ‘‘নিট্ঠিতে চ মহাদানে, দদুং খজ্জকসঞ্হিতং;

নৱং দধিং মধুঞ্চেৱ, ৱিচিনং নেৱ অদ্দসুং.

৭৪. ‘‘তদাহং তং গহেত্ৱান, নৱং দধিং মধুম্পি চ;

কম্মস্সামিঘৰং গচ্ছিং, তমেসন্তা মমদ্দসুং.

৭৫. ‘‘সহস্সমপি দত্ৱান, নালভিংসু চ তং দ্ৱযং;

ততোহং এৱং চিন্তেসিং, ‘নেতং হেস্সতি ওৰকং.

৭৬. ‘‘‘যথা ইমে জনা সব্বে, সক্কৰোন্তি তথাগতং;

অহম্পি কাৰং কস্সামি, সসঙ্ঘে লোকনাযকে’.

৭৭. ‘‘তদাহমেৱং চিন্তেত্ৱা, দধিং মধুঞ্চ একতো;

মদ্দিত্ৱা লোকনাথস্স, সসঙ্ঘস্স অদাসহং.

৭৮. ‘‘তেন কম্মেন সুকতেন, চেতনাপণিধীহি চ;

জহিত্ৱা মানুসং দেহং, তাৱতিংসমগচ্ছহং.

৭৯. ‘‘পুনাহং বাৰাণসিযং, ৰাজা হুত্ৱা মহাযসো;

সত্তুকস্স তদা দুট্ঠো, দ্ৱাৰৰোধমকাৰযিং.

৮০. ‘‘তদা তপস্সিনো ৰুদ্ধা, একাহং ৰক্খিতা অহুং;

ততো তস্স ৱিপাকেন, পাপতিং [পাপিট্ঠং (স্যা.) পাপত্তং (ক.)] নিৰযং ভুসং.

৮১. ‘‘পচ্ছিমে চ ভৱে দানি, জাতোহং কোলিযে পুৰে;

সুপ্পৱাসা চ মে মাতা, মহালি লিচ্ছৱী পিতা.

৮২. ‘‘খত্তিযে পুঞ্ঞকম্মেন, দ্ৱাৰৰোধস্স ৱাহসা;

সত্ত ৱস্সানি নিৱসিং, মাতুকুচ্ছিম্হি দুক্খিতো.

৮৩. ‘‘সত্তাহং দ্ৱাৰমূড়্হোহং, মহাদুক্খসমপ্পিতো;

মাতা মে ছন্দদানেন, এৱং আসি সুদুক্খিতা.

৮৪. ‘‘সুৱত্থিতোহং নিক্খন্তো, বুদ্ধেন অনুকম্পিতো;

নিক্খন্তদিৱসেযেৱ, পব্বজিং অনগাৰিযং.

৮৫. ‘‘উপজ্ঝা সাৰিপুত্তো মে, মোগ্গল্লানো মহিদ্ধিকো;

কেসে ওৰোপযন্তো মে, অনুসাসি মহামতি.

৮৬. ‘‘কেসেসু ছিজ্জমানেসু, অৰহত্তমপাপুণিং;

দেৱা নাগা মনুস্সা চ, পচ্চযে উপনেন্তি মে.

৮৭. ‘‘পদুমুত্তৰনাথঞ্চ, ৱিপস্সিঞ্চ ৱিনাযকং;

যং পূজযিং পমুদিতো, পচ্চযেহি ৱিসেসতো.

৮৮. ‘‘ততো তেসং ৱিসেসেন, কম্মানং ৱিপুলুত্তমং;

লাভং লভামি সব্বত্থ, ৱনে গামে জলে থলে.

৮৯. ‘‘ৰেৱতং দস্সনত্থায, যদা যাতি ৱিনাযকো;

তিংসভিক্খুসহস্সেহি, সহ লোকগ্গনাযকো.

৯০. ‘‘তদা দেৱোপণীতেহি, মমত্থায মহামতি;

পচ্চযেহি মহাৱীৰো, সসঙ্ঘো লোকনাযকো.

৯১. ‘‘উপট্ঠিতো মযা বুদ্ধো, গন্ত্ৱা ৰেৱতমদ্দস;

ততো জেতৱনং গন্ত্ৱা, এতদগ্গে ঠপেসি মং.

৯২. ‘‘‘লাভীনং সীৱলি অগ্গো, মম সিস্সেসু ভিক্খৱো’;

সব্বলোকহিতো সত্থা, কিত্তযী পৰিসাসু মং.

৯৩. ‘‘কিলেসা ঝাপিতা ময্হং…পে… ৱিহৰামি অনাসৱো.

৯৪. ‘‘স্ৱাগতং ৱত মে আসি…পে… কতং বুদ্ধস্স সাসনং.

৯৫. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা সীৱলিথেৰো ইমা গাথাযো

অভাসিত্থাতি.

সীৱলিত্থেৰস্সাপদানং ততিযং.