২. কঙ্খাৰেৱতত্থেৰঅপদানং

৩৪. ‘‘পদুমুত্তৰো নাম জিনো, সব্বধম্মেসু চক্খুমা;

ইতো সতসহস্সম্হি, কপ্পে উপ্পজ্জি নাযকো.

৩৫. ‘‘সীহহনু ব্ৰহ্মগিৰো, হংসদুন্দুভিনিস্সনো [হংসদুন্দুভিনিস্সৰো (সী.) … নিস্সৱনো (পী.) … সাৱনো (স্যা.)];

নাগৱিক্কন্তগমনো, চন্দসূৰাদিকপ্পভো.

৩৬. ‘‘মহামতী মহাৱীৰো, মহাঝাযী মহাবলো [মহাগতি (স্যা.), মহাহিতো (পী.)];

মহাকাৰুণিকো নাথো, মহাতমপনূদনো [মহাতমৱিধংসনো (স্যা.), মহাতমনিসূদনো (পী.)].

৩৭. ‘‘স কদাচি তিলোকগ্গো, ৱেনেয্যং ৱিনযং বহুং [ৱেনেয্যে ৱিনিযং বহূ (সী.)];

ধম্মং দেসেসি সম্বুদ্ধো, সত্তাসযৱিদূ মুনি.

৩৮. ‘‘ঝাযিং ঝানৰতং ৱীৰং, উপসন্তং অনাৱিলং;

ৱণ্ণযন্তো পৰিসতিং, তোসেসি [তোসেতি (স্যা. পী. ক.)] জনতং জিনো.

৩৯. ‘‘তদাহং হংসৱতিযং, ব্ৰাহ্মণো ৱেদপাৰগূ;

ধম্মং সুত্ৱান মুদিতো, তং ঠানমভিপত্থযিং.

৪০. ‘‘তদা জিনো ৱিযাকাসি, সঙ্ঘমজ্ঝে ৱিনাযকো;

‘মুদিতো হোহি ত্ৱং ব্ৰহ্মে, লচ্ছসে তং মনোৰথং.

৪১. ‘‘‘সতসহস্সিতো কপ্পে, ওক্কাককুলসম্ভৱো;

গোতমো নাম গোত্তেন, সত্থা লোকে ভৱিস্সতি.

৪২. ‘‘‘তস্স ধম্মেসু দাযাদো, ওৰসো ধম্মনিম্মিতো;

ৰেৱতো নাম নামেন, হেস্সতি সত্থু সাৱকো’.

৪৩. ‘‘তেন কম্মেন সুকতেন, চেতনাপণিধীহি চ;

জহিত্ৱা মানুসং দেহং, তাৱতিংসমগচ্ছহং.

৪৪. ‘‘পচ্ছিমে চ ভৱে দানি, জাতোহং কোলিযে পুৰে;

খত্তিযে কুলসম্পন্নে, ইদ্ধে ফীতে মহদ্ধনে.

৪৫. ‘‘যদা কপিলৱত্থুস্মিং, বুদ্ধো ধম্মমদেসযি;

তদা পসন্নো সুগতে, পব্বজিং অনগাৰিযং.

৪৬. ‘‘কঙ্খা মে বহুলা আসি, কপ্পাকপ্পে তহিং তহিং;

সব্বং তং ৱিনযী বুদ্ধো, দেসেত্ৱা ধম্মমুত্তমং.

৪৭. ‘‘ততোহং তিণ্ণসংসাৰো, সদা ঝানসুখে ৰতো;

ৱিহৰামি তদা বুদ্ধো, মং দিস্ৱা এতদব্ৰৱি.

৪৮. ‘‘‘যা কাচি কঙ্খা ইধ ৱা হুৰং ৱা, সকৱেদিযা ৱা পৰৱেদিযা ৱা;

যে ঝাযিনো তা পজহন্তি সব্বা, আতাপিনো ব্ৰহ্মচৰিযং চৰন্তা’.

৪৯. ‘‘সতসহস্সে কতং কম্মং, ফলং দস্সেসি মে ইধ;

সুমুত্তো সৰৱেগোৱ কিলেসে ঝাপযিং মম.

৫০. ‘‘ততো ঝানৰতং দিস্ৱা, বুদ্ধো লোকন্তগূ মুনি;

ঝাযীনং ভিক্খূনং অগ্গো, পঞ্ঞাপেতি মহামতি.

৫১. ‘‘কিলেসা ঝাপিতা ময্হং…পে… ৱিহৰামি অনাসৱো.

৫২. ‘‘স্ৱাগতং ৱত মে আসি…পে… কতং বুদ্ধস্স সাসনং.

৫৩. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা কঙ্খাৰেৱতো থেৰো ইমা গাথাযো

অভাসিত্থাতি.

কঙ্খাৰেৱতত্থেৰস্সাপদানং দুতিযং.