১. লকুণ্ডভদ্দিযত্থেৰঅপদানং

১. ‘‘পদুমুত্তৰো নাম জিনো, সব্বধম্মেসু চক্খুমা;

ইতো সতসহস্সম্হি, কপ্পে উপ্পজ্জি নাযকো.

২. ‘‘তদাহং হংসৱতিযং, সেট্ঠিপুত্তো মহদ্ধনো;

জঙ্ঘাৱিহাৰং ৱিচৰং, সঙ্ঘাৰামং অগচ্ছহং.

৩. ‘‘তদা সো লোকপজ্জোতো, ধম্মং দেসেসি নাযকো;

মঞ্জুস্সৰানং পৱৰং, সাৱকং অভিকিত্তযি.

৪. ‘‘তং সুত্ৱা মুদিতো হুত্ৱা, কাৰং কত্ৱা মহেসিনো;

ৱন্দিত্ৱা সত্থুনো পাদে, তং ঠানমভিপত্থযিং.

৫. ‘‘তদা বুদ্ধো ৱিযাকাসি, সঙ্ঘমজ্ঝে ৱিনাযকো;

‘অনাগতম্হি অদ্ধানে, লচ্ছসে তং মনোৰথং.

৬. ‘‘‘সতসহস্সিতো কপ্পে, ওক্কাককুলসম্ভৱো;

গোতমো নাম গোত্তেন, সত্থা লোকে ভৱিস্সতি.

৭. ‘‘‘তস্স ধম্মেসু দাযাদো, ওৰসো ধম্মনিম্মিতো;

ভদ্দিযো নাম নামেন, হেস্সতি সত্থু সাৱকো’.

৮. ‘‘তেন কম্মেন সুকতেন, চেতনাপণিধীহি চ;

জহিত্ৱা মানুসং দেহং, তাৱতিংসমগচ্ছহং.

৯. ‘‘দ্ৱেনৱুতে ইতো কপ্পে, ফুস্সো উপ্পজ্জি নাযকো;

দুৰাসদো দুপ্পসহো, সব্বলোকুত্তমো জিনো.

১০. ‘‘চৰণেন চ সম্পন্নো, ব্ৰহা উজু পতাপৱা;

হিতেসী সব্বসত্তানং [সব্বপাণীনং (সী.)], বহুং মোচেসি বন্ধনা.

১১. ‘‘নন্দাৰামৱনে তস্স, অহোসিং ফুস্সকোকিলো [পুস্সকোকিলো (সী. স্যা.)];

গন্ধকুটিসমাসন্নে, অম্বৰুক্খে ৱসামহং.

১২. ‘‘তদা পিণ্ডায গচ্ছন্তং, দক্খিণেয্যং জিনুত্তমং;

দিস্ৱা চিত্তং পসাদেত্ৱা, মঞ্জুনাভিনিকূজহং [মঞ্জুনাদেন কূজহং (সী. পী.)].

১৩. ‘‘ৰাজুয্যানং তদা গন্ত্ৱা, সুপক্কং কনকত্তচং;

অম্বপিণ্ডং গহেত্ৱান, সম্বুদ্ধস্সোপনামযিং.

১৪. ‘‘তদা মে চিত্তমঞ্ঞায, মহাকাৰুণিকো জিনো;

উপট্ঠাকস্স হত্থতো, পত্তং পগ্গণ্হি নাযকো.

১৫. ‘‘অদাসিং হট্ঠচিত্তোহং [তুট্ঠচিত্তোহং (সী.)], অম্বপিণ্ডং মহামুনে;

পত্তে পক্খিপ্প পক্খেহি, পঞ্জলিং [পক্খেহঞ্জলিং (সী.)] কত্ৱান মঞ্জুনা.

১৬. ‘‘সৰেন ৰজনীযেন, সৱনীযেন ৱগ্গুনা;

ৱস্সন্তো বুদ্ধপূজত্থং, নীড়ং [নিদ্দং (স্যা. পী.)] গন্ত্ৱা নিপজ্জহং.

১৭. ‘‘তদা মুদিতচিত্তং মং, বুদ্ধপেমগতাসযং;

সকুণগ্ঘি উপাগন্ত্ৱা, ঘাতযী দুট্ঠমানসো.

১৮. ‘‘ততো চুতোহং তুসিতে, অনুভোত্ৱা মহাসুখং;

মনুস্সযোনিমাগচ্ছিং, তস্স কম্মস্স ৱাহসা.

১৯. ‘‘ইমম্হি ভদ্দকে কপ্পে, ব্ৰহ্মবন্ধু মহাযসো;

কস্সপো নাম গোত্তেন, উপ্পজ্জি ৱদতং ৱৰো.

২০. ‘‘সাসনং জোতযিত্ৱা সো, অভিভুয্য কুতিত্থিযে;

ৱিনযিত্ৱান ৱেনেয্যে, নিব্বুতো সো সসাৱকো.

২১. ‘‘নিব্বুতে তম্হি লোকগ্গে, পসন্না জনতা বহূ;

পূজনত্থায বুদ্ধস্স, থূপং কুব্বন্তি সত্থুনো.

২২. ‘‘‘সত্তযোজনিকং থূপং, সত্তৰতনভূসিতং;

কৰিস্সাম মহেসিস্স’, ইচ্চেৱং মন্তযন্তি তে.

২৩. ‘‘কিকিনো কাসিৰাজস্স, তদা সেনায নাযকো;

হুত্ৱাহং অপ্পমাণস্স, পমাণং চেতিযে ৱদিং.

২৪. ‘‘তদা তে মম ৱাক্যেন, চেতিযং যোজনুগ্গতং;

অকংসু নৰৱীৰস্স, নানাৰতনভূসিতং.

২৫. ‘‘তেন কম্মেন সুকতেন, চেতনাপণিধীহি চ;

জহিত্ৱা মানুসং দেহং, তাৱতিংসমগচ্ছহং.

২৬. ‘‘পচ্ছিমে চ ভৱে দানি, জাতো সেট্ঠিকুলে অহং;

সাৱত্থিযং পুৰৱৰে, ইদ্ধে ফীতে মহদ্ধনে.

২৭. ‘‘পুৰপ্পৱেসে সুগতং, দিস্ৱা ৱিম্হিতমানসো;

পব্বজিত্ৱান ন চিৰং, অৰহত্তমপাপুণিং.

২৮. ‘‘চেতিযস্স পমাণং যং, অকৰিং তেন কম্মুনা;

লকুণ্ডকসৰীৰোহং, জাতো পৰিভৱাৰহো.

২৯. ‘‘সৰেন মধুৰেনাহং, পূজিত্ৱা ইসিসত্তমং;

মঞ্জুস্সৰানং ভিক্খূনং, অগ্গত্তমনুপাপুণিং.

৩০. ‘‘ফলদানেন বুদ্ধস্স, গুণানুস্সৰণেন চ;

সামঞ্ঞফলসম্পন্নো, ৱিহৰামি অনাসৱো.

৩১. ‘‘কিলেসা ঝাপিতা ময্হং, ভৱা সব্বে সমূহতা;

নাগোৱ বন্ধনং ছেত্ৱা, ৱিহৰামি অনাসৱো.

৩২. ‘‘স্ৱাগতং ৱত মে আসি, বুদ্ধসেট্ঠস্স সন্তিকে;

তিস্সো ৱিজ্জা অনুপ্পত্তা, কতং বুদ্ধস্স সাসনং.

৩৩. ‘‘পটিসম্ভিদা চতস্সো, ৱিমোক্খাপি চ অট্ঠিমে;

ছড়ভিঞ্ঞা সচ্ছিকতা, কতং বুদ্ধস্স সাসনং’’.

ইত্থং সুদং আযস্মা লকুণ্ডভদ্দিযো থেৰো ইমা গাথাযো

অভাসিত্থাতি.

লকুণ্ডভদ্দিযত্থেৰস্সাপদানং পঠমং.