৯. ৰাধত্থেৰঅপদানং

২৯৬. ‘‘পদুমুত্তৰো নাম জিনো, সব্বলোকৱিদূ মুনি;

ইতো সতসহস্সম্হি, কপ্পে উপ্পজ্জি চক্খুমা.

২৯৭. ‘‘ওৱাদকো ৱিঞ্ঞাপকো, তাৰকো সব্বপাণিনং;

দেসনাকুসলো বুদ্ধো, তাৰেসি জনতং বহুং.

২৯৮. ‘‘অনুকম্পকো কাৰুণিকো, হিতেসী সব্বপাণিনং;

সম্পত্তে তিত্থিযে সব্বে, পঞ্চসীলে পতিট্ঠপি.

২৯৯. ‘‘এৱং নিৰাকুলং আসি, সুঞ্ঞতং তিত্থিযেহি চ;

ৱিচিত্তং অৰহন্তেহি, ৱসীভূতেহি তাদিভি.

৩০০. ‘‘ৰতনানট্ঠপঞ্ঞাসং, উগ্গতো সো মহামুনি;

কঞ্চনগ্ঘিযসঙ্কাসো, বাত্তিংসৱৰলক্খণো.

৩০১. ‘‘ৱস্সসতসহস্সানি, আযু ৱিজ্জতি তাৱদে;

তাৱতা তিট্ঠমানো সো, তাৰেসি জনতং বহুং.

৩০২. ‘‘তদাহং হংসৱতিযং, ব্ৰাহ্মণো মন্তপাৰগূ;

উপেচ্চ তং নৰৱৰং, অস্সোসিং ধম্মদেসনং.

৩০৩. ‘‘পঞ্ঞপেন্তং মহাৱীৰং, পৰিসাসু ৱিসাৰদং;

পটিভানেয্যকং ভিক্খুং, এতদগ্গে ৱিনাযকং.

৩০৪. ‘‘তদাহং কাৰং কত্ৱান, সসঙ্ঘে লোকনাযকে;

নিপচ্চ সিৰসা পাদে, তং ঠানং অভিপত্থযিং.

৩০৫. ‘‘ততো মং ভগৱা আহ, সিঙ্গীনিক্খসমপ্পভো;

সৰেন ৰজনীযেন, কিলেসমলহাৰিনা.

৩০৬. ‘‘‘সুখী ভৱস্সু দীঘাযু, সিজ্ঝতু পণিধী তৱ;

সসঙ্ঘে মে কতং কাৰং, অতীৱ ৱিপুলং তযা.

৩০৭. ‘‘‘সতসহস্সিতো কপ্পে, ওক্কাককুলসম্ভৱো;

গোতমো নাম গোত্তেন, সত্থা লোকে ভৱিস্সতি.

৩০৮. ‘‘‘তস্স ধম্মেসু দাযাদো, ওৰসো ধম্মনিম্মিতো;

ৰাধোতি নামধেয্যেন, হেস্সতি সত্থু সাৱকো.

৩০৯. ‘‘‘স তে হেতুগুণে তুট্ঠো, সক্যপুত্তো নৰাসভো [ইদং পাদদ্ৱযং স্যামমূলে নত্থী];

পটিভানেয্যকানগ্গং, পঞ্ঞপেস্সতি নাযকো’.

৩১০. ‘‘তং সুত্ৱা মুদিতো হুত্ৱা, যাৱজীৱং তদা জিনং;

মেত্তচিত্তো পৰিচৰিং, সতো পঞ্ঞাসমাহিতো.

৩১১. ‘‘তেন কম্মেন সুকতেন, চেতনাপণিধীহি চ;

জহিত্ৱা মানুসং দেহং, তাৱতিংসমগচ্ছহং.

৩১২. ‘‘সতানং তীণিক্খত্তুঞ্চ, দেৱৰজ্জমকাৰযিং;

সতানং পঞ্চক্খত্তুঞ্চ, চক্কৱত্তী অহোসহং.

৩১৩. ‘‘পদেসৰজ্জং ৱিপুলং, গণনাতো অসঙ্খিযং;

সব্বত্থ সুখিতো আসিং, তস্স কম্মস্স ৱাহসা.

৩১৪. ‘‘পচ্ছিমে ভৱে সম্পত্তে, গিৰিব্বজপুৰুত্তমে;

জাতো ৱিপ্পকুলে নিদ্ধে, ৱিকলচ্ছাদনাসনে.

৩১৫. ‘‘কটচ্ছুভিক্খং পাদাসিং, সাৰিপুত্তস্স তাদিনো;

যদা জিণ্ণো চ ৱুদ্ধো চ, তদাৰামমুপাগমিং.

৩১৬. ‘‘পব্বজতি ন মং কোচি [পব্বাজেন্তি ন মং কেচি (সী. স্যা পী.)], জিণ্ণদুব্বলথামকং;

তেন দীনো ৱিৱণ্ণঙ্গো [ৱিৱণ্ণকো (ক.)], সোকো চাসিং তদা অহং.

৩১৭. ‘‘দিস্ৱা মহাকাৰুণিকো, মমমাহ [মমাহ সো (সী.), মমাহ চ (পী.)] মহামুনি;

‘কিমত্থং পুত্তসোকট্টো, ব্ৰূহি তে চিত্তজং ৰুজং’.

৩১৮. ‘‘‘পব্বজ্জং ন লভে ৱীৰ, স্ৱাক্খাতে তৱ সাসনে;

তেন সোকেন দীনোস্মি, সৰণং হোহি নাযক’.

৩১৯. ‘‘তদা ভিক্খূ সমানেত্ৱা, অপুচ্ছি মুনিসত্তমো;

‘ইমস্স অধিকাৰং যে, সৰন্তি ব্যাহৰন্তু তে’.

৩২০. ‘‘সাৰিপুত্তো তদাৱোচ, ‘কাৰমস্স সৰামহং;

কটচ্ছুভিক্খং দাপেসি, পিণ্ডায চৰতো মম’.

৩২১. ‘‘‘সাধু সাধু কতঞ্ঞূসি, সাৰিপুত্ত ইমং তুৱং;

পব্বাজেহি দিজং ৱুড্ঢং, হেস্সতাজানিযো অযং’.

৩২২. ‘‘ততো অলত্থং পব্বজ্জং, কম্মৱাচোপসম্পদং;

ন চিৰেনেৱ কালেন, পাপুণিং আসৱক্খযং.

৩২৩. ‘‘সক্কচ্চং মুনিনো ৱাক্যং, সুণামি মুদিতো যতো;

পটিভানেয্যকানগ্গং, ততো মং ঠপযী জিনো.

৩২৪. ‘‘কিলেসা ঝাপিতা ময্হং…পে… ৱিহৰামি অনাসৱো.

৩২৫. ‘‘স্ৱাগতং ৱত মে আসি…পে… কতং বুদ্ধস্স সাসনং.

৩২৬. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা ৰাধো থেৰো ইমা গাথাযো

অভাসিত্থাতি.

ৰাধত্থেৰস্সাপদানং নৱমং.