১০. মোঘৰাজত্থেৰঅপদানং

৩২৭. ‘‘পদুমুত্তৰো নাম জিনো, সব্বলোকৱিদূ মুনি;

ইতো সতসহস্সম্হি, কপ্পে উপ্পজ্জি চক্খুমা.

৩২৮. ‘‘ওৱাদকো ৱিঞ্ঞাপকো, তাৰকো সব্বপাণিনং;

দেসনাকুসলো বুদ্ধো, তাৰেসি জনতং বহুং.

৩২৯. ‘‘অনুকম্পকো কাৰুণিকো, হিতেসী সব্বপাণিনং;

সম্পত্তে তিত্থিযে সব্বে, পঞ্চসীলে পতিট্ঠপি.

৩৩০. ‘‘এৱং নিৰাকুলং আসি, সুঞ্ঞতং তিত্থিযেহি চ;

ৱিচিত্তং অৰহন্তেহি, ৱসীভূতেহি তাদিভি.

৩৩১. ‘‘ৰতনানট্ঠপঞ্ঞাসং, উগ্গতো সো মহামুনি;

কঞ্চনগ্ঘিযসঙ্কাসো, বাত্তিংসৱৰলক্খণো.

৩৩২. ‘‘ৱস্সসতসহস্সানি, আযু ৱিজ্জতি তাৱদে;

তাৱতা তিট্ঠমানো সো, তাৰেসি জনতং বহুং.

৩৩৩. ‘‘তদাহং হংসৱতিযং, কুলে অঞ্ঞতৰে অহুং;

পৰকম্মাযনে যুত্তো, নত্থি মে কিঞ্চি সংধনং.

৩৩৪. ‘‘পটিক্কমনসালাযং, ৱসন্তো কতভূমিযং;

অগ্গিং উজ্জালযিং তত্থ, দড়্হং কণ্হাসি সা [কণ্হা সিযা (সী. পী.), ডয্হকণ্হা সিলা (স্যা.)] হী.

৩৩৫. ‘‘তদা পৰিসতিং নাথো, চতুসচ্চপকাসকো;

সাৱকং সম্পকিত্তেসি, লূখচীৱৰধাৰকং.

৩৩৬. ‘‘তস্স তম্হি গুণে তুট্ঠো, পণিপচ্চ [পতিপজ্জ (স্যা.)] তথাগতং;

লূখচীৱৰধাৰগ্গং, পত্থযিং ঠানমুত্তমং.

৩৩৭. ‘‘তদা অৱোচ ভগৱা, সাৱকে পদুমুত্তৰো;

‘পস্সথেতং পুৰিসকং, কুচেলং তনুদেহকং.

৩৩৮. ‘‘‘পীতিপ্পসন্নৱদনং, সদ্ধাধনসমন্ৱিতং [সদ্ধাস্নেহসমন্ৱতং (ক.)];

উদগ্গতনুজং হট্ঠং, অচলং সালপিণ্ডিতং.

৩৩৯. ‘‘‘এসো পত্থেতি তং ঠানং, সচ্চসেনস্স ভিক্খুনো;

লূখচীৱৰধাৰিস্স, তস্স ৱণ্ণসিতাসযো [ৱণ্ণগতাসযো (সী. স্যা. পী.)].

৩৪০. ‘‘তং সুত্ৱা মুদিতো হুত্ৱা, নিপচ্চ সিৰসা জিনং;

যাৱজীৱং সুভং কম্মং, কৰিত্ৱা জিনসাসনে.

৩৪১. ‘‘তেন কম্মেন সুকতেন, চেতনাপণিধীহি চ;

জহিত্ৱা মানুসং দেহং, তাৱতিংসূপগো অহং.

৩৪২. ‘‘পটিক্কমনসালাযং, ভূমিদাহককম্মুনা;

সমসহস্সং নিৰযে, অদয্হিং ৱেদনাট্টিতো.

৩৪৩. ‘‘তেন কম্মাৱসেসেন, পঞ্চ জাতিসতানিহং;

মনুস্সো কুলজো হুত্ৱা, জাতিযা লক্খণঙ্কিতো.

৩৪৪. ‘‘পঞ্চ জাতিসতানেৱ, কুট্ঠৰোগসমপ্পিতো;

মহাদুক্খং অনুভৱিং, তস্স কম্মস্স ৱাহসা.

৩৪৫. ‘‘ইমস্মিং ভদ্দকে কপ্পে, উপৰিট্ঠং যসস্সিনং;

পিণ্ডপাতেন তপ্পেসিং, পসন্নমানসো অহং.

৩৪৬. ‘‘তেন কম্মৱিসেসেন, চেতনাপণিধীহি চ;

জহিত্ৱা মানুসং দেহং, তাৱতিংসমগচ্ছহং.

৩৪৭. ‘‘পচ্ছিমে ভৱে সম্পত্তে, অজাযিং খত্তিযে কুলে;

পিতুনো অচ্চযেনাহং, মহাৰজ্জসমপ্পিতো.

৩৪৮. ‘‘কুট্ঠৰোগাধিভূতোহং, ন ৰতিং ন সুখং লভে;

মোঘং ৰজ্জং সুখং যস্মা, মোঘৰাজা ততো অহং.

৩৪৯. ‘‘কাযস্স দোসং দিস্ৱান, পব্বজিং অনগাৰিযং;

বাৱৰিস্স দিজগ্গস্স, সিস্সত্তং অজ্ঝুপাগমিং.

৩৫০. ‘‘মহতা পৰিৱাৰেন, উপেচ্চ নৰনাযকং;

অপুচ্ছিং নিপুণং পঞ্হং, তং ৱীৰং ৱাদিসূদনং.

৩৫১. ‘‘‘অযং লোকো পৰো লোকো, ব্ৰহ্মলোকো সদেৱকো;

দিট্ঠিং নো [দিট্ঠা নো (সী.), দিট্ঠং নো (পী.), দিট্ঠিং তে (স্যা.)] নাভিজানামি, গোতমস্স যসস্সিনো.

৩৫২. ‘‘‘এৱাভিক্কন্তদস্সাৱিং, অত্থি পঞ্হেন আগমং;

কথং লোকং অৱেক্খন্তং, মচ্চুৰাজা ন পস্সতি’.

৩৫৩. ‘‘‘সুঞ্ঞতো লোকং অৱেক্খস্সু, মোঘৰাজ সদা সতো;

অত্তানুদিট্ঠিং উহচ্চ, এৱং মচ্চুতৰো সিযা.

৩৫৪. ‘‘‘এৱং লোকং অৱেক্খন্তং, মচ্চুৰাজা ন পস্সতি’;

ইতি মং অভণি বুদ্ধো, সব্বৰোগতিকিচ্ছকো.

৩৫৫. ‘‘সহ গাথাৱসানেন, কেসমস্সুৱিৱজ্জিতো;

কাসাৱৱত্থৱসনো, আসিং ভিক্খু তথাৰহা.

৩৫৬. ‘‘সঙ্ঘিকেসু ৱিহাৰেসু, ন ৱসিং ৰোগপীড়িতো;

মা ৱিহাৰো পদুস্সীতি, ৱাতৰোগেহি পীড়িতো [ৱাচাযাভিসুপীড়িতো (স্যা. পী.), ৱাতৰোগী সুপীড়িতো (ক.)].

৩৫৭. ‘‘সঙ্কাৰকূটা আহিত্ৱা, সুসানা ৰথিকাহি চ;

ততো সঙ্ঘাটিং কৰিত্ৱা, ধাৰযিং লূখচীৱৰং.

৩৫৮. ‘‘মহাভিসক্কো তস্মিং মে, গুণে তুট্ঠো ৱিনাযকো;

লূখচীৱৰধাৰীনং, এতদগ্গে ঠপেসি মং.

৩৫৯. ‘‘পুঞ্ঞপাপপৰিক্খীণো, সব্বৰোগৱিৱজ্জিতো;

সিখীৱ অনুপাদানো, নিব্বাযিস্সমনাসৱো.

৩৬০. ‘‘কিলেসা ঝাপিতা ময্হং…পে… ৱিহৰামি অনাসৱো.

৩৬১. ‘‘স্ৱাগতং ৱত মে আসি…পে… কতং বুদ্ধস্স সাসনং.

৩৬২. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা মোঘৰাজা থেৰো ইমা গাথাযো

অভাসিত্থাতি.

মোঘৰাজত্থেৰস্সাপদানং দসমং.

কচ্চাযনৱগ্গো চতুপঞ্ঞাসমো.