৮. উৰুৱেড়কস্সপত্থেৰঅপদানং

২৫১. ‘‘পদুমুত্তৰো নাম জিনো, সব্বলোকৱিদূ মুনি;

ইতো সতসহস্সম্হি, কপ্পে উপ্পজ্জি চক্খুমা.

২৫২. ‘‘ওৱাদকো ৱিঞ্ঞাপকো, তাৰকো সব্বপাণিনং;

দেসনাকুসলো বুদ্ধো, তাৰেসি জনতং বহুং.

২৫৩. ‘‘অনুকম্পকো কাৰুণিকো, হিতেসী সব্বপাণিনং;

সম্পত্তে তিত্থিযে সব্বে, পঞ্চসীলে পতিট্ঠপি.

২৫৪. ‘‘এৱং নিৰাকুলং আসি, সুঞ্ঞতং তিত্থিযেহি চ;

ৱিচিত্তং অৰহন্তেহি, ৱসীভূতেহি তাদিভি.

২৫৫. ‘‘ৰতনানট্ঠপঞ্ঞাসং, উগ্গতো সো মহামুনি;

কঞ্চনগ্ঘিযসঙ্কাসো, বাত্তিংসৱৰলক্খণো.

২৫৬. ‘‘ৱস্সসতসহস্সানি, আযু ৱিজ্জতি তাৱদে;

তাৱতা তিট্ঠমানো সো, তাৰেসি জনতং বহুং.

২৫৭. ‘‘তদাহং হংসৱতিযা, ব্ৰাহ্মণো সাধুসম্মতো;

উপেচ্চ লোকপজ্জোতং, অস্সোসিং ধম্মদেসনং.

২৫৮. ‘‘তদা মহাপৰিসতিং, মহাপৰিসসাৱকং;

ঠপেন্তং এতদগ্গম্হি, সুত্ৱান মুদিতো অহং.

২৫৯. ‘‘মহতা পৰিৱাৰেন, নিমন্তেত্ৱা মহাজিনং;

ব্ৰাহ্মণানং সহস্সেন, সহদানমদাসহং.

২৬০. ‘‘মহাদানং দদিত্ৱান, অভিৱাদিয নাযকং;

একমন্তং ঠিতো হট্ঠো, ইদং ৱচনমব্ৰৱিং.

২৬১. ‘‘‘তযি সদ্ধায মে ৱীৰ, অধিকাৰগুণেন চ;

পৰিসা মহতী হোতু, নিব্বত্তস্স তহিং তহিং’.

২৬২. ‘‘তদা অৱোচ পৰিসং, গজগজ্জিতসুস্সৰো;

কৰৱীকৰুতো সত্থা, ‘এতং পস্সথ ব্ৰাহ্মণং.

২৬৩. ‘‘‘হেমৱণ্ণং মহাবাহুং, কমলাননলোচনং;

উদগ্গতনুজং হট্ঠং, সদ্ধৱন্তং গুণে মম.

২৬৪. ‘‘‘এস পত্থযতে ঠানং [পত্থযি তং ঠানং (স্যা.)], সীহঘোসস্স ভিক্খুনো;

অনাগতম্হি অদ্ধানে, লচ্ছসে তং মনোৰথং.

২৬৫. ‘‘‘সতসহস্সিতো কপ্পে, ওক্কাককুলসম্ভৱো;

গোতমো নাম গোত্তেন, সত্থা লোকে ভৱিস্সতি.

২৬৬. ‘‘‘তস্স ধম্মেসু দাযাদো, ওৰসো ধম্মনিম্মিতো;

কস্সপো নাম গোত্তেন, হেস্সতি সত্থু সাৱকো’.

২৬৭. ‘‘ইতো দ্ৱেনৱুতে কপ্পে, অহু সত্থা অনুত্তৰো;

অনূপমো অসদিসো, ফুস্সো লোকগ্গনাযকো.

২৬৮. ‘‘সো চ সব্বং তমং হন্ত্ৱা, ৱিজটেত্ৱা মহাজটং;

ৱস্সতে অমতং ৱুট্ঠিং, তপ্পযন্তো সদেৱকং.

২৬৯. ‘‘তদা হি বাৰাণসিযং, ৰাজা পচ্চা অহুম্হসে;

ভাতৰোম্হ তযো সব্বে, সংৱিসট্ঠাৱ ৰাজিনো.

২৭০. ‘‘ৱীৰঙ্গৰূপা বলিনো, সঙ্গামে অপৰাজিতা;

তদা কুপিতপচ্চন্তো [কুপ্পতি পচ্চন্তো (ক.)], অম্হে আহ মহীপতি.

২৭১. ‘‘‘এথ গন্ত্ৱান পচ্চন্তং, সোধেত্ৱা অট্টৱীবলং;

খেমং ৱিজিৰিতং কত্ৱা, পুন দেথাতি ভাসথ’.

২৭২. ‘‘ততো মযং অৱোচুম্হ, যদি দেয্যাসি নাযকং;

উপট্ঠানায অম্হাকং, সাধযিস্সাম ৱো ততো.

২৭৩. ‘‘ততো মযং লদ্ধৱৰা, ভূমিপালেন পেসিতা;

নিক্খিত্তসত্থং পচ্চন্তং, কত্ৱা পুনৰুপচ্চ তং.

২৭৪. ‘‘যাচিত্ৱা সত্থুপট্ঠানং, ৰাজানং লোকনাযকং;

মুনিৱীৰং লভিত্ৱান, যাৱজীৱং যজিম্হ তং.

২৭৫. ‘‘মহগ্ঘানি চ ৱত্থানি, পণীতানি ৰসানি চ;

সেনাসনানি ৰম্মানি, ভেসজ্জানি হিতানি চ.

২৭৬. ‘‘দত্ৱা সসঙ্ঘমুনিনো [সসংঘস্স মুনে (সী. পী.)], ধম্মেনুপ্পাদিতানি নো;

সীলৱন্তো কাৰুণিকা, ভাৱনাযুত্তমানসা.

২৭৭. ‘‘সদ্ধা পৰিচৰিত্ৱান, মেত্তচিত্তেন নাযকং;

নিব্বুতে তম্হি লোকগ্গে, পূজং কত্ৱা যথাবলং.

২৭৮. ‘‘ততো চুতা সন্তুসিতং [তাৱতিংসং (স্যা.)], গতা তত্থ মহাসুখং;

অনুভূতা মযং সব্বে, বুদ্ধপূজাযিদং ফলং.

২৭৯. ‘‘মাযাকাৰো যথা ৰঙ্গে [লদ্ধো (স্যা. পী.)], দস্সেসি ৱিকতিং বহুং;

তথা ভৱে ভমন্তোহং [গমেন্তোহং (ক.), ভৱন্তোহং (স্যা.)], ৱিদেহাধিপতী অহুং.

২৮০. ‘‘গুণাচেড়স্স ৱাক্যেন, মিচ্ছাদিট্ঠিগতাসযো;

নৰকং মগ্গমাৰূড়্হো, ৰুচায মম ধীতুযা.

২৮১. ‘‘ওৱাদং নাদিযিত্ৱান, ব্ৰহ্মুনা নাৰদেনহং;

বহুধা সংসিতো সন্তো, দিট্ঠিং হিত্ৱান পাপিকং.

২৮২. ‘‘পূৰযিত্ৱা ৱিসেসেন, দস কম্মপথানিহং;

হিত্ৱান দেহমগমিং, সগ্গং সভৱনং যথা.

২৮৩. ‘‘পচ্ছিমে ভৱে সম্পত্তে, ব্ৰহ্মবন্ধু অহোসহং;

বাৰাণসিযং ফীতাযং, জাতো ৱিপ্পমহাকুলে.

২৮৪. ‘‘মচ্চুব্যাধিজৰা ভীতো, ওগাহেত্ৱা মহাৱনং [জহিত্ৱান মহাধনং (সী.), জহিত্ৱা চ মহাধনং (পী.)];

নিব্বানং পদমেসন্তো, জটিলেসু পৰিব্বজিং.

২৮৫. ‘‘তদা দ্ৱে ভাতৰো ময্হং, পব্বজিংসু মযা সহ;

উৰুৱেড়াযং মাপেত্ৱা, অস্সমং নিৱসিং অহং.

২৮৬. ‘‘কস্সপো নাম গোত্তেন, উৰুৱেড়নিৱাসিকো [উৰুৱেড়ায নিৱসিং (স্যা.)];

ততো মে আসি পঞ্ঞত্তি, উৰুৱেড়কস্সপো ইতি.

২৮৭. ‘‘নদীসকাসে ভাতা মে, নদীকস্সপসৱ্হযো;

আসী সকাসনামেন, গযাযং গযাকস্সপো.

২৮৮. ‘‘দ্ৱে সতানি কনিট্ঠস্স, তীণি মজ্ঝস্স ভাতুনো;

মম পঞ্চ সতানূনা, সিস্সা সব্বে মমানুগা.

২৮৯. ‘‘তদা উপেচ্চ মং বুদ্ধো, কত্ৱান ৱিৱিধানি মে [কত্ৱা নানাৱিধানি মে (সী.)];

পাটিহীৰানি লোকগ্গো, ৱিনেসি নৰসাৰথি.

২৯০. ‘‘সহস্সপৰিৱাৰেন, অহোসিং এহিভিক্খুকো;

তেহেৱ সহ সব্বেহি, অৰহত্তমপাপুণিং.

২৯১. ‘‘তে চেৱঞ্ঞে চ বহৱো, সিস্সা মং পৰিৱাৰযুং;

সাসিতুঞ্চ সমত্থোহং, ততো মং ইসিসত্তমো.

২৯২. ‘‘মহাপৰিসভাৱস্মিং, এতদগ্গে ঠপেসি মং;

অহো বুদ্ধে কতং কাৰং, সফলং মে অজাযথ.

২৯৩. ‘‘কিলেসা ঝাপিতা ময্হং…পে… ৱিহৰামি অনাসৱো.

২৯৪. ‘‘স্ৱাগতং ৱত মে আসি…পে… কতং বুদ্ধস্স সাসনং.

২৯৫. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা উৰুৱেড়কস্সপো থেৰো ইমা গাথাযো

অভাসিত্থাতি.

উৰুৱেড়কস্সপত্থেৰস্সাপদানং অট্ঠমং.