৭. মহাকোট্ঠিকত্থেৰঅপদানং

২২১. ‘‘পদুমুত্তৰো নাম জিনো, সব্বলোকৱিদূ মুনি;

ইতো সতসহস্সম্হি, কপ্পে উপ্পজ্জি চক্খুমা.

২২২. ‘‘ওৱাদকো ৱিঞ্ঞাপকো, তাৰকো সব্বপাণিনং;

দেসনাকুসলো বুদ্ধো, তাৰেসি জনতং বহুং.

২২৩. ‘‘অনুকম্পকো কাৰুণিকো, হিতেসী সব্বপাণিনং;

সম্পত্তে তিত্থিযে সব্বে, পঞ্চসীলে পতিট্ঠপি.

২২৪. ‘‘এৱং নিৰাকুলং আসি, সুঞ্ঞতং তিত্থিযেহি চ;

ৱিচিত্তং অৰহন্তেহি, ৱসীভূতেহি তাদিভি.

২২৫. ‘‘ৰতনানট্ঠপঞ্ঞাসং, উগ্গতো সো মহামুনি;

কঞ্চনগ্ঘিযসঙ্কাসো, বাত্তিংসৱৰলক্খণো.

২২৬. ‘‘ৱস্সসতসহস্সানি, আযু ৱিজ্জতি তাৱদে;

তাৱতা তিট্ঠমানো সো, তাৰেসি জনতং বহুং.

২২৭. ‘‘তদাহং হংসৱতিযং, ব্ৰাহ্মণো ৱেদপাৰগূ;

উপেচ্চ সব্বলোকগ্গং [সব্বসাৰগ্গং (সী.), সত্তপাৰগং (পী.)], অস্সোসিং ধম্মদেসনং.

২২৮. ‘‘তদা সো সাৱকং ৱীৰো, পভিন্নমতিগোচৰং;

অত্থে ধম্মে নিৰুত্তে চ, পটিভানে চ কোৱিদং.

২২৯. ‘‘ঠপেসি এতদগ্গম্হি, তং সুত্ৱা মুদিতো অহং;

সসাৱকং জিনৱৰং, সত্তাহং ভোজযিং তদা.

২৩০. ‘‘দুস্সেহচ্ছাদযিত্ৱান, সসিস্সং বুদ্ধিসাগৰং [বুদ্ধসাগৰং (ক.)];

নিপচ্চ পাদমূলম্হি, তং ঠানং পত্থযিং অহং.

২৩১. ‘‘ততো অৱোচ লোকগ্গো, ‘পস্সথেতং দিজুত্তমং;

ৱিনতং পাদমূলে মে, কমলোদৰসপ্পভং.

২৩২. ‘‘‘বুদ্ধসেট্ঠস্স [সেট্ঠং বুদ্ধস্স (স্যা. ক.)] ভিক্খুস্স, ঠানং পত্থযতে অযং;

তায সদ্ধায চাগেন, সদ্ধম্মস্সৱনেন [তেন ধম্মস্সৱেন (সী. পী. ক.)] চ.

২৩৩. ‘‘‘সব্বত্থ সুখিতো হুত্ৱা, সংসৰিত্ৱা ভৱাভৱে;

অনাগতম্হি অদ্ধানে, লচ্ছসে তং মনোৰথং.

২৩৪. ‘‘‘সতসহস্সিতো কপ্পে, ওক্কাককুলসম্ভৱো;

গোতমো নাম গোত্তেন, সত্থা লোকে ভৱিস্সতি.

২৩৫. ‘‘‘তস্স ধম্মেসু দাযাদো, ওৰসো ধম্মনিম্মিতো;

কোট্ঠিকো নাম নামেন, হেস্সতি সত্থু সাৱকো’.

২৩৬. ‘‘তং সুত্ৱা মুদিতো হুত্ৱা, যাৱজীৱং তদা জিনং;

মেত্তচিত্তো পৰিচৰিং, সতো পঞ্ঞাসমাহিতো.

২৩৭. ‘‘তেন কম্মৱিপাকেন, চেতনাপণিধীহি চ;

জহিত্ৱা মানুসং দেহং, তাৱতিংসমগচ্ছহং.

২৩৮. ‘‘সতানং তীণিক্খত্তুঞ্চ, দেৱৰজ্জমকাৰযিং;

সতানং পঞ্চক্খত্তুঞ্চ, চক্কৱত্তী অহোসহং.

২৩৯. ‘‘পদেসৰজ্জং ৱিপুলং, গণনাতো অসঙ্খিযং;

সব্বত্থ সুখিতো আসিং, তস্স কম্মস্স ৱাহসা.

২৪০. ‘‘দুৱে ভৱে সংসৰামি, দেৱত্তে অথ মানুসে;

অঞ্ঞং গতিং ন গচ্ছামি, সুচিণ্ণস্স ইদং ফলং.

২৪১. ‘‘দুৱে কুলে পজাযামি, খত্তিযে অথ ব্ৰাহ্মণে;

‘‘নীচে কুলে ন জাযামি, সুচিণ্ণস্স ইদং ফলং.

২৪২. ‘‘পচ্ছিমে ভৱে সম্পত্তে, ব্ৰহ্মবন্ধু অহোসহং;

সাৱত্থিযং ৱিপ্পকুলে, পচ্চাজাতো মহদ্ধনে.

২৪৩. ‘‘মাতা চন্দৱতী নাম, পিতা মে অস্সলাযনো;

যদা মে পিতৰং বুদ্ধো, ৱিনযী সব্বসুদ্ধিযা.

২৪৪. ‘‘তদা পসন্নো সুগতে, পব্বজিং অনগাৰিযং;

মোগ্গল্লানো আচৰিযো, উপজ্ঝা সাৰিসম্ভৱো.

২৪৫. ‘‘কেসেসু ছিজ্জমানেসু, দিট্ঠি ছিন্না সমূলিকা;

নিৱাসেন্তো চ কাসাৱং, অৰহত্তমপাপুণিং.

২৪৬. ‘‘অত্থধম্মনিৰুত্তীসু, পটিভানে চ মে মতি;

পভিন্না তেন লোকগ্গো, এতদগ্গে ঠপেসি মং.

২৪৭. ‘‘অসন্দিট্ঠং ৱিযাকাসিং, উপতিস্সেন পুচ্ছিতো;

পটিসম্ভিদাসু তেনাহং, অগ্গো সম্বুদ্ধসাসনে.

২৪৮. ‘‘কিলেসা ঝাপিতা ময্হং…পে… ৱিহৰামি অনাসৱো.

২৪৯. ‘‘স্ৱাগতং ৱত মে আসি…পে… কতং বুদ্ধস্স সাসনং.

২৫০. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা মহাকোট্ঠিকো থেৰো ইমা গাথাযো

অভাসিত্থাতি.

মহাকোট্ঠিকত্থেৰস্সাপদানং সত্তমং.