৫. কুমাৰকস্সপত্থেৰঅপদানং

১৫০. ‘‘ইতো সতসহস্সম্হি, কপ্পে উপ্পজ্জি নাযকো;

সব্বলোকহিতো ৱীৰো, পদুমুত্তৰনামকো.

১৫১. ‘‘তদাহং ব্ৰাহ্মণো হুত্ৱা, ৱিস্সুতো ৱেদপাৰগূ;

দিৱাৱিহাৰং ৱিচৰং, অদ্দসং লোকনাযকং.

১৫২. ‘‘চতুসচ্চং পকাসেন্তং, বোধযন্তং সদেৱকং;

ৱিচিত্তকথিকানগ্গং, ৱণ্ণযন্তং মহাজনে.

১৫৩. ‘‘তদা মুদিতচিত্তোহং, নিমন্তেত্ৱা তথাগতং;

নানাৰত্তেহি ৱত্থেহি, অলঙ্কৰিত্ৱান মণ্ডপং.

১৫৪. ‘‘নানাৰতনপজ্জোতং, সসঙ্ঘং ভোজযিং তহিং;

ভোজযিত্ৱান সত্তাহং, নানগ্গৰসভোজনং.

১৫৫. ‘‘নানাচিত্তেহি [নানাৱণ্ণেহি (সী.)] পুপ্ফেহি, পূজযিত্ৱা সসাৱকং [মহাৱীৰং (ক.)];

নিপচ্চ পাদমূলম্হি, তং ঠানং পত্থযিং অহং.

১৫৬. ‘‘তদা মুনিৱৰো আহ, কৰুণেকৰসাসযো [কৰুণো কৰুণালযো (স্যা.)];

‘পস্সথেতং দিজৱৰং, পদুমাননলোচনং.

১৫৭. ‘‘‘পীতিপামোজ্জবহুলং, সমুগ্গততনূৰুহং;

হাসম্হিতৱিসালক্খং, মম সাসনলালসং.

১৫৮. ‘‘‘পতিতং পাদমূলে মে, একাৱত্থসুমানসং [একৱত্থং সুমানসং (স্যা. ক.)];

এস পত্থেতি তং ঠানং, ৱিচিত্তকথিকত্তনং [ৱিচিত্তকথিকত্তদং (সী. পী.)].

১৫৯. ‘‘‘সতসহস্সিতো কপ্পে, ওক্কাককুলসম্ভৱো;

গোতমো নাম গোত্তেন, সত্থা লোকে ভৱিস্সতি.

১৬০. ‘‘‘তস্স ধম্মেসু দাযাদো, ওৰসো ধম্মনিম্মিতো;

কুমাৰকস্সপো নাম, হেস্সতি সত্থু সাৱকো.

১৬১. ‘‘‘ৱিচিত্তপুপ্ফদুস্সানং, ৰতনানঞ্চ ৱাহসা;

ৱিচিত্তকথিকানং সো, অগ্গতং পাপুণিস্সতি’.

১৬২. ‘‘তেন কম্মেন সুকতেন, চেতনাপণিধীহি চ;

জহিত্ৱা মানুসং দেহং, তাৱতিংসমগচ্ছহং.

১৬৩. ‘‘পৰিব্ভমং ভৱাভৱে [ভৱাকাসে (সী. পী.)], ৰঙ্গমজ্ঝে যথা নটো;

সাখমিগত্ৰজো হুত্ৱা, মিগিযা কুচ্ছিমোক্কমিং.

১৬৪. ‘‘তদা মযি কুচ্ছিগতে, ৱজ্ঝৱাৰো উপট্ঠিতো;

সাখেন চত্তা মে মাতা, নিগ্ৰোধং সৰণং গতা.

১৬৫. ‘‘তেন সা মিগৰাজেন, মৰণা পৰিমোচিতা;

পৰিচ্চজিত্ৱা সপাণং [সংপাণং (সী. পী.)], মমেৱং ওৱদী তদা.

১৬৬. ‘‘‘নিগ্ৰোধমেৱ সেৱেয্য, ন সাখমুপসংৱসে;

নিগ্ৰোধস্মিং মতং সেয্যো, যঞ্চে সাখম্হি জীৱিতং’.

১৬৭. ‘‘তেনানুসিট্ঠা মিগযূথপেন, অহঞ্চ মাতা চ তথেতৰে চ [চিতৰে চ (স্যা.), তস্সোৱাদেন (পী.), চিতৰে চ তস্সোৱাদং (ক.)];

আগম্ম ৰম্মং তুসিতাধিৱাসং, গতা পৱাসং সঘৰং যথেৱ.

১৬৮. ‘‘পুনো কস্সপৱীৰস্স, অত্থমেন্তম্হি সাসনে;

আৰুয্হ সেলসিখৰং, যুঞ্জিত্ৱা জিনসাসনং.

১৬৯. ‘‘ইদানাহং ৰাজগহে, জাতো সেট্ঠিকুলে অহুং;

আপন্নসত্তা মে মাতা, পব্বজি অনগাৰিযং.

১৭০. ‘‘সগব্ভং তং ৱিদিত্ৱান, দেৱদত্তমুপানযুং;

সো অৱোচ ‘ৱিনাসেথ, পাপিকং ভিক্খুনিং ইমং’.

১৭১. ‘‘ইদানিপি মুনিন্দেন, জিনেন অনুকম্পিতা;

সুখিনী অজনী ময্হং, মাতা ভিক্খুনুপস্সযে.

১৭২. ‘‘তং ৱিদিত্ৱা মহীপালো, কোসলো মং অপোসযি;

কুমাৰপৰিহাৰেন, নামেনাহঞ্চ কস্সপো.

১৭৩. ‘‘মহাকস্সপমাগম্ম, অহং কুমাৰকস্সপো;

ৱম্মিকসদিসং কাযং, সুত্ৱা বুদ্ধেন দেসিতং.

১৭৪. ‘‘ততো চিত্তং ৱিমুচ্চি মে, অনুপাদায সব্বসো;

পাযাসিং দমযিত্ৱাহং, এতদগ্গমপাপুণিং.

১৭৫. ‘‘কিলেসা ঝাপিতা ময্হং…পে… ৱিহৰামি অনাসৱো.

১৭৬. ‘‘স্ৱাগতং ৱত মে আসি…পে… কতং বুদ্ধস্স সাসনং.

১৭৭. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা কুমাৰকস্সপো থেৰো ইমা গাথাযো

অভাসিত্থাতি.

কুমাৰকস্সপত্থেৰস্সাপদানং পঞ্চমং.

চতুৱীসতিমং ভাণৱাৰং.