৪. দব্বমল্লপুত্তত্থেৰঅপদানং

১০৮. ‘‘পদুমুত্তৰো নাম জিনো, সব্বলোকৱিদূ মুনি;

ইতো সতসহস্সম্হি, কপ্পে উপ্পজ্জি চক্খুমা.

১০৯. ‘‘ওৱাদকো ৱিঞ্ঞাপকো, তাৰকো সব্বপাণিনং;

দেসনাকুসলো বুদ্ধো, তাৰেসি জনতং বহুং.

১১০. ‘‘অনুকম্পকো কাৰুণিকো, হিতেসী সব্বপাণিনং;

সম্পত্তে তিত্থিযে সব্বে, পঞ্চসীলে পতিট্ঠপি [পতিট্ঠহি (স্যা. ক.)].

১১১. ‘‘এৱং নিৰাকুলং আসি, সুঞ্ঞতং [সুঞ্ঞকং (সী.) এৱমুপৰিপি] তিত্থিযেহি চ;

ৱিচিত্তং অৰহন্তেহি, ৱসীভূতেহি তাদিভি.

১১২. ‘‘ৰতনানট্ঠপঞ্ঞাসং, উগ্গতো সো মহামুনি;

কঞ্চনগ্ঘিযসঙ্কাসো, বাত্তিংসৱৰলক্খণো.

১১৩. ‘‘ৱস্সসতসহস্সানি, আযু ৱিজ্জতি তাৱদে;

তাৱতা তিট্ঠমানো সো, তাৰেসি জনতং বহুং.

১১৪. ‘‘তদাহং হংসৱতিযং, সেট্ঠিপুত্তো মহাযসো;

উপেত্ৱা লোকপজ্জোতং, অস্সোসিং ধম্মদেসনং.

১১৫. ‘‘সেনাসনানি ভিক্খূনং, পঞ্ঞাপেন্তং সসাৱকং;

কিত্তযন্তস্স ৱচনং, সুণিত্ৱা মুদিতো অহং.

১১৬. ‘‘অধিকাৰং সসঙ্ঘস্স, কত্ৱা তস্স মহেসিনো;

নিপচ্চ সিৰসা পাদে, তং ঠানমভিপত্থযিং.

১১৭. ‘‘তদাহ স মহাৱীৰো, মম কম্মং পকিত্তযং;

‘যো সসঙ্ঘমভোজেসি, সত্তাহং লোকনাযকং.

১১৮. ‘‘‘সোযং কমলপত্তক্খো, সীহংসো কনকত্তচো;

মম পাদমূলে নিপতি [পতিতো (পী.)], পত্থযং ঠানমুত্তমং.

১১৯. ‘‘‘সতসহস্সিতো কপ্পে, ওক্কাককুলসম্ভৱো;

গোতমো নাম গোত্তেন, সত্থা লোকে ভৱিস্সতি.

১২০. ‘‘‘সাৱকো তস্স বুদ্ধস্স, দব্বো নামেন ৱিস্সুতো;

সেনাসনপঞ্ঞাপকো, অগ্গো হেস্সতিযং তদা’.

১২১. ‘‘তেন কম্মেন সুকতেন, চেতনাপণিধীহি চ;

জহিত্ৱা মানুসং দেহং, তাৱতিংসমগচ্ছহং.

১২২. ‘‘সতানং তীণিক্খত্তুঞ্চ, দেৱৰজ্জমকাৰযিং;

সতানং পঞ্চক্খত্তুঞ্চ, চক্কৱত্তী অহোসহং.

১২৩. ‘‘পদেসৰজ্জং ৱিপুলং, গণনাতো অসঙ্খিযং;

সব্বত্থ সুখিতো আসিং, তস্স কম্মস্স ৱাহসা.

১২৪. ‘‘একনৱুতিতো কপ্পে, ৱিপস্সী নাম নাযকো;

উপ্পজ্জি চাৰুদস্সনো [চাৰুনযনো (সী. স্যা. পী.)], সব্বধম্মৱিপস্সকো.

১২৫. ‘‘দুট্ঠচিত্তো উপৱদিং, সাৱকং তস্স তাদিনো;

সব্বাসৱপৰিক্খীণং, সুদ্ধোতি চ ৱিজানিয.

১২৬. ‘‘তস্সেৱ নৰৱীৰস্স, সাৱকানং মহেসিনং;

সলাকঞ্চ গহেত্ৱান [সলাকং পগ্গহেত্ৱান (সী. পী.)], খীৰোদনমদাসহং.

১২৭. ‘‘ইমম্হি ভদ্দকে কপ্পে, ব্ৰহ্মবন্ধু মহাযসো;

কস্সপো নাম গোত্তেন, উপ্পজ্জি ৱদতং ৱৰো.

১২৮. ‘‘সাসনং জোতযিত্ৱান, অভিভুয্য কুতিত্থিযে;

ৱিনেয্যে ৱিনযিত্ৱাৱ, নিব্বুতো সো সসাৱকো.

১২৯. ‘‘সসিস্সে নিব্বুতে নাথে, অত্থমেন্তম্হি সাসনে;

দেৱা কন্দিংসু সংৱিগ্গা, মুত্তকেসা ৰুদম্মুখা.

১৩০. ‘‘নিব্বাযিস্সতি ধম্মক্খো, ন পস্সিস্সাম সুব্বতে;

ন সুণিস্সাম সদ্ধম্মং, অহো নো অপ্পপুঞ্ঞতা.

১৩১. ‘‘তদাযং পথৱী সব্বা, অচলা সা চলাচলা [চলাচলী (সী.), পুলাপুলী (স্যা.)];

সাগৰো চ সসোকোৱ, ৱিনদী কৰুণং গিৰং.

১৩২. ‘‘চতুদ্দিসা দুন্দুভিযো, নাদযিংসু অমানুসা;

সমন্ততো অসনিযো, ফলিংসু চ ভযাৱহা.

১৩৩. ‘‘উক্কা পতিংসু নভসা, ধূমকেতু চ দিস্সতি;

সধূমা জালৱট্টা চ [সব্বথলজসত্তা চ (সী.)], ৰৱিংসু কৰুণং মিগা.

১৩৪. ‘‘উপ্পাদে দাৰুণে দিস্ৱা, সাসনত্থঙ্গসূচকে;

সংৱিগ্গা ভিক্খৱো সত্ত, চিন্তযিম্হ মযং তদা.

১৩৫. ‘‘সাসনেন ৱিনাম্হাকং, জীৱিতেন অলং মযং;

পৱিসিত্ৱা মহাৰঞ্ঞং, যুঞ্জাম জিনসাসনং.

১৩৬. ‘‘অদ্দসম্হ তদাৰঞ্ঞে, উব্বিদ্ধং সেলমুত্তমং;

নিস্সেণিযা তমাৰুয্হ, নিস্সেণিং পাতযিম্হসে.

১৩৭. ‘‘তদা ওৱদি নো থেৰো, বুদ্ধুপ্পাদো সুদুল্লভো;

সদ্ধাতিদুল্লভা লদ্ধা, থোকং সেসঞ্চ সাসনং.

১৩৮. ‘‘নিপতন্তি খণাতীতা, অনন্তে দুক্খসাগৰে;

তস্মা পযোগো কত্তব্বো, যাৱ ঠাতি মুনে মতং [যাৱ তিট্ঠতি সাসনং (স্যা.)].

১৩৯. ‘‘অৰহা আসি সো থেৰো, অনাগামী তদানুগো;

সুসীলা ইতৰে যুত্তা, দেৱলোকং অগম্হসে.

১৪০. ‘‘নিব্বুতো তিণ্ণসংসাৰো, সুদ্ধাৱাসে চ এককো;

অহঞ্চ পক্কুসাতি চ, সভিযো বাহিযো তথা.

১৪১. ‘‘কুমাৰকস্সপো চেৱ, তত্থ তত্থূপগা মযং;

সংসাৰবন্ধনা মুত্তা, গোতমেনানুকম্পিতা.

১৪২. ‘‘মল্লেসু কুসিনাৰাযং, জাতো গব্ভেৱ মে সতো;

মাতা মতা চিতাৰুড়্হা, ততো নিপ্পতিতো অহং.

১৪৩. ‘‘পতিতো দব্বপুঞ্জম্হি, ততো দব্বোতি ৱিস্সুতো;

ব্ৰহ্মচাৰীবলেনাহং, ৱিমুত্তো সত্তৱস্সিকো.

১৪৪. ‘‘খীৰোদনবলেনাহং, পঞ্চহঙ্গেহুপাগতো;

খীণাসৱোপৱাদেন, পাপেহি বহুচোদিতো.

১৪৫. ‘‘উভো পুঞ্ঞঞ্চ পাপঞ্চ, ৱীতিৱত্তোম্হি দানিহং;

পত্ৱান পৰমং সন্তিং, ৱিহৰামি অনাসৱো.

১৪৬. ‘‘সেনাসনং পঞ্ঞাপযিং, হাসযিত্ৱান সুব্বতে;

জিনো তস্মিং গুণে তুট্ঠো, এতদগ্গে ঠপেসি মং.

১৪৭. ‘‘কিলেসা ঝাপিতা ময্হং…পে… ৱিহৰামি অনাসৱো.

১৪৮. ‘‘স্ৱাগতং ৱত মে আসি…পে… কতং বুদ্ধস্স সাসনং.

১৪৯. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা দব্বমল্লপুত্তো থেৰো ইমা গাথাযো

অভাসিত্থাতি.

দব্বমল্লপুত্তত্থেৰস্সাপদানং চতুত্থং.