৩. মহাকপ্পিনত্থেৰঅপদানং

৬৬. ‘‘পদুমুত্তৰো নাম জিনো, সব্বধম্মান পাৰগূ;

উদিতো অজটাকাসে [জগদাকাসে (সী.), জলদাকাসে (পী.)], ৰৱীৱ সৰদম্বৰে.

৬৭. ‘‘ৱচনাভায বোধেতি, ৱেনেয্যপদুমানি সো;

কিলেসপঙ্কং সোসেতি, মতিৰংসীহি নাযকো.

৬৮. ‘‘তিত্থিযানং যসে [যসো (সী. পী.)] হন্তি, খজ্জোতাভা যথা ৰৱি;

সচ্চত্থাভং পকাসেতি, ৰতনংৱ দিৱাকৰো.

৬৯. ‘‘গুণানং আযতিভূতো, ৰতনানংৱ সাগৰো;

পজ্জুন্নোৰিৱ ভূতানি, ধম্মমেঘেন ৱস্সতি.

৭০. ‘‘অক্খদস্সো তদা আসিং, নগৰে হংসসৱ্হযে;

উপেচ্চ ধম্মমস্সোসিং, জলজুত্তমনামিনো.

৭১. ‘‘ওৱাদকস্স ভিক্খূনং, সাৱকস্স কতাৱিনো;

গুণং পকাসযন্তস্স, তপ্পযন্তস্স [তোসযন্তস্স (সী.), হাসযন্তস্স (স্যা.), ৱাসযন্তস্স (পী.)] মে মনং.

৭২. ‘‘সুত্ৱা পতীতো সুমনো, নিমন্তেত্ৱা তথাগতং;

সসিস্সং ভোজযিত্ৱান, তং ঠানমভিপত্থযিং.

৭৩. ‘‘তদা হংসসমভাগো, হংসদুন্দুভিনিস্সনো [হংসদুন্দুভিসুস্সৰো (সী.)];

পস্সথেতং মহামত্তং, ৱিনিচ্ছযৱিসাৰদং.

৭৪. ‘‘পতিতং পাদমূলে মে, সমুগ্গততনূৰুহং;

জীমূতৱণ্ণং পীণংসং, পসন্ননযনাননং.

৭৫. ‘‘পৰিৱাৰেন মহতা, ৰাজযুত্তং মহাযসং;

এসো কতাৱিনো ঠানং, পত্থেতি মুদিতাসযো.

৭৬. ‘‘‘ইমিনা পণিপাতেন, চাগেন পণিধীহি চ [পিণ্ডপাতেন, চেতনা পণিধীহি চ (সী.)];

কপ্পসতসহস্সানি, নুপপজ্জতি দুগ্গতিং.

৭৭. ‘‘‘দেৱেসু দেৱসোভগ্গং, মনুস্সেসু মহন্ততং;

অনুভোত্ৱান সেসেন [অভুত্ৱাৱ সেসেন (সী.), অনুভোত্ৱাৱ সেসেন (স্যা.)], নিব্বানং পাপুণিস্সতি.

৭৮. ‘‘‘সতসহস্সিতো কপ্পে, ওক্কাককুলসম্ভৱো;

গোতমো নাম গোত্তেন, সত্থা লোকে ভৱিস্সতি.

৭৯. ‘‘‘তস্স ধম্মেসু দাযাদো, ওৰসো ধম্মনিম্মিতো;

কপ্পিনো নাম নামেন, হেস্সতি সত্থু সাৱকো’.

৮০. ‘‘ততোহং সুকতং কাৰং, কত্ৱান জিনসাসনে;

জহিত্ৱা মানুসং দেহং, তুসিতং অগমাসহং.

৮১. ‘‘দেৱমানুসৰজ্জানি, সতসো অনুসাসিয;

বাৰাণসিযমাসন্নে, জাতো কেনিযজাতিযং.

৮২. ‘‘সহস্সপৰিৱাৰেন [সতসহস্সপৰিৱাৰো (স্যা.)], সপজাপতিকো অহং;

পঞ্চ পচ্চেকবুদ্ধানং, সতানি সমুপট্ঠহিং.

৮৩. ‘‘তেমাসং ভোজযিত্ৱান, পচ্ছাদম্হ তিচীৱৰং;

ততো চুতা মযং সব্বে, অহুম্হ তিদসূপগা.

৮৪. ‘‘পুনো সব্বে মনুস্সত্তং, অগমিম্হ ততো চুতা;

কুক্কুটম্হি পুৰে জাতা, হিমৱন্তস্স পস্সতো.

৮৫. ‘‘কপ্পিনো নামহং আসিং, ৰাজপুত্তো মহাযসো;

সেসামচ্চকুলে জাতা, মমেৱ পৰিৱাৰযুং.

৮৬. ‘‘মহাৰজ্জসুখং পত্তো, সব্বকামসমিদ্ধিমা;

ৱাণিজেহি সমক্খাতং, বুদ্ধুপ্পাদমহং সুণিং.

৮৭. ‘‘‘বুদ্ধো লোকে সমুপ্পন্নো, অসমো একপুগ্গলো;

সো পকাসেতি সদ্ধম্মং, অমতং সুখমুত্তমং.

৮৮. ‘‘‘সুযুত্তা তস্স সিস্সা চ, সুমুত্তা চ অনাসৱা’;

‘‘সুত্ৱা নেসং সুৱচনং, সক্কৰিত্ৱান ৱাণিজে.

৮৯. ‘‘পহায ৰজ্জং সামচ্চো, নিক্খমিং বুদ্ধমামকো;

নদিং দিস্ৱা মহাচন্দং, পূৰিতং সমতিত্তিকং.

৯০. ‘‘অপ্পতিট্ঠং অনালম্বং, দুত্তৰং সীঘৱাহিনিং;

গুণং সৰিত্ৱা বুদ্ধস্স, সোত্থিনা সমতিক্কমিং.

৯১. ‘‘‘ভৱসোতং সচে বুদ্ধো, তিণ্ণো লোকন্তগূ ৱিদূ [ৱিভূ (ক.)];

এতেন সচ্চৱজ্জেন, গমনং মে সমিজ্ঝতু.

৯২. ‘‘‘যদি সন্তিগমো মগ্গো, মোক্খো চচ্চন্তিকং [মোক্খদং সন্তিকং (স্যা.)] সুখং;

এতেন সচ্চৱজ্জেন, গমনং মে সমিজ্ঝতু.

৯৩. ‘‘‘সঙ্ঘো চে তিণ্ণকন্তাৰো, পুঞ্ঞক্খেত্তো অনুত্তৰো;

এতেন সচ্চৱজ্জেন, গমনং মে সমিজ্ঝতু’.

৯৪. ‘‘সহ কতে সচ্চৱৰে, মগ্গা অপগতং জলং;

ততো সুখেন উত্তিণ্ণো, নদীতীৰে মনোৰমে.

৯৫. ‘‘নিসিন্নং অদ্দসং বুদ্ধং, উদেন্তংৱ পভঙ্কৰং;

জলন্তং হেমসেলংৱ, দীপৰুক্খংৱ জোতিতং.

৯৬. ‘‘সসিংৱ তাৰাসহিতং, সাৱকেহি পুৰক্খতং;

ৱাসৱং ৱিয ৱস্সন্তং, দেসনাজলদন্তৰং [দেৱেন জলনন্দনং (স্যা. পী.)].

৯৭. ‘‘ৱন্দিত্ৱান সহামচ্চো, একমন্তমুপাৱিসিং;

ততো নো আসযং [ততো অজ্ঝাসযং (স্যা.)] ঞত্ৱা, বুদ্ধো ধম্মমদেসযি.

৯৮. ‘‘সুত্ৱান ধম্মং ৱিমলং, অৱোচুম্হ মযং জিনং;

‘পব্বাজেহি মহাৱীৰ, নিব্বিন্দাম্হ [নিব্বিন্নাম্হ (সী. পী.), ওতিণ্ণম্হ (স্যা.)] মযং ভৱে’.

৯৯. ‘‘‘স্ৱক্খাতো ভিক্খৱে ধম্মো, দুক্খন্তকৰণায ৱো;

চৰথ ব্ৰহ্মচৰিযং’, ইচ্চাহ মুনিসত্তমো.

১০০. ‘‘সহ ৱাচায সব্বেপি, ভিক্খুৱেসধৰা মযং;

অহুম্হ উপসম্পন্না, সোতাপন্না চ সাসনে.

১০১. ‘‘ততো জেতৱনং গন্ত্ৱা, অনুসাসি ৱিনাযকো;

অনুসিট্ঠো জিনেনাহং, অৰহত্তমপাপুণিং.

১০২. ‘‘ততো ভিক্খুসহস্সানি [ভিক্খুসহস্সং তং (সী. পী.)], অনুসাসিমহং তদা;

মমানুসাসনকৰা, তেপি আসুং অনাসৱা.

১০৩. ‘‘জিনো তস্মিং গুণে তুট্ঠো, এতদগ্গে ঠপেসি মং;

ভিক্খুওৱাদকানগ্গো, কপ্পিনোতি মহাজনে.

১০৪. ‘‘সতসহস্সে কতং কম্মং, ফলং দস্সেসি মে ইধ;

পমুত্তো সৰৱেগোৱ, কিলেসে ঝাপযিং [ঝাপযী (সী.)] মম.

১০৫. ‘‘কিলেসা ঝাপিতা ময্হং…পে… ৱিহৰামি অনাসৱো.

১০৬. ‘‘স্ৱাগতং ৱত মে আসি…পে… কতং বুদ্ধস্স সাসনং.

১০৭. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা মহাকপ্পিনো থেৰো ইমা গাথাযো

অভাসিত্থাতি.

মহাকপ্পিনত্থেৰস্সাপদানং ততিযং.