৯. সুভদ্দত্থেৰঅপদানং

১০১. ‘‘পদুমুত্তৰো লোকৱিদূ, আহুতীনং পটিগ্গহো;

জনতং উদ্ধৰিত্ৱান, নিব্বাযতি মহাযসো.

১০২. ‘‘নিব্বাযন্তে চ সম্বুদ্ধে, দসসহস্সি কম্পথ;

জনকাযো মহা আসি, দেৱা সন্নিপতুং তদা.

১০৩. ‘‘চন্দনং পূৰযিত্ৱান, তগৰামল্লিকাহি চ;

হট্ঠো হট্ঠেন চিত্তেন, আৰোপযিং [আলেপেসিং (সী.), আৰোপেসিং (স্যা.)] নৰুত্তমং.

১০৪. ‘‘মম সঙ্কপ্পমঞ্ঞায, সত্থা লোকে অনুত্তৰো;

নিপন্নকোৱ সম্বুদ্ধো, ইমা গাথা অভাসথ.

১০৫. ‘‘‘যো মে পচ্ছিমকে কালে, গন্ধমালেন [গন্ধমল্লেন (স্যা. ক.) নপুংসকেকত্তং মনসিকাতব্বং] ছাদযি;

তমহং কিত্তযিস্সামি, সুণাথ মম ভাসতো.

১০৬. ‘‘‘ইতো চুতো অযং পোসো, তুসিতকাযং গমিস্সতি;

তত্থ ৰজ্জং কৰিত্ৱান, নিম্মানং সো গমিস্সতি.

১০৭. ‘‘‘এতেনেৱ উপাযেন, দত্ৱা মালং [মল্যং (সী.), মল্লং (স্যা. ক.)] ৱৰুত্তমং;

সককম্মাভিৰদ্ধো সো, সম্পত্তিং অনুভোস্সতি.

১০৮. ‘‘‘পুনাপি তুসিতে কাযে, নিব্বত্তিস্সতিযং নৰো;

তম্হা কাযা চৱিত্ৱান, মনুস্সত্তং গমিস্সতি.

১০৯. ‘‘‘সক্যপুত্তো মহানাগো, অগ্গো লোকে সদেৱকে;

বোধযিত্ৱা বহূ সত্তে, নিব্বাযিস্সতি চক্খুমা.

১১০. ‘‘‘তদা সোপগতো সন্তো, সুক্কমূলেন চোদিতো;

উপসঙ্কম্ম সম্বুদ্ধং, পঞ্হং পুচ্ছিস্সতি তদা.

১১১. ‘‘‘হাসযিত্ৱান সম্বুদ্ধো, সব্বঞ্ঞূ লোকনাযকো;

পুঞ্ঞকম্মং পৰিঞ্ঞায, সচ্চানি ৱিৱৰিস্সতি.

১১২. ‘‘‘আৰদ্ধো চ অযং পঞ্হো, তুট্ঠো একগ্গমানসো;

সত্থাৰং অভিৱাদেত্ৱা, পব্বজ্জং যাচযিস্সতি.

১১৩. ‘‘‘পসন্নমানসং দিস্ৱা, সককম্মেন তোসিতং;

পব্বাজেস্সতি সো বুদ্ধো, অগ্গমগ্গস্স কোৱিদো.

১১৪. ‘‘‘ৱাযমিত্ৱানযং পোসো, সম্মাসম্বুদ্ধসাসনে;

সব্বাসৱে পৰিঞ্ঞায, নিব্বাযিস্সতিনাসৱো’.

পঞ্চমভাণৱাৰং.

১১৫. ‘‘পুব্বকম্মেন সংযুত্তো, একগ্গো সুসমাহিতো;

বুদ্ধস্স ওৰসো পুত্তো, ধম্মজোম্হি সুনিম্মিতো.

১১৬. ‘‘ধম্মৰাজং উপগম্ম, অপুচ্ছিং পঞ্হমুত্তমং;

কথযন্তো চ মে পঞ্হং, ধম্মসোতং উপানযি.

১১৭. ‘‘তস্সাহং ধম্মমঞ্ঞায, ৱিহাসিং সাসনে ৰতো;

সব্বাসৱে পৰিঞ্ঞায, ৱিহৰামি অনাসৱো.

১১৮. ‘‘সতসহস্সিতো কপ্পে, জলজুত্তমনাযকো;

নিব্বাযি অনুপাদানো, দীপোৱ তেলসঙ্খযা.

১১৯. ‘‘সত্তযোজনিকং আসি, থূপঞ্চ ৰতনামযং;

ধজং তত্থ অপূজেসিং, সব্বভদ্দং মনোৰমং.

১২০. ‘‘কস্সপস্স চ বুদ্ধস্স, তিস্সো নামগ্গসাৱকো;

পুত্তো মে ওৰসো আসি, দাযাদো জিনসাসনে.

১২১. ‘‘তস্স হীনেন মনসা, ৱাচং ভাসিং অভদ্দকং;

তেন কম্মৱিপাকেন, পচ্ছা মে আসি ভদ্দকং [পচ্ছিমে অদ্দসং জিনং (সী.)].

১২২. ‘‘উপৱত্তনে সালৱনে, পচ্ছিমে সযনে মুনি;

পব্বাজেসি মহাৱীৰো, হিতো কাৰুণিকো জিনো.

১২৩. ‘‘অজ্জেৱ দানি পব্বজ্জা, অজ্জেৱ উপসম্পদা;

অজ্জেৱ পৰিনিব্বানং, সম্মুখা দ্ৱিপদুত্তমে.

১২৪. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা সুভদ্দো থেৰো ইমা গাথাযো অভাসিত্থাতি.

সুভদ্দত্থেৰস্সাপদানং নৱমং.