১০. চুন্দত্থেৰঅপদানং

১২৫. ‘‘সিদ্ধত্থস্স ভগৱতো, লোকজেট্ঠস্স তাদিনো;

অগ্ঘিযং কাৰযিত্ৱান, জাতিপুপ্ফেহি ছাদযিং.

১২৬. ‘‘নিট্ঠাপেত্ৱান তং পুপ্ফং, বুদ্ধস্স উপনামযিং;

পুপ্ফাৱসেসং পগ্গয্হ, বুদ্ধস্স অভিৰোপযিং.

১২৭. ‘‘কঞ্চনগ্ঘিযসঙ্কাসং, বুদ্ধং লোকগ্গনাযকং;

পসন্নচিত্তো সুমনো, পুপ্ফগ্ঘিযমুপানযিং.

১২৮. ‘‘ৱিতিণ্ণকঙ্খো সম্বুদ্ধো, তিণ্ণোঘেহি পুৰক্খতো;

ভিক্খুসঙ্ঘে নিসীদিত্ৱা, ইমা গাথা অভাসথ.

১২৯. ‘‘‘দিব্বগন্ধং পৱাযন্তং, যো মে পুপ্ফগ্ঘিযং অদা;

তমহং কিত্তযিস্সামি, সুণাথ মম ভাসতো.

১৩০. ‘‘‘ইতো চুতো অযং পোসো, দেৱসঙ্ঘপুৰক্খতো;

জাতিপুপ্ফেহি পৰিকিণ্ণো, দেৱলোকং গমিস্সতি.

১৩১. ‘‘‘উব্বিদ্ধং ভৱনং তস্স, সোৱণ্ণঞ্চ মণীমযং;

ব্যম্হং পাতুভৱিস্সতি, পুঞ্ঞকম্মপ্পভাৱিতং.

১৩২. ‘‘‘চতুসত্ততিক্খত্তুং সো, দেৱৰজ্জং কৰিস্সতি;

অনুভোস্সতি সম্পত্তিং, অচ্ছৰাহি পুৰক্খতো.

১৩৩. ‘‘‘পথব্যা ৰজ্জং তিসতং, ৱসুধং আৱসিস্সতি;

পঞ্চসত্ততিক্খত্তুঞ্চ, চক্কৱত্তী ভৱিস্সতি.

১৩৪. ‘‘‘দুজ্জযো নাম নামেন, হেস্সতি মনুজাধিপো;

অনুভোত্ৱান তং পুঞ্ঞং, সককম্মং অপস্সিতো [সককম্মূপসংহিতো (স্যা.)].

১৩৫. ‘‘‘ৱিনিপাতং অগন্ত্ৱান, মনুস্সত্তং গমিস্সতি;

হিৰঞ্ঞং তস্স [হিৰঞ্ঞস্স চ (সী. ক.)] নিচিতং, কোটিসতমনপ্পকং.

১৩৬. ‘‘‘নিব্বত্তিস্সতি যোনিম্হি, ব্ৰাহ্মণে সো ভৱিস্সতি;

ৱঙ্গন্তস্স সুতো ধীমা, সাৰিযা ওৰসো পিযো.

১৩৭. ‘‘‘সো চ পচ্ছা পব্বজিত্ৱা, অঙ্গীৰসস্স সাসনে;

চূড়চুন্দোতি [চূলচুন্দোতি (সী.)] নামেন, হেস্সতি সত্থু সাৱকো.

১৩৮. ‘‘‘সামণেৰোৱ সো সন্তো, খীণাসৱো ভৱিস্সতি;

সব্বাসৱে পৰিঞ্ঞায, নিব্বাযিস্সতিনাসৱো’.

১৩৯. ‘‘উপট্ঠহিং মহাৱীৰং, অঞ্ঞে চ পেসলে বহূ;

ভাতৰং মে চুপট্ঠাসিং, উত্তমত্থস্স পত্তিযা.

১৪০. ‘‘ভাতৰং মে উপট্ঠিত্ৱা, ধাতুং পত্তম্হি ওহিয [ওপিয (সী.), ওচিয (স্যা.)];

সম্বুদ্ধং উপনামেসিং, লোকজেট্ঠং নৰাসভং.

১৪১. ‘‘উভো হত্থেহি পগ্গয্হ, বুদ্ধো লোকে সদেৱকে;

সন্দস্সযন্তো তং ধাতুং, কিত্তযি অগ্গসাৱকং.

১৪২. ‘‘চিত্তঞ্চ সুৱিমুত্তং মে, সদ্ধা ময্হং পতিট্ঠিতা;

সব্বাসৱে পৰিঞ্ঞায, ৱিহৰামি অনাসৱো.

১৪৩. ‘‘পটিসম্ভিদানুপ্পত্তা, ৱিমোক্খাপি চ ফস্সিতা [পটিসম্ভিদা চতস্সো, ৱিমোক্খাপি চ অট্ঠিমে (স্যা.)];

ছড়ভিঞ্ঞা সচ্ছিকতা, কতং বুদ্ধস্স সাসনং’’.

ইত্থং সুদং আযস্মা চুন্দো থেৰো ইমা গাথাযো অভাসিত্থাতি.

চুন্দত্থেৰস্সাপদানং দসমং.

উপালিৱগ্গো পঞ্চমো.