৮. চঙ্কমনদাযকত্থেৰঅপদানং

৯৩. ‘‘অত্থদস্সিস্স মুনিনো, লোকজেট্ঠস্স তাদিনো;

ইট্ঠকাহি চিনিত্ৱান, চঙ্কমং কাৰযিং অহং.

৯৪. ‘‘উচ্চতো পঞ্চৰতনং, চঙ্কমং সাধুমাপিতং;

আযামতো হত্থসতং, ভাৱনীয্যং মনোৰমং.

৯৫. ‘‘পটিগ্গহেসি ভগৱা, অত্থদস্সী নৰুত্তমো;

হত্থেন পুলিনং গয্হ, ইমা গাথা অভাসথ.

৯৬. ‘‘‘ইমিনা পুলিনদানেন, চঙ্কমং সুকতেন চ;

সত্তৰতনসম্পন্নং, পুলিনং অনুভোস্সতি.

৯৭. ‘‘‘তীণি কপ্পানি দেৱেসু, দেৱৰজ্জং কৰিস্সতি;

অনুভোস্সতি সম্পত্তিং, অচ্ছৰাহি পুৰক্খতো.

৯৮. ‘‘‘মনুস্সলোকমাগন্ত্ৱা, ৰাজা ৰট্ঠে ভৱিস্সতি;

তিক্খত্তুং চক্কৱত্তী চ, মহিযা সো ভৱিস্সতি’.

৯৯. ‘‘অট্ঠাৰসে কপ্পসতে, যং কম্মমকৰিং তদা;

দুগ্গতিং নাভিজানামি, চঙ্কমস্স ইদং ফলং.

১০০. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা চঙ্কমনদাযকো থেৰো ইমা গাথাযো অভাসিত্থাতি.

চঙ্কমনদাযকত্থেৰস্সাপদানং অট্ঠমং.