১. নড়মালিযত্থেৰঅপদানং

১. ‘‘সুৱণ্ণৱণ্ণং সম্বুদ্ধং, আহুতীনং পটিগ্গহং;

ৱিপিনগ্গেন গচ্ছন্তং, অদ্দসং লোকনাযকং.

২. ‘‘নড়মালং গহেত্ৱান, নিক্খমন্তো চ তাৱদে;

তত্থদ্দসাসিং সম্বুদ্ধং, ওঘতিণ্ণমনাসৱং.

৩. ‘‘পসন্নচিত্তো সুমনো, নড়মালমপূজযিং;

দক্খিণেয্যং মহাৱীৰং, সব্বলোকানুকম্পকং.

৪. ‘‘একতিংসে ইতো কপ্পে, যং মালমভিৰোপযিং [পুপ্ফমভিৰোপযিং (সী. স্যা. পী.)];

দুগ্গতিং নাভিজানামি, বুদ্ধপূজাযিদং ফলং.

৫. ‘‘কিলেসা ঝাপিতা ময্হং, ভৱা সব্বে সমূহতা;

নাগোৱ বন্ধনং ছেত্ৱা, ৱিহৰামি অনাসৱো.

৬. ‘‘স্ৱাগতং ৱত মে আসি, মম বুদ্ধস্স সন্তিকে;

তিস্সো ৱিজ্জা অনুপ্পত্তা, কতং বুদ্ধস্স সাসনং.

৭. ‘‘পটিসম্ভিদা চতস্সো, ৱিমোক্খাপি চ অট্ঠিমে;

ছড়ভিঞ্ঞা সচ্ছিকতা, কতং বুদ্ধস্স সাসনং’’.

ইত্থং সুদং আযস্মা নড়মালিযো থেৰো ইমা গাথাযো

অভাসিত্থাতি.

নড়মালিযত্থেৰস্সাপদানং পঠমং.