৪৮. নড়মালিৱগ্গো

১. নড়মালিযত্থেৰঅপদানং

১. ‘‘সুৱণ্ণৱণ্ণং সম্বুদ্ধং, আহুতীনং পটিগ্গহং;

ৱিপিনগ্গেন গচ্ছন্তং, অদ্দসং লোকনাযকং.

২. ‘‘নড়মালং গহেত্ৱান, নিক্খমন্তো চ তাৱদে;

তত্থদ্দসাসিং সম্বুদ্ধং, ওঘতিণ্ণমনাসৱং.

৩. ‘‘পসন্নচিত্তো সুমনো, নড়মালমপূজযিং;

দক্খিণেয্যং মহাৱীৰং, সব্বলোকানুকম্পকং.

৪. ‘‘একতিংসে ইতো কপ্পে, যং মালমভিৰোপযিং [পুপ্ফমভিৰোপযিং (সী. স্যা. পী.)];

দুগ্গতিং নাভিজানামি, বুদ্ধপূজাযিদং ফলং.

৫. ‘‘কিলেসা ঝাপিতা ময্হং, ভৱা সব্বে সমূহতা;

নাগোৱ বন্ধনং ছেত্ৱা, ৱিহৰামি অনাসৱো.

৬. ‘‘স্ৱাগতং ৱত মে আসি, মম বুদ্ধস্স সন্তিকে;

তিস্সো ৱিজ্জা অনুপ্পত্তা, কতং বুদ্ধস্স সাসনং.

৭. ‘‘পটিসম্ভিদা চতস্সো, ৱিমোক্খাপি চ অট্ঠিমে;

ছড়ভিঞ্ঞা সচ্ছিকতা, কতং বুদ্ধস্স সাসনং’’.

ইত্থং সুদং আযস্মা নড়মালিযো থেৰো ইমা গাথাযো

অভাসিত্থাতি.

নড়মালিযত্থেৰস্সাপদানং পঠমং.

২. মণিপূজকত্থেৰঅপদানং

৮. ‘‘পদুমুত্তৰো নাম জিনো, সব্বধম্মান পাৰগূ;

ৱিৱেককামো সম্বুদ্ধো, গচ্ছতে অনিলঞ্জসে.

৯. ‘‘অৱিদূৰে হিমৱন্তস্স, মহাজাতস্সৰো অহু;

তত্থ মে ভৱনং আসি, পুঞ্ঞকম্মেন সংযুতং.

১০. ‘‘ভৱনা অভিনিক্খম্ম, অদ্দসং লোকনাযকং;

ইন্দীৱৰংৱ জলিতং, আদিত্তংৱ হুতাসনং.

১১. ‘‘ৱিচিনং নদ্দসং পুপ্ফং, পূজযিস্সন্তি নাযকং;

সকং চিত্তং পসাদেত্ৱা, অৱন্দিং সত্থুনো অহং.

১২. ‘‘মম সীসে মণিং গয্হ, পূজযিং লোকনাযকং;

ইমায মণিপূজায, ৱিপাকো হোতু ভদ্দকো.

১৩. ‘‘পদুমুত্তৰো লোকৱিদূ, আহুতীনং পটিগ্গহো;

অন্তলিক্খে ঠিতো সত্থা, ইমং গাথং অভাসথ.

১৪. ‘সো তে ইজ্ঝতু সঙ্কপ্পো, লভস্সু ৱিপুলং সুখং;

ইমায মণিপূজায, অনুভোহি মহাযসং’.

১৫. ‘‘ইদং ৱত্ৱান ভগৱা, জলজুত্তমনামকো;

অগমাসি বুদ্ধসেট্ঠো, যত্থ চিত্তং পণীহিতং.

১৬. ‘‘সট্ঠিকপ্পানি দেৱিন্দো, দেৱৰজ্জমকাৰযিং;

অনেকসতক্খত্তুঞ্চ, চক্কৱত্তী অহোসহং.

১৭. ‘‘পুব্বকম্মং সৰন্তস্স, দেৱভূতস্স মে সতো;

মণি নিব্বত্ততে ময্হং, আলোককৰণো মমং.

১৮. ‘‘ছড়সীতিসহস্সানি, নাৰিযো মে পৰিগ্গহা;

ৱিচিত্তৱত্থাভৰণা, আমুক্কমণিকুণ্ডলা [আমুত্তমণিকুণ্ডলা (সী. স্যা. পী.)].

১৯. ‘‘অড়াৰপম্হা হসুলা, সুসঞ্ঞা তনুমজ্ঝিমা;

পৰিৱাৰেন্তি মং নিচ্চং, মণিপূজাযিদং ফলং.

২০. ‘‘সোণ্ণমযা মণিমযা, লোহিতঙ্গমযা তথা;

ভণ্ডা মে সুকতা হোন্তি, যদিচ্ছসি [যদিচ্ছায (সী. পী.)] পিড়ন্ধনা.

২১. ‘‘কূটাগাৰা গহাৰম্মা, সযনঞ্চ মহাৰহং;

মম সঙ্কপ্পমঞ্ঞায, নিব্বত্তন্তি যদিচ্ছকং.

২২. ‘‘লাভা তেসং সুলদ্ধঞ্চ, যে লভন্তি উপস্সুতিং;

পুঞ্ঞক্খেত্তং মনুস্সানং, ওসধং সব্বপাণিনং.

২৩. ‘‘ময্হম্পি সুকতং কম্মং, যোহং অদক্খি নাযকং;

ৱিনিপাতা পমুত্তোম্হি, পত্তোম্হি অচলং পদং.

২৪. ‘‘যং যং যোনুপপজ্জামি, দেৱত্তং অথ মানুসং;

দিৱসঞ্চেৱ ৰত্তিঞ্চ [সমন্তা সত্তৰতনা (সী. পী. ক.)], আলোকো হোতি মে সদা.

২৫. ‘‘তাযেৱ মণিপূজায, অনুভোত্ৱান সম্পদা;

ঞাণালোকো মযা দিট্ঠো, পত্তোম্হি অচলং পদং.

২৬. ‘‘সতসহস্সিতো কপ্পে, যং মণিং অভিপূজযিং;

দুগ্গতিং নাভিজানামি, মণিপূজাযিদং ফলং.

২৭. ‘‘কিলেসা ঝাপিতা ময্হং…পে… ৱিহৰামি অনাসৱো.

২৮. ‘‘স্ৱাগতং ৱত মে আসি…পে… কতং বুদ্ধস্স সাসনং.

২৯. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা মণিপূজকো থেৰো ইমা গাথাযো

অভাসিত্থাতি.

মণিপূজকত্থেৰস্সাপদানং দুতিযং.

৩. উক্কাসতিকত্থেৰঅপদানং

৩০. ‘‘কোসিকো নাম ভগৱা, চিত্তকূটে ৱসী তদা;

ঝাযী ঝানৰতো বুদ্ধো, ৱিৱেকাভিৰতো মুনি.

৩১. ‘‘অজ্ঝোগাহেত্ৱা [অজ্ঝোগহেত্ৱা (সী. স্যা. পী.)] হিমৱন্তং, নাৰীগণপুৰক্খতো;

অদ্দসং কোসিকং বুদ্ধং, পুণ্ণমাযেৱ চন্দিমং.

৩২. ‘‘উক্কাসতে গহেত্ৱান, পৰিৱাৰেসহং তদা;

সত্তৰত্তিন্দিৱং ঠত্ৱা [বুদ্ধো (স্যা. ক.)], অট্ঠমেন অগচ্ছহং.

৩৩. ‘‘ৱুট্ঠিতং কোসিকং বুদ্ধং, সযম্ভুং অপৰাজিতং;

পসন্নচিত্তো ৱন্দিত্ৱা, একং ভিক্খং অদাসহং.

৩৪. ‘‘তেন কম্মেন দ্ৱিপদিন্দ, লোকজেট্ঠ নৰাসভ;

উপ্পজ্জিং তুসিতে কাযে, একভিক্খাযিদং ফলং.

৩৫. ‘‘দিৱসঞ্চেৱ ৰত্তিঞ্চ, আলোকো হোতি মে সদা;

সমন্তা যোজনসতং, ওভাসেন ফৰামহং.

৩৬. ‘‘পঞ্চপঞ্ঞাসকপ্পম্হি, চক্কৱত্তী অহোসহং;

চাতুৰন্তো ৱিজিতাৱী, জম্বুমণ্ডস্স [জম্বুসণ্ডস্স (পী.)] ইস্সৰো.

৩৭. ‘‘তদা মে নগৰং আসি, ইদ্ধং ফীতং সুনিম্মিতং;

তিংসযোজনমাযামং, ৱিত্থাৰেন চ ৱীসতি.

৩৮. ‘‘সোভণং নাম নগৰং, ৱিস্সকম্মেন মাপিতং;

দসসদ্দাৱিৱিত্তং তং, সম্মতাড়সমাহিতং.

৩৯. ‘‘ন তম্হি নগৰে অত্থি, ৱল্লিকট্ঠঞ্চ মত্তিকা;

সব্বসোণ্ণমযংযেৱ, জোততে নিচ্চকালিকং.

৪০. ‘‘চতুপাকাৰপৰিক্খিত্তং, তযো আসুং মণিমযা;

ৱেমজ্ঝে তালপন্তী চ, ৱিস্সকম্মেন মাপিতা.

৪১. ‘‘দসসহস্সপোক্খৰঞ্ঞো, পদুমুপ্পলছাদিতা;

পুণ্ডৰীকেহি [পুণ্ডৰীকাদি (স্যা.)] সঞ্ছন্না, নানাগন্ধসমীৰিতা.

৪২. ‘‘চতুন্নৱুতিতো কপ্পে, যং উক্কং ধাৰযিং অহং;

দুগ্গতিং নাভিজানামি, উক্কধাৰস্সিদং ফলং.

৪৩. ‘‘কিলেসা ঝাপিতা ময্হং…পে… ৱিহৰামি অনাসৱো.

৪৪. ‘‘স্ৱাগতং ৱত মে আসি…পে… কতং বুদ্ধস্স সাসনং.

৪৫. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা উক্কাসতিকো থেৰো ইমা গাথাযো

অভাসিত্থাতি.

উক্কাসতিকত্থেৰস্সাপদানং ততিযং.

৪. সুমনবীজনিযত্থেৰঅপদানং

৪৬. ‘‘ৱিপস্সিনো ভগৱতো, বোধিযা পাদপুত্তমে;

সুমনো বীজনিং গয্হ, অবীজিং বোধিমুত্তমং.

৪৭. ‘‘একনৱুতিতো কপ্পে, অবীজিং বোধিমুত্তমং;

দুগ্গতিং নাভিজানামি, বীজনায ইদং ফলং.

৪৮. ‘‘কিলেসা ঝাপিতা ময্হং…পে… ৱিহৰামি অনাসৱো.

৪৯. ‘‘স্ৱাগতং ৱত মে আসি…পে… কতং বুদ্ধস্স সাসনং.

৫০. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা সুমনবীজনিযো থেৰো ইমা গাথাযো

অভাসিত্থাতি.

সুমনবীজনিযত্থেৰস্সাপদানং চতুত্থং.

৫. কুম্মাসদাযকত্থেৰঅপদানং

৫১. ‘‘এসনায চৰন্তস্স, ৱিপস্সিস্স মহেসিনো;

ৰিত্তকং পত্তং দিস্ৱান, কুম্মাসং পূৰযিং অহং.

৫২. ‘‘একনৱুতিতো কপ্পে, যং ভিক্খং অদদিং তদা;

দুগ্গতিং নাভিজানামি, কুম্মাসস্স ইদং ফলং.

৫৩. ‘‘কিলেসা ঝাপিতা ময্হং…পে… ৱিহৰামি অনাসৱো.

৫৪. ‘‘স্ৱাগতং ৱত মে আসি…পে… কতং বুদ্ধস্স সাসনং.

৫৫. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা কুম্মাসদাযকো থেৰো ইমা গাথাযো

অভাসিত্থাতি.

কুম্মাসদাযকত্থেৰস্সাপদানং পঞ্চমং.

৬. কুসট্ঠকদাযকত্থেৰঅপদানং

৫৬. ‘‘কস্সপস্স ভগৱতো, ব্ৰাহ্মণস্স ৱুসীমতো;

পসন্নচিত্তো সুমনো, কুসট্ঠকমদাসহং.

৫৭. ‘‘ইমস্মিংযেৱ কপ্পস্মিং, কুসট্ঠকমদাসহং;

দুগ্গতিং নাভিজানামি, কুসট্ঠকস্সিদং ফলং.

৫৮. ‘‘কিলেসা ঝাপিতা ময্হং…পে… ৱিহৰামি অনাসৱো.

৫৯. ‘‘স্ৱাগতং ৱত মে আসি…পে… কতং বুদ্ধস্স সাসনং.

৬০. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা কুসট্ঠকদাযকো থেৰো ইমা গাথাযো

অভাসিত্থাতি.

কুসট্ঠকদাযকত্থেৰস্সাপদানং ছট্ঠং.

৭. গিৰিপুন্নাগিযত্থেৰঅপদানং

৬১. ‘‘সোভিতো নাম সম্বুদ্ধো, চিত্তকূটে ৱসী তদা;

গহেত্ৱা গিৰিপুন্নাগং, সযম্ভুং অভিপূজযিং.

৬২. ‘‘চতুন্নৱুতিতো কপ্পে, যং বুদ্ধমভিপূজযিং;

দুগ্গতিং নাভিজানামি, বুদ্ধপূজাযিদং ফলং.

৬৩. ‘‘কিলেসা ঝাপিতা ময্হং…পে… ৱিহৰামি অনাসৱো.

৬৪. ‘‘স্ৱাগতং ৱত মে আসি…পে… কতং বুদ্ধস্স সাসনং.

৬৫. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা গিৰিপুন্নাগিযো থেৰো ইমা গাথাযো

অভাসিত্থাতি.

গিৰিপুন্নাগিযত্থেৰস্সাপদানং সত্তমং.

৮. ৱল্লিকাৰফলদাযকত্থেৰঅপদানং

৬৬. ‘‘সুমনো নাম সম্বুদ্ধো, তক্কৰাযং ৱসী তদা;

ৱল্লিকাৰফলং গয্হ, সযম্ভুস্স অদাসহং.

৬৭. ‘‘একতিংসে ইতো কপ্পে, যং ফলং অদদিং তদা;

দুগ্গতিং নাভিজানামি, ফলদানস্সিদং ফলং.

৬৮. ‘‘কিলেসা ঝাপিতা ময্হং…পে… ৱিহৰামি অনাসৱো.

৬৯. ‘‘স্ৱাগতং ৱত মে আসি…পে… কতং বুদ্ধস্স সাসনং.

৭০. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা ৱল্লিকাৰফলদাযকো থেৰো ইমা