২. মণিপূজকত্থেৰঅপদানং

৮. ‘‘পদুমুত্তৰো নাম জিনো, সব্বধম্মান পাৰগূ;

ৱিৱেককামো সম্বুদ্ধো, গচ্ছতে অনিলঞ্জসে.

৯. ‘‘অৱিদূৰে হিমৱন্তস্স, মহাজাতস্সৰো অহু;

তত্থ মে ভৱনং আসি, পুঞ্ঞকম্মেন সংযুতং.

১০. ‘‘ভৱনা অভিনিক্খম্ম, অদ্দসং লোকনাযকং;

ইন্দীৱৰংৱ জলিতং, আদিত্তংৱ হুতাসনং.

১১. ‘‘ৱিচিনং নদ্দসং পুপ্ফং, পূজযিস্সন্তি নাযকং;

সকং চিত্তং পসাদেত্ৱা, অৱন্দিং সত্থুনো অহং.

১২. ‘‘মম সীসে মণিং গয্হ, পূজযিং লোকনাযকং;

ইমায মণিপূজায, ৱিপাকো হোতু ভদ্দকো.

১৩. ‘‘পদুমুত্তৰো লোকৱিদূ, আহুতীনং পটিগ্গহো;

অন্তলিক্খে ঠিতো সত্থা, ইমং গাথং অভাসথ.

১৪. ‘সো তে ইজ্ঝতু সঙ্কপ্পো, লভস্সু ৱিপুলং সুখং;

ইমায মণিপূজায, অনুভোহি মহাযসং’.

১৫. ‘‘ইদং ৱত্ৱান ভগৱা, জলজুত্তমনামকো;

অগমাসি বুদ্ধসেট্ঠো, যত্থ চিত্তং পণীহিতং.

১৬. ‘‘সট্ঠিকপ্পানি দেৱিন্দো, দেৱৰজ্জমকাৰযিং;

অনেকসতক্খত্তুঞ্চ, চক্কৱত্তী অহোসহং.

১৭. ‘‘পুব্বকম্মং সৰন্তস্স, দেৱভূতস্স মে সতো;

মণি নিব্বত্ততে ময্হং, আলোককৰণো মমং.

১৮. ‘‘ছড়সীতিসহস্সানি, নাৰিযো মে পৰিগ্গহা;

ৱিচিত্তৱত্থাভৰণা, আমুক্কমণিকুণ্ডলা [আমুত্তমণিকুণ্ডলা (সী. স্যা. পী.)].

১৯. ‘‘অড়াৰপম্হা হসুলা, সুসঞ্ঞা তনুমজ্ঝিমা;

পৰিৱাৰেন্তি মং নিচ্চং, মণিপূজাযিদং ফলং.

২০. ‘‘সোণ্ণমযা মণিমযা, লোহিতঙ্গমযা তথা;

ভণ্ডা মে সুকতা হোন্তি, যদিচ্ছসি [যদিচ্ছায (সী. পী.)] পিড়ন্ধনা.

২১. ‘‘কূটাগাৰা গহাৰম্মা, সযনঞ্চ মহাৰহং;

মম সঙ্কপ্পমঞ্ঞায, নিব্বত্তন্তি যদিচ্ছকং.

২২. ‘‘লাভা তেসং সুলদ্ধঞ্চ, যে লভন্তি উপস্সুতিং;

পুঞ্ঞক্খেত্তং মনুস্সানং, ওসধং সব্বপাণিনং.

২৩. ‘‘ময্হম্পি সুকতং কম্মং, যোহং অদক্খি নাযকং;

ৱিনিপাতা পমুত্তোম্হি, পত্তোম্হি অচলং পদং.

২৪. ‘‘যং যং যোনুপপজ্জামি, দেৱত্তং অথ মানুসং;

দিৱসঞ্চেৱ ৰত্তিঞ্চ [সমন্তা সত্তৰতনা (সী. পী. ক.)], আলোকো হোতি মে সদা.

২৫. ‘‘তাযেৱ মণিপূজায, অনুভোত্ৱান সম্পদা;

ঞাণালোকো মযা দিট্ঠো, পত্তোম্হি অচলং পদং.

২৬. ‘‘সতসহস্সিতো কপ্পে, যং মণিং অভিপূজযিং;

দুগ্গতিং নাভিজানামি, মণিপূজাযিদং ফলং.

২৭. ‘‘কিলেসা ঝাপিতা ময্হং…পে… ৱিহৰামি অনাসৱো.

২৮. ‘‘স্ৱাগতং ৱত মে আসি…পে… কতং বুদ্ধস্স সাসনং.

২৯. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা মণিপূজকো থেৰো ইমা গাথাযো

অভাসিত্থাতি.

মণিপূজকত্থেৰস্সাপদানং দুতিযং.