২. একদুস্সদাযকত্থেৰঅপদানং

১৫. ‘‘নগৰে হংসৱতিযা, অহোসিং তিণহাৰকো;

তিণহাৰেন জীৱামি, তেন পোসেমি দাৰকে.

১৬. ‘‘পদুমুত্তৰো নাম জিনো, সব্বধম্মান পাৰগূ;

তমন্ধকাৰং নাসেত্ৱা, উপ্পজ্জি লোকনাযকো.

১৭. ‘‘সকে ঘৰে নিসীদিত্ৱা, এৱং চিন্তেসি তাৱদে;

‘বুদ্ধো লোকে সমুপ্পন্নো, দেয্যধম্মো ন ৱিজ্জতি.

১৮. ‘‘‘ইদং মে সাটকং একং, নত্থি মে কোচি দাযকো;

দুক্খো নিৰযসম্ফস্সো, ৰোপযিস্সামি দক্খিণং’.

১৯. ‘‘এৱাহং চিন্তযিত্ৱান, সকং চিত্তং পসাদযিং;

একং দুস্সং গহেত্ৱান, বুদ্ধসেট্ঠস্সদাসহং.

২০. ‘‘একং দুস্সং দদিত্ৱান, উক্কুট্ঠিং সম্পৱত্তযিং;

‘যদি বুদ্ধো তুৱং ৱীৰ, তাৰেহি মং মহামুনি’.

২১. ‘‘পদুমুত্তৰো লোকৱিদূ, আহুতীনং পটিগ্গহো;

মম দানং পকিত্তেন্তো, অকা মে অনুমোদনং.

২২. ‘‘‘ইমিনা একদুস্সেন, চেতনাপণিধীহি চ;

কপ্পসতসহস্সানি, ৱিনিপাতং ন গচ্ছসি.

২৩. ‘‘‘ছত্তিংসক্খত্তুং দেৱিন্দো, দেৱৰজ্জং কৰিস্সসি;

তেত্তিংসক্খত্তুং ৰাজা চ, চক্কৱত্তী [চক্কৱত্তি (স্যা.)] ভৱিস্সসি.

২৪. ‘‘‘পদেসৰজ্জং ৱিপুলং, গণনাতো অসঙ্খিযং [অসঙ্কযং (স্যা. ক.) এৱমুপৰিপি];

দেৱলোকে মনুস্সে ৱা, সংসৰন্তো তুৱং ভৱে.

২৫. ‘‘‘ৰূপৱা গুণসম্পন্নো, অনৱক্কন্তদেহৱা [অনুৱত্তন্ত… (স্যা)];

অক্খোভং অমিতং দুস্সং, লভিস্সসি যদিচ্ছকং’.

২৬. ‘‘ইদং ৱত্ৱান সম্বুদ্ধো, জলজুত্তমনামকো;

নভং অব্ভুগ্গমী ৱীৰো [ধীৰো (সী. স্যা.)], হংসৰাজাৱ অম্বৰে.

২৭. ‘‘যং যং যোনুপপজ্জামি, দেৱত্তং অথ মানুসং;

ভোগে মে ঊনতা নত্থি, একদুস্সস্সিদং ফলং.

২৮. ‘‘পদুদ্ধাৰে পদুদ্ধাৰে, দুস্সং নিব্বত্ততে মমং;

হেট্ঠা দুস্সম্হি তিট্ঠামি, উপৰিচ্ছদনং মম.

২৯. ‘‘চক্কৱাড়ং উপাদায, সকাননং সপব্বতং;

ইচ্ছমানো চহং অজ্জ, দুস্সেহচ্ছাদযেয্য তং.

৩০. ‘‘তেনেৱ একদুস্সেন, সংসৰন্তো ভৱাভৱে;

সুৱণ্ণৱণ্ণো হুত্ৱান, সংসৰামি ভৱাভৱে.

৩১. ‘‘ৱিপাকং ৱিএকদুস্সস্স, নাজ্ঝগং কত্থচিক্খযং;

অযং মে অন্তিমা জাতি, ৱিপচ্চতি ইধাপি মে.

৩২. ‘‘সতসহস্সিতো কপ্পে, যং দুস্সমদদিং তদা;

দুগ্গতিং নাভিজানামি, একদুস্সস্সিদং ফলং.

৩৩. ‘‘কিলেসা ঝাপিতা ময্হং…পে… ৱিহৰামি অনাসৱো.

৩৪. ‘‘স্ৱাগতং ৱত মে আসি…পে… কতং বুদ্ধস্স সাসনং.

৩৫. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা একদুস্সদাযকো থেৰো ইমা গাথাযো অভাসিত্থাতি;

একদুস্সদাযকত্থেৰস্সাপদানং দুতিযং.