৪৩. সকিংসম্মজ্জকৱগ্গো

১. সকিংসম্মজ্জকত্থেৰঅপদানং

১. ‘‘ৱিপস্সিনো ভগৱতো, পাটলিং বোধিমুত্তমং;

দিস্ৱাৱ তং পাদপগ্গং, তত্থ চিত্তং পসাদযিং.

২. ‘‘সম্মজ্জনিং গহেত্ৱান, বোধিং সম্মজ্জি তাৱদে;

সম্মজ্জিত্ৱান তং বোধিং, অৱন্দিং পাটলিং অহং.

৩. ‘‘তত্থ চিত্তং পসাদেত্ৱা, সিৰে কত্ৱান অঞ্জলিং;

নমস্সমানো তং বোধিং, গঞ্ছিং পটিকুটিং অহং.

৪. ‘‘তাদিমগ্গেন গচ্ছামি, সৰন্তো বোধিমুত্তমং;

অজগৰো মং পীড়েসি, ঘোৰৰূপো মহব্বলো.

৫. ‘‘আসন্নে মে কতং কম্মং, ফলেন তোসযী মমং;

কড়েৱৰং মে গিলতি, দেৱলোকে ৰমামহং.

৬. ‘‘অনাৱিলং মম চিত্তং, ৱিসুদ্ধং পণ্ডৰং সদা;

সোকসল্লং ন জানামি, চিত্তসন্তাপনং মম.

৭. ‘‘কুট্ঠং গণ্ডো কিলাসো চ, অপমাৰো ৱিতচ্ছিকা;

দদ্দু কণ্ডু চ মে নত্থি, ফলং সম্মজ্জনাযিদং [সম্মজ্জনে ইদং (সী.)].

৮. ‘‘সোকো চ পৰিদেৱো চ, হদযে মে ন ৱিজ্জতি;

অভন্তং উজুকং চিত্তং, ফলং সম্মজ্জনাযিদং.

৯. ‘‘সমাধীসু ন মজ্জামি [সমাধীসু ন সজ্জামি (সী.), সমাধিং পুন পজ্জামি (স্যা)], ৱিসদং হোতি মানসং;

যং যং সমাধিমিচ্ছামি, সো সো সম্পজ্জতে মমং.

১০. ‘‘ৰজনীযে ন ৰজ্জামি, অথো দুস্সনিযেসু [দোসনিযেসু (সী. স্যা. ক.)] চ;

মোহনীযে ন মুয্হামি, ফলং সম্মজ্জনাযিদং.

১১. ‘‘একনৱুতিতো [একনৱুতে ইতো (সী. স্যা.)] কপ্পে, যং কম্মমকৰিং তদা;

দুগ্গতিং নাভিজানামি, ফলং সম্মজ্জনাযিদং.

১২. ‘‘কিলেসা ঝাপিতা ময্হং, ভৱা সব্বে সমূহতা;

নাগোৱ বন্ধনং ছেত্ৱা, ৱিহৰামি অনাসৱো.

১৩. ‘‘স্ৱাগতং ৱত মে আসি, মম বুদ্ধস্স সন্তিকে;

তিস্সো ৱিজ্জা অনুপ্পত্তা, কতং বুদ্ধস্স সাসনং.

১৪. ‘‘পটিসম্ভিদা চতস্সো, ৱিমোক্খাপি চ অট্ঠিমে;

ছড়ভিঞ্ঞা সচ্ছিকতা, কতং বুদ্ধস্স সাসনং’’.

ইত্থং সুদং আযস্মা সকিংসম্মজ্জকো থেৰো ইমা গাথাযো

অভাসিত্থাতি.

সকিংসম্মজ্জকত্থেৰস্সাপদানং পঠমং.

২. একদুস্সদাযকত্থেৰঅপদানং

১৫. ‘‘নগৰে হংসৱতিযা, অহোসিং তিণহাৰকো;

তিণহাৰেন জীৱামি, তেন পোসেমি দাৰকে.

১৬. ‘‘পদুমুত্তৰো নাম জিনো, সব্বধম্মান পাৰগূ;

তমন্ধকাৰং নাসেত্ৱা, উপ্পজ্জি লোকনাযকো.

১৭. ‘‘সকে ঘৰে নিসীদিত্ৱা, এৱং চিন্তেসি তাৱদে;

‘বুদ্ধো লোকে সমুপ্পন্নো, দেয্যধম্মো ন ৱিজ্জতি.

১৮. ‘‘‘ইদং মে সাটকং একং, নত্থি মে কোচি দাযকো;

দুক্খো নিৰযসম্ফস্সো, ৰোপযিস্সামি দক্খিণং’.

১৯. ‘‘এৱাহং চিন্তযিত্ৱান, সকং চিত্তং পসাদযিং;

একং দুস্সং গহেত্ৱান, বুদ্ধসেট্ঠস্সদাসহং.

২০. ‘‘একং দুস্সং দদিত্ৱান, উক্কুট্ঠিং সম্পৱত্তযিং;

‘যদি বুদ্ধো তুৱং ৱীৰ, তাৰেহি মং মহামুনি’.

২১. ‘‘পদুমুত্তৰো লোকৱিদূ, আহুতীনং পটিগ্গহো;

মম দানং পকিত্তেন্তো, অকা মে অনুমোদনং.

২২. ‘‘‘ইমিনা একদুস্সেন, চেতনাপণিধীহি চ;

কপ্পসতসহস্সানি, ৱিনিপাতং ন গচ্ছসি.

২৩. ‘‘‘ছত্তিংসক্খত্তুং দেৱিন্দো, দেৱৰজ্জং কৰিস্সসি;

তেত্তিংসক্খত্তুং ৰাজা চ, চক্কৱত্তী [চক্কৱত্তি (স্যা.)] ভৱিস্সসি.

২৪. ‘‘‘পদেসৰজ্জং ৱিপুলং, গণনাতো অসঙ্খিযং [অসঙ্কযং (স্যা. ক.) এৱমুপৰিপি];

দেৱলোকে মনুস্সে ৱা, সংসৰন্তো তুৱং ভৱে.

২৫. ‘‘‘ৰূপৱা গুণসম্পন্নো, অনৱক্কন্তদেহৱা [অনুৱত্তন্ত… (স্যা)];

অক্খোভং অমিতং দুস্সং, লভিস্সসি যদিচ্ছকং’.

২৬. ‘‘ইদং ৱত্ৱান সম্বুদ্ধো, জলজুত্তমনামকো;

নভং অব্ভুগ্গমী ৱীৰো [ধীৰো (সী. স্যা.)], হংসৰাজাৱ অম্বৰে.

২৭. ‘‘যং যং যোনুপপজ্জামি, দেৱত্তং অথ মানুসং;

ভোগে মে ঊনতা নত্থি, একদুস্সস্সিদং ফলং.

২৮. ‘‘পদুদ্ধাৰে পদুদ্ধাৰে, দুস্সং নিব্বত্ততে মমং;

হেট্ঠা দুস্সম্হি তিট্ঠামি, উপৰিচ্ছদনং মম.

২৯. ‘‘চক্কৱাড়ং উপাদায, সকাননং সপব্বতং;

ইচ্ছমানো চহং অজ্জ, দুস্সেহচ্ছাদযেয্য তং.

৩০. ‘‘তেনেৱ একদুস্সেন, সংসৰন্তো ভৱাভৱে;

সুৱণ্ণৱণ্ণো হুত্ৱান, সংসৰামি ভৱাভৱে.

৩১. ‘‘ৱিপাকং ৱিএকদুস্সস্স, নাজ্ঝগং কত্থচিক্খযং;

অযং মে অন্তিমা জাতি, ৱিপচ্চতি ইধাপি মে.

৩২. ‘‘সতসহস্সিতো কপ্পে, যং দুস্সমদদিং তদা;

দুগ্গতিং নাভিজানামি, একদুস্সস্সিদং ফলং.

৩৩. ‘‘কিলেসা ঝাপিতা ময্হং…পে… ৱিহৰামি অনাসৱো.

৩৪. ‘‘স্ৱাগতং ৱত মে আসি…পে… কতং বুদ্ধস্স সাসনং.

৩৫. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা একদুস্সদাযকো থেৰো ইমা গাথাযো অভাসিত্থাতি;

একদুস্সদাযকত্থেৰস্সাপদানং দুতিযং.

৩. একাসনদাযকত্থেৰঅপদানং

৩৬. ‘‘হিমৱন্তস্সাৱিদূৰে, গোসিতো নাম পব্বতো;

অস্সমো সুকতো ময্হং, পণ্ণসালা সুমাপিতা.

৩৭. ‘‘নাৰদো নাম নামেন, কস্সপো ইতি মং ৱিদূ;

সুদ্ধিমগ্গং গৱেসন্তো, ৱসামি গোসিতে তদা.

৩৮. ‘‘পদুমুত্তৰো নাম জিনো, সব্বধম্মান পাৰগূ;

ৱিৱেককামো সম্বুদ্ধো, অগঞ্ছি অনিলঞ্জসা.

৩৯. ‘‘ৱনগ্গে গচ্ছমানস্স, দিস্ৱা ৰংসিং মহেসিনো;

কট্ঠমঞ্চং পঞ্ঞাপেত্ৱা, অজিনঞ্চ অপত্থৰিং.

৪০. ‘‘আসনং পঞ্ঞাপেত্ৱান, সিৰে কত্ৱান অঞ্জলিং;

সোমনস্সং পৱেদিত্ৱা, ইদং ৱচনমব্ৰৱিং.

৪১. ‘‘‘সল্লকত্তো মহাৱীৰ, আতুৰানং তিকিচ্ছকো;

মমং ৰোগপৰেতস্স [ৰাগ… (স্যা.)], তিকিচ্ছং দেহি নাযক.

৪২. ‘‘‘কল্লত্থিকা যে পস্সন্তি, বুদ্ধসেট্ঠ তুৱং মুনে;

ধুৱত্থসিদ্ধিং পপ্পোন্তি, এতেসং অজৰো [জজ্জৰো (সী. পী. ক.)] ভৱে.

৪৩. ‘‘‘ন মে দেয্যধম্মো অত্থি, পৱত্তফলভোজিহং;

ইদং মে আসনং অত্থি [ন মে দেয্যং তৱ অত্থি (সী. স্যা.)], নিসীদ কট্ঠমঞ্চকে’.

৪৪. ‘‘নিসীদি তত্থ ভগৱা, অসম্ভীতোৱ [অচ্ছম্ভিতোৱ (স্যা. ক.)] কেসৰী;

মুহুত্তং ৱীতিনামেত্ৱা, ইদং ৱচনমব্ৰৱি.

৪৫. ‘‘‘ৱিসট্ঠো [ৱিস্সত্থো (সী. পী), ৱিস্সট্ঠো (স্যা. ক.)] হোহি মা ভাযি, লদ্ধো জোতিৰসো তযা;

যং তুয্হং পত্থিতং সব্বং, পৰিপূৰিস্সতিনাগতে [পৰিপূৰিস্সতাসনং (স্যা. ক.)].

৪৬. ‘‘‘ন মোঘং তং কতং তুয্হং, পুঞ্ঞক্খেত্তে অনুত্তৰে;

সক্কা উদ্ধৰিতুং অত্তা, যস্স চিত্তং পণীহিতং [সুনীহিতং (স্যা.)].

৪৭. ‘‘‘ইমিনাসনদানেন, চেতনাপণিধীহি চ;

কপ্পসতসহস্সানি, ৱিনিপাতং ন গচ্ছসি.

৪৮. ‘‘‘পঞ্ঞাসক্খত্তুং দেৱিন্দো, দেৱৰজ্জং কৰিস্সসি;

অসীতিক্খত্তুং ৰাজা চ, চক্কৱত্তী ভৱিস্সসি.

৪৯. ‘‘‘পদেসৰজ্জং ৱিপুলং, গণনাতো অসঙ্খিযং;

সব্বত্থ সুখিতো হুত্ৱা, সংসাৰে সংসৰিস্সসি’.

৫০. ‘‘ইদং ৱত্ৱান সম্বুদ্ধো, জলজুত্তমনামকো;

নভং অব্ভুগ্গমী ৱীৰো, হংসৰাজাৱ অম্বৰে.

৫১. ‘‘হত্থিযানং অস্সযানং, সৰথং সন্দমানিকং;

লভামি সব্বমেৱেতং, একাসনস্সিদং ফলং.

৫২. ‘‘কাননং পৱিসিত্ৱাপি, যদা ইচ্ছামি আসনং;

মম সঙ্কপ্পমঞ্ঞায, পল্লঙ্কো উপতিট্ঠতি.

৫৩. ‘‘ৱাৰিমজ্ঝগতো সন্তো, যদা ইচ্ছামি আসনং;

মম সঙ্কপ্পমঞ্ঞায, পল্লঙ্কো উপতিট্ঠতি.

৫৪. ‘‘যং যং যোনুপপজ্জামি, দেৱত্তং অথ মানুসং;

পল্লঙ্কসতসহস্সানি, পৰিৱাৰেন্তি মং সদা.

৫৫. ‘‘দুৱে ভৱে সংসৰামি, দেৱত্তে অথ মানুসে;

দুৱে কুলে পজাযামি, খত্তিযে অথ ব্ৰাহ্মণে.

৫৬. ‘‘একাসনং দদিত্ৱান, পুঞ্ঞক্খেত্তে অনুত্তৰে;

ধম্মপল্লঙ্কমাদায [ধম্মপল্লঙ্কমঞ্ঞায (স্যা. ক.)], ৱিহৰামি অনাসৱো.

৫৭. ‘‘সতসহস্সিতো কপ্পে, যং দানমদদিং তদা;

দুগ্গতিং নাভিজানামি, একাসনস্সিদং ফলং.

৫৮. ‘‘কিলেসা ঝাপিতা ময্হং…পে… ৱিহৰামি অনাসৱো.

৫৯. ‘‘স্ৱাগতং ৱত মে আসি…পে… কতং বুদ্ধস্স সাসনং.

৬০. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা একাসনদাযকো থেৰো ইমা গাথাযো

অভাসিত্থাতি.

একাসনদাযকত্থেৰস্সাপদানং ততিযং.

৪. সত্তকদম্বপুপ্ফিযত্থেৰঅপদানং

৬১. ‘‘হিমৱন্তস্সাৱিদূৰে, কুক্কুটো [কদম্বো (সী. স্যা. পী.)] নাম পব্বতো;

তম্হি পব্বতপাদম্হি, সত্ত বুদ্ধা ৱসিংসু তে.

৬২. ‘‘কদম্বং পুপ্ফিতং দিস্ৱা, পগ্গহেত্ৱান অঞ্জলিং;

সত্ত মালা গহেত্ৱান, পুঞ্ঞচিত্তেন [পুণ্ণচিত্তেন (ক.)] ওকিৰিং.

৬৩. ‘‘তেন কম্মেন সুকতেন, চেতনাপণিধীহি চ;

জহিত্ৱা মানুসং দেহং, তাৱতিংসমগচ্ছহং.

৬৪. ‘‘চতুন্নৱুতিতো কপ্পে, যং কম্মমকৰিং তদা;

দুগ্গতিং নাভিজানামি, বুদ্ধপূজাযিদং ফলং.

৬৫. ‘‘কিলেসা ঝাপিতা ময্হং…পে… ৱিহৰামি অনাসৱো.

৬৬. ‘‘স্ৱাগতং ৱত মে আসি…পে… কতং বুদ্ধস্স সাসনং.

৬৭. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা সত্তকদম্বপুপ্ফিযো থেৰো ইমা

গাথাযো অভাসিত্থাতি.

সত্তকদম্বপুপ্ফিযত্থেৰস্সাপদানং চতুত্থং.

৫. কোৰণ্ডপুপ্ফিযত্থেৰঅপদানং

৬৮. ‘‘ৱনকম্মিকো পুৰে আসিং, পিতুমাতুমতেনহং [পিতুপিতামহেনহং (সী. স্যা. পী.)];

পসুমাৰেন জীৱামি, কুসলং মে ন ৱিজ্জতি.

৬৯. ‘‘মম আসযসামন্তা, তিস্সো লোকগ্গনাযকো;

পদানি তীণি দস্সেসি, অনুকম্পায চক্খুমা.

৭০. ‘‘অক্কন্তে চ পদে দিস্ৱা, তিস্সনামস্স সত্থুনো;

হট্ঠো হট্ঠেন চিত্তেন, পদে চিত্তং পসাদযিং.

৭১. ‘‘কোৰণ্ডং পুপ্ফিতং দিস্ৱা, পাদপং ধৰণীৰুহং;

সকোসকং গহেত্ৱান, পদসেট্ঠমপূজযিং.