৩. একাসনদাযকত্থেৰঅপদানং

৩৬. ‘‘হিমৱন্তস্সাৱিদূৰে, গোসিতো নাম পব্বতো;

অস্সমো সুকতো ময্হং, পণ্ণসালা সুমাপিতা.

৩৭. ‘‘নাৰদো নাম নামেন, কস্সপো ইতি মং ৱিদূ;

সুদ্ধিমগ্গং গৱেসন্তো, ৱসামি গোসিতে তদা.

৩৮. ‘‘পদুমুত্তৰো নাম জিনো, সব্বধম্মান পাৰগূ;

ৱিৱেককামো সম্বুদ্ধো, অগঞ্ছি অনিলঞ্জসা.

৩৯. ‘‘ৱনগ্গে গচ্ছমানস্স, দিস্ৱা ৰংসিং মহেসিনো;

কট্ঠমঞ্চং পঞ্ঞাপেত্ৱা, অজিনঞ্চ অপত্থৰিং.

৪০. ‘‘আসনং পঞ্ঞাপেত্ৱান, সিৰে কত্ৱান অঞ্জলিং;

সোমনস্সং পৱেদিত্ৱা, ইদং ৱচনমব্ৰৱিং.

৪১. ‘‘‘সল্লকত্তো মহাৱীৰ, আতুৰানং তিকিচ্ছকো;

মমং ৰোগপৰেতস্স [ৰাগ… (স্যা.)], তিকিচ্ছং দেহি নাযক.

৪২. ‘‘‘কল্লত্থিকা যে পস্সন্তি, বুদ্ধসেট্ঠ তুৱং মুনে;

ধুৱত্থসিদ্ধিং পপ্পোন্তি, এতেসং অজৰো [জজ্জৰো (সী. পী. ক.)] ভৱে.

৪৩. ‘‘‘ন মে দেয্যধম্মো অত্থি, পৱত্তফলভোজিহং;

ইদং মে আসনং অত্থি [ন মে দেয্যং তৱ অত্থি (সী. স্যা.)], নিসীদ কট্ঠমঞ্চকে’.

৪৪. ‘‘নিসীদি তত্থ ভগৱা, অসম্ভীতোৱ [অচ্ছম্ভিতোৱ (স্যা. ক.)] কেসৰী;

মুহুত্তং ৱীতিনামেত্ৱা, ইদং ৱচনমব্ৰৱি.

৪৫. ‘‘‘ৱিসট্ঠো [ৱিস্সত্থো (সী. পী), ৱিস্সট্ঠো (স্যা. ক.)] হোহি মা ভাযি, লদ্ধো জোতিৰসো তযা;

যং তুয্হং পত্থিতং সব্বং, পৰিপূৰিস্সতিনাগতে [পৰিপূৰিস্সতাসনং (স্যা. ক.)].

৪৬. ‘‘‘ন মোঘং তং কতং তুয্হং, পুঞ্ঞক্খেত্তে অনুত্তৰে;

সক্কা উদ্ধৰিতুং অত্তা, যস্স চিত্তং পণীহিতং [সুনীহিতং (স্যা.)].

৪৭. ‘‘‘ইমিনাসনদানেন, চেতনাপণিধীহি চ;

কপ্পসতসহস্সানি, ৱিনিপাতং ন গচ্ছসি.

৪৮. ‘‘‘পঞ্ঞাসক্খত্তুং দেৱিন্দো, দেৱৰজ্জং কৰিস্সসি;

অসীতিক্খত্তুং ৰাজা চ, চক্কৱত্তী ভৱিস্সসি.

৪৯. ‘‘‘পদেসৰজ্জং ৱিপুলং, গণনাতো অসঙ্খিযং;

সব্বত্থ সুখিতো হুত্ৱা, সংসাৰে সংসৰিস্সসি’.

৫০. ‘‘ইদং ৱত্ৱান সম্বুদ্ধো, জলজুত্তমনামকো;

নভং অব্ভুগ্গমী ৱীৰো, হংসৰাজাৱ অম্বৰে.

৫১. ‘‘হত্থিযানং অস্সযানং, সৰথং সন্দমানিকং;

লভামি সব্বমেৱেতং, একাসনস্সিদং ফলং.

৫২. ‘‘কাননং পৱিসিত্ৱাপি, যদা ইচ্ছামি আসনং;

মম সঙ্কপ্পমঞ্ঞায, পল্লঙ্কো উপতিট্ঠতি.

৫৩. ‘‘ৱাৰিমজ্ঝগতো সন্তো, যদা ইচ্ছামি আসনং;

মম সঙ্কপ্পমঞ্ঞায, পল্লঙ্কো উপতিট্ঠতি.

৫৪. ‘‘যং যং যোনুপপজ্জামি, দেৱত্তং অথ মানুসং;

পল্লঙ্কসতসহস্সানি, পৰিৱাৰেন্তি মং সদা.

৫৫. ‘‘দুৱে ভৱে সংসৰামি, দেৱত্তে অথ মানুসে;

দুৱে কুলে পজাযামি, খত্তিযে অথ ব্ৰাহ্মণে.

৫৬. ‘‘একাসনং দদিত্ৱান, পুঞ্ঞক্খেত্তে অনুত্তৰে;

ধম্মপল্লঙ্কমাদায [ধম্মপল্লঙ্কমঞ্ঞায (স্যা. ক.)], ৱিহৰামি অনাসৱো.

৫৭. ‘‘সতসহস্সিতো কপ্পে, যং দানমদদিং তদা;

দুগ্গতিং নাভিজানামি, একাসনস্সিদং ফলং.

৫৮. ‘‘কিলেসা ঝাপিতা ময্হং…পে… ৱিহৰামি অনাসৱো.

৫৯. ‘‘স্ৱাগতং ৱত মে আসি…পে… কতং বুদ্ধস্স সাসনং.

৬০. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা একাসনদাযকো থেৰো ইমা গাথাযো

অভাসিত্থাতি.

একাসনদাযকত্থেৰস্সাপদানং ততিযং.