৩. তিণসূলকছাদনিযত্থেৰঅপদানং

৭৯. ‘‘জাতিং জৰঞ্চ মৰণং, পচ্চৱেক্খিং অহং তদা;

এককো অভিনিক্খম্ম, পব্বজিং অনগাৰিযং.

৮০. ‘‘চৰমানোনুপুব্বেন, গঙ্গাতীৰং উপাগমিং;

তত্থদ্দসাসিং পথৱিং, গঙ্গাতীৰে সমুন্নতং.

৮১. ‘‘অস্সমং তত্থ মাপেত্ৱা, ৱসামি অস্সমে অহং;

সুকতো চঙ্কমো ময্হং, নানাদিজগণাযুতো.

৮২. ‘‘মমুপেন্তি চ ৱিস্সত্থা, কূজন্তি চ মনোহৰং;

ৰমমানো সহ তেহি, ৱসামি অস্সমে অহং.

৮৩. ‘‘মম অস্সমসামন্তা, মিগৰাজা চতুক্কমো;

আসযা অভিনিক্খম্ম, গজ্জি সো অসনী ৱিয.

৮৪. ‘‘নদিতে মিগৰাজে চ, হাসো মে উদপজ্জথ;

মিগৰাজং গৱেসন্তো, অদ্দসং লোকনাযকং.

৮৫. ‘‘দিস্ৱানাহং দেৱদেৱং, তিস্সং লোকগ্গনাযকং;

হট্ঠো হট্ঠেন চিত্তেন, পূজযিং নাগকেসৰং.

৮৬. ‘‘উগ্গচ্ছন্তংৱ সূৰিযং, সালৰাজংৱ পুপ্ফিতং;

ওসধিংৱ ৱিৰোচন্তং, সন্থৱিং লোকনাযকং.

৮৭. ‘‘‘তৱ ঞাণেন সব্বঞ্ঞু, মোচেসিমং সদেৱকং;

তৱং আৰাধযিত্ৱান, জাতিযা পৰিমুচ্চৰে.

৮৮. ‘‘‘অদস্সনেন সব্বঞ্ঞু, বুদ্ধানং সব্বদস্সিনং;

পতন্তিৱীচিনিৰযং, ৰাগদোসেহি ওফুটা [ওত্থটা (স্যা.)].

৮৯. ‘‘‘তৱ দস্সনমাগম্ম, সব্বঞ্ঞু লোকনাযক;

পমুচ্চন্তি ভৱা সব্বা, ফুসন্তি অমতং পদং.

৯০. ‘‘‘যদা বুদ্ধা চক্খুমন্তো, উপ্পজ্জন্তি পভঙ্কৰা;

কিলেসে ঝাপযিত্ৱান, আলোকং দস্সযন্তি তে’.

৯১. ‘‘কিত্তযিত্ৱান সম্বুদ্ধং, তিস্সং লোকগ্গনাযকং;

হট্ঠো হট্ঠেন চিত্তেন, তিণসূলং অপূজযিং.

৯২. ‘‘মম সঙ্কপ্পমঞ্ঞায, তিস্সো লোকগ্গনাযকো;

সকাসনে নিসীদিত্ৱা, ইমা গাথা অভাসথ.

৯৩. ‘‘‘যো মং পুপ্ফেহি ছাদেসি, পসন্নো সেহি পাণিভি;

তমহং কিত্তযিস্সামি, সুণাথ মম ভাসতো.

৯৪. ‘‘‘পঞ্চৱীসতিক্খত্তুং সো, দেৱৰজ্জং কৰিস্সতি;

পঞ্চসত্ততিক্খত্তুঞ্চ, চক্কৱত্তী ভৱিস্সতি.

৯৫. ‘‘‘পদেসৰজ্জং ৱিপুলং, গণনাতো অসঙ্খিযং;

তস্স কম্মনিস্সন্দেন [কম্মস্স নিস্সন্দো (সী. স্যা. পী.)], পুপ্ফানং পূজনায চ [সো (স্যা. পী.)].

৯৬. ‘‘‘সীসংন্হাতো চযং পোসো, পুপ্ফমাকঙ্খতে যদি [সাযং পাতো চযং পোসো, পুপ্ফেহি মং অছাদযি (স্যা.)];

পুঞ্ঞকম্মেন সংযুত্তং [সংযুত্তো (সী. স্যা. পী.)], পুৰতো পাতুভৱিস্সতি.

৯৭. ‘‘‘যং যং ইচ্ছতি কামেহি, তং তং পাতুভৱিস্সতি;

সঙ্কপ্পং পৰিপূৰেত্ৱা, নিব্বাযিস্সতিনাসৱো’.

অট্ঠাৰসমং ভাণৱাৰং.

৯৮. ‘‘কিলেসে ঝাপযিত্ৱান, সম্পজানো পতিস্সতো;

একাসনে নিসীদিত্ৱা, অৰহত্তমপাপুণিং.

৯৯. ‘‘চঙ্কমন্তো নিপজ্জন্তো, নিসিন্নো উদ ৱা ঠিতো;

বুদ্ধসেট্ঠং সৰিত্ৱান, ৱিহৰামি অহং সদা.

১০০. ‘‘চীৱৰে পিণ্ডপাতে চ, পচ্চযে সযনাসনে;

তত্থ মে ঊনতা নত্থি, বুদ্ধপূজাযিদং ফলং.

১০১. ‘‘সো দানি পত্তো অমতং, সন্তং পদমনুত্তৰং;

সব্বাসৱে পৰিঞ্ঞায, ৱিহৰামি অনাসৱো.

১০২. ‘‘দ্ৱেনৱুতে ইতো কপ্পে, যং পুপ্ফমভিপূজযিং;

দুগ্গতিং নাভিজানামি, বুদ্ধপূজাযিদং ফলং.

১০৩. ‘‘কিলেসা ঝাপিতা ময্হং…পে… ৱিহৰামি অনাসৱো.

১০৪. ‘‘স্ৱাগতং ৱত মে আসি…পে… কতং বুদ্ধস্স সাসনং.

১০৫. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা তিণসূলকছাদনিযো [তিণসূলিকছাদনিযো (ক.)] থেৰো ইমা গাথাযো অভাসিত্থাতি.

তিণসূলকছাদনিযত্থেৰস্সাপদানং ততিযং.