৪. মধুমংসদাযকত্থেৰঅপদানং

১০৬. ‘‘নগৰে বন্ধুমতিযা, সূকৰিকো অহোসহং;

উক্কোটং ৰন্ধযিত্ৱান [উক্কোটকং ৰন্ধযিত্ৱা (সী. স্যা.)], মধুমংসম্হি [মধুসপ্পিম্হি (পী.), মধুং মংসম্হি (ক.)] ওকিৰিং.

১০৭. ‘‘সন্নিপাতং অহং গন্ত্ৱা, একং পত্তং গহেসহং;

পূৰযিত্ৱান তং পত্তং, ভিক্খুসঙ্ঘস্সদাসহং.

১০৮. ‘‘যোত্থ থেৰতৰো ভিক্খু, নিয্যাদেসি মমং তদা;

ইমিনা পত্তপূৰেন, লভস্সু ৱিপুলং সুখং.

১০৯. ‘‘দুৱে সম্পত্তিযো ভুত্ৱা, সুক্কমূলেন চোদিতো;

পচ্ছিমে ৱত্তমানম্হি, কিলেসে ঝাপযিস্সতি.

১১০. ‘‘তত্থ চিত্তং পসাদেত্ৱা, তাৱতিংসমগচ্ছহং;

তত্থ ভুত্ৱা পিৱিত্ৱা চ, লভামি ৱিপুলং সুখং.

১১১. ‘‘মণ্ডপে ৰুক্খমূলে ৱা, পুব্বকম্মং অনুস্সৰিং;

অন্নপানাভিৱস্সো মে, অভিৱস্সতি তাৱদে.

১১২. ‘‘ইদং পচ্ছিমকং ময্হং, চৰিমো ৱত্ততে ভৱো;

ইধাপি অন্নপানং মে, ৱস্সতে সব্বকালিকং.

১১৩. ‘‘তেনেৱ মধুদানেন [মংসদানেন (সী. পী.)], সন্ধাৱিত্ৱা ভৱে অহং;

সব্বাসৱে পৰিঞ্ঞায, ৱিহৰামি অনাসৱো.

১১৪. ‘‘একনৱুতিতো কপ্পে, যং দানমদদিং তদা;

দুগ্গতিং নাভিজানামি, মধুদানস্সিদং ফলং.

১১৫. ‘‘কিলেসা ঝাপিতা ময্হং…পে… ৱিহৰামি অনাসৱো.

১১৬. ‘‘স্ৱাগতং ৱত মে আসি…পে… কতং বুদ্ধস্স সাসনং.

১১৭. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা মধুমংসদাযকো থেৰো ইমা গাথাযো অভাসিত্থাতি.

মধুমংসদাযকত্থেৰস্সাপদানং চতুত্থং.