২. একছত্তিযত্থেৰঅপদানং

৩২. ‘‘চন্দভাগানদীতীৰে, অস্সমো সুকতো মম;

সুসুদ্ধপুলিনাকিণ্ণো, পন্নসালা সুমাপিতা.

৩৩. ‘‘উত্তানকূলা নদিকা, সুপতিত্থা মনোৰমা;

মচ্ছকচ্ছপসম্পন্না [… সঞ্ছন্না (ক.)], সুসুমাৰনিসেৱিতা.

৩৪. ‘‘অচ্ছা দীপী চ মযূৰা, কৰৱীকা চ সাড়িকা;

কূজন্তি সব্বদা এতে, সোভযন্তা মমস্সমং.

৩৫. ‘‘কোকিলা মঞ্জুভাণী চ, হংসা চ মধুৰস্সৰা;

অভিকূজন্তি তে তত্থ, সোভযন্তা মমস্সমং.

৩৬. ‘‘সীহা ব্যগ্ঘা ৱৰাহা চ, অচ্ছ [ৱক (সী. পী.), বকা (স্যা.), ৱকা (ক.)] কোকতৰচ্ছকা;

গিৰিদুগ্গম্হি নাদেন্তি, সোভযন্তা মমস্সমং.

৩৭. ‘‘এণীমিগা চ সৰভা, ভেৰণ্ডা সূকৰা বহূ;

গিৰিদুগ্গম্হি নাদেন্তি, সোভযন্তা মমস্সমং.

৩৮. ‘‘উদ্দালকা চম্পকা চ, পাটলী সিন্দুৱাৰকা;

অতিমুত্তা অসোকা চ, সোভযন্তি মমস্সমং [পুপ্ফন্তি মম অস্সমে (সী. পী.)].

৩৯. ‘‘অঙ্কোলা যূথিকা চেৱ, সত্তলী বিম্বিজালিকা;

কণিকাৰা চ পুপ্ফন্তি, সোভযন্তা মমস্সমং [কণিকাকণিকাৰা চ, পুপ্ফন্তি মম অস্সমে (সী. স্যা. পী.)].

৪০. ‘‘নাগা সালা চ সড়লা, পুণ্ডৰীকেত্থ পুপ্ফিতা;

দিব্বগন্ধং সম্পৱন্তা, সোভযন্তি মমস্সমং.

৪১. ‘‘অজ্জুনা অসনা চেত্থ, মহানামা চ পুপ্ফিতা;

সালা চ কঙ্গুপুপ্ফা চ, সোভযন্তি মমস্সমং.

৪২. ‘‘অম্বা জম্বূ চ তিলকা, নিম্বা চ সালকল্যাণী;

দিব্বগন্ধং সম্পৱন্তা, সোভযন্তি মমস্সমং.

৪৩. ‘‘অসোকা চ কপিট্ঠা চ, গিৰিমালেত্থ [ভগিনিমালেত্থ (সী. পী.), ভগিনিমালা চ (স্যা.)] পুপ্ফিতা;

দিব্বগন্ধং সম্পৱন্তা, সোভযন্তি মমস্সমং.

৪৪. ‘‘কদম্বা কদলী চেৱ, ইসিমুগ্গা চ ৰোপিতা;

ধুৱং ফলানি ধাৰেন্তি, সোভযন্তা মমস্সমং.

৪৫. ‘‘হৰীতকা আমলকা, অম্বজম্বুৱিভীতকা;

কোলা ভল্লাতকা বিল্লা, ফলিনো মম অস্সমে.

৪৬. ‘‘অৱিদূৰে পোক্খৰণী, সুপতিত্থা মনোৰমা;

মন্দালকেহি সঞ্ছন্না, পদুমুপ্পলকেহি চ.

৪৭. ‘‘গব্ভং গণ্হন্তি পদুমা, অঞ্ঞে পুপ্ফন্তি কেসৰী;

ওপত্তকণ্ণিকা চেৱ, পুপ্ফন্তি মম অস্সমে.

৪৮. ‘‘পাঠীনা পাৱুসা মচ্ছা, বলজা মুঞ্জৰোহিতা;

অচ্ছোদকম্হি ৱিচৰং, সোভযন্তি মমস্সমং.

৪৯. ‘‘নযিতা অম্বগন্ধী চ, অনুকূলে চ কেতকা;

দিব্বগন্ধং সম্পৱন্তা, সোভযন্তি মমস্সমং.

৫০. ‘‘মধু ভিসম্হা সৱতি, খীৰসপ্পি মুড়ালিভি;

দিব্বগন্ধং সম্পৱন্তা, সোভযন্তি মমস্সমং.

৫১. ‘‘পুলিনা সোভনা তত্থ, আকিণ্ণা জলসেৱিতা;

ওপুপ্ফা পুপ্ফিতা সেন্তি, সোভযন্তা মমস্সমং.

৫২. ‘‘জটাভাৰেন ভৰিতা, অজিনুত্তৰৱাসনা;

ৱাকচীৰধৰা সব্বে, সোভযন্তি মমস্সমং.

৫৩. ‘‘যুগমত্তমপেক্খন্তা, নিপকা সন্তৱুত্তিনো;

কামভোগে অনপেক্খা, ৱসন্তি মম অস্সমে.

৫৪. ‘‘পৰূড়্হকচ্ছনখলোমা, পঙ্কদন্তা ৰজস্সিৰা;

ৰজোজল্লধৰা সব্বে, ৱসন্তি মম অস্সমে.

৫৫. ‘‘অভিঞ্ঞাপাৰমিপ্পত্তা, অন্তলিক্খচৰা চ তে;

উগ্গচ্ছন্তা নভং এতে, সোভযন্তি মমস্সমং.

৫৬. ‘‘তেহি সিস্সেহি পৰিৱুতো, ৱসামি ৱিপিনে তদা;

ৰত্তিন্দিৱং ন জানামি, সদা ঝানসমপ্পিতো.

৫৭. ‘‘ভগৱা তম্হি সমযে, অত্থদস্সী মহামুনি;

তমন্ধকাৰং নাসেন্তো, উপ্পজ্জি লোকনাযকো.

৫৮. ‘‘অথ অঞ্ঞতৰো সিস্সো, আগচ্ছি মম সন্তিকং;

মন্তে অজ্ঝেতুকামো সো, ছড়ঙ্গং নাম লক্খণং.

৫৯. ‘‘বুদ্ধো লোকে সমুপ্পন্নো, অত্থদস্সী মহামুনি;

চতুসচ্চং পকাসেন্তো, দেসেতি অমতং পদং.

৬০. ‘‘তুট্ঠহট্ঠো পমুদিতো, ধম্মন্তৰগতাসযো;

অস্সমা অভিনিক্খম্ম, ইদং ৱচনমব্ৰৱিং.

৬১. ‘‘‘বুদ্ধো লোকে সমুপ্পন্নো, দ্ৱত্তিংসৱৰলক্খণো;

এথ সব্বে গমিস্সাম, সম্মাসম্বুদ্ধসন্তিকং’.

৬২. ‘‘ওৱাদপটিকৰা তে, সধম্মে পাৰমিং গতা;

সাধূতি সম্পটিচ্ছিংসু, উত্তমত্থগৱেসকা.

৬৩. ‘‘জটাভাৰভৰিতা তে [জটাভাৰেন ভৰিতা (ক.)], অজিনুত্তৰৱাসনা;

উত্তমত্থং গৱেসন্তা, নিক্খমিংসু ৱনা তদা.

৬৪. ‘‘ভগৱা তম্হি সমযে, অত্থদস্সী মহাযসো;

চতুসচ্চং পকাসেন্তো, দেসেতি অমতং পদং.

৬৫. ‘‘সেতচ্ছত্তং গহেত্ৱান, বুদ্ধসেট্ঠস্স ধাৰযিং;

একাহং ধাৰযিত্ৱান, বুদ্ধসেট্ঠং অৱন্দহং.

৬৬. ‘‘অত্থদস্সী তু ভগৱা, লোকজেট্ঠো নৰাসভো;

ভিক্খুসঙ্ঘে নিসীদিত্ৱা, ইমা গাথা অভাসথ.

৬৭. ‘‘‘যো মে ছত্তং অধাৰেসি, পসন্নো সেহি পাণিভি;

তমহং কিত্তযিস্সামি, সুণাথ মম ভাসতো.

৬৮. ‘‘‘ইমস্স জাযমানস্স, দেৱত্তে অথ মানুসে;

ধাৰেস্সতি সদা ছত্তং, ছত্তদানস্সিদং ফলং.

৬৯. ‘‘‘সত্তসত্ততিকপ্পানি, দেৱলোকে ৰমিস্সতি;

সহস্সক্খত্তুং ৰাজা চ, চক্কৱত্তী ভৱিস্সতি.

৭০. ‘‘‘সত্তসত্ততিক্খত্তুঞ্চ, দেৱৰজ্জং কৰিস্সতি;

পদেসৰজ্জং ৱিপুলং, গণনাতো অসঙ্খিযং.

৭১. ‘‘‘অট্ঠাৰসে কপ্পসতে, গোতমো সক্যপুঙ্গৱো;

তমন্ধকাৰং নাসেন্তো, উপ্পজ্জিস্সতি চক্খুমা.

৭২. ‘‘‘তস্স ধম্মেসু দাযাদো, ওৰসো ধম্মনিম্মিতো;

সব্বাসৱে পৰিঞ্ঞায, ৱিহৰিস্সতিনাসৱো’.

৭৩. ‘‘যতো অহং কম্মমকং, ছত্তং বুদ্ধস্স ধাৰযং;

এত্থন্তৰে ন জানামি, সেতচ্ছত্তং অধাৰিতং.

৭৪. ‘‘ইদং পচ্ছিমকং ময্হং, চৰিমো ৱত্ততে ভৱো;

ছত্তধাৰণমজ্জাপি, ৱত্ততে নিচ্চকালিকং.

৭৫. ‘‘অহো মে সুকতং কম্মং, অত্থদস্সিস্স তাদিনো;

সব্বাসৱা পৰিক্খীণা, নত্থি দানি পুনব্ভৱো.

৭৬. ‘‘কিলেসা ঝাপিতা ময্হং…পে… ৱিহৰামি অনাসৱো.

৭৭. ‘‘স্ৱাগতং ৱত মে আসি…পে… কতং বুদ্ধস্স সাসনং.

৭৮. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা একছত্তিযো থেৰো ইমা গাথাযো অভাসিত্থাতি;

একছত্তিযত্থেৰস্সাপদানং দুতিযং.