১০. মঞ্চদাযকত্থেৰঅপদানং

১৮৪. ‘‘পৰিনিব্বুতে কাৰুণিকে, সিদ্ধত্থে লোকনাযকে;

ৱিত্থাৰিকে পাৱচনে, দেৱমানুসসক্কতে.

১৮৫. ‘‘চণ্ডালো আসহং তত্থ, আসন্দিপীঠকাৰকো;

তেন কম্মেন জীৱামি, তেন পোসেমি দাৰকে.

১৮৬. ‘‘আসন্দিং সুকতং কত্ৱা, পসন্নো সেহি পাণিভি;

সযমেৱুপগন্ত্ৱান, ভিক্খুসঙ্ঘস্সদাসহং.

১৮৭. ‘‘তেন কম্মেন সুকতেন, চেতনাপণিধীহি চ;

জহিত্ৱা মানুসং দেহং, তাৱতিংসমগচ্ছহং.

১৮৮. ‘‘দেৱলোকগতো সন্তো, মোদামি তিদসে গণে;

সযনানি মহগ্ঘানি, নিব্বত্তন্তি যদিচ্ছকং.

১৮৯. ‘‘পঞ্ঞাসক্খত্তুং দেৱিন্দো, দেৱৰজ্জমকাৰযিং;

অসীতিক্খত্তুং ৰাজা চ, চক্কৱত্তী অহোসহং.

১৯০. ‘‘পদেসৰজ্জং ৱিপুলং, গণনাতো অসঙ্খিযং;

সুখিতো যসৱা হোমি, মঞ্চদানস্সিদং ফলং.

১৯১. ‘‘দেৱলোকা চৱিত্ৱান, এমি চে মানুসং ভৱং;

মহাৰহা সুসযনা, সযমেৱ ভৱন্তি মে.

১৯২. ‘‘অযং পচ্ছিমকো ময্হং, চৰিমো ৱত্ততে ভৱো;

অজ্জাপি সযনে কালে [সযনকালে (স্যা.)], সযনং উপতিট্ঠতি.

১৯৩. ‘‘চতুন্নৱুতিতো কপ্পে, যং দানমদদিং তদা;

দুগ্গতিং নাভিজানামি, মঞ্চদানস্সিদং ফলং.

১৯৪. ‘‘কিলেসা ঝাপিতা ময্হং…পে… ৱিহৰামি অনাসৱো.

১৯৫. ‘‘স্ৱাগতং ৱত মে আসি…পে… কতং বুদ্ধস্স সাসনং.

১৯৬. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা মঞ্চদাযকো থেৰো ইমা গাথাযো

অভাসিত্থাতি.

মঞ্চদাযকত্থেৰস্সাপদানং দসমং.

ভদ্দালিৱগ্গো বাচত্তালীসমো.