১. ভদ্দালিত্থেৰঅপদানং

১. ‘‘সুমেধো নাম সম্বুদ্ধো, অগ্গো কাৰুণিকো মুনি;

ৱিৱেককামো লোকগ্গো, হিমৱন্তমুপাগমি.

২. ‘‘অজ্ঝোগাহেত্ৱা হিমৱং, সুমেধো লোকনাযকো;

পল্লঙ্কং আভুজিত্ৱান, নিসীদি পুৰিসুত্তমো.

৩. ‘‘সমাধিং সো সমাপন্নো, সুমেধো লোকনাযকো;

সত্তৰত্তিন্দিৱং বুদ্ধো, নিসীদি পুৰিসুত্তমো.

৪. ‘‘খাৰিভাৰং [খাৰিকাজং (সী.)] গহেত্ৱান, ৱনমজ্ঝোগহিং অহং;

তত্থদ্দসাসিং সম্বুদ্ধং, ওঘতিণ্ণমনাসৱং.

৫. ‘‘সম্মজ্জনিং গহেত্ৱান, সম্মজ্জিত্ৱান অস্সমং;

চতুদণ্ডে ঠপেত্ৱান, অকাসিং মণ্ডপং তদা.

৬. ‘‘সালপুপ্ফং আহৰিত্ৱা, মণ্ডপং ছাদযিং অহং;

পসন্নচিত্তো সুমনো, অভিৱন্দিং তথাগতং.

৭. ‘‘যং ৱদন্তি সুমেধোতি, ভূৰিপঞ্ঞং সুমেধসং;

ভিক্খুসঙ্ঘে নিসীদিত্ৱা, ইমা গাথা অভাসথ.

৮. ‘‘‘বুদ্ধস্স গিৰমঞ্ঞায, সব্বে দেৱা সমাগমুং;

অসংসযং বুদ্ধসেট্ঠো, ধম্মং দেসেতি চক্খুমা.

৯. ‘‘‘সুমেধো নাম সম্বুদ্ধো, আহুতীনং পটিগ্গহো;

দেৱসঙ্ঘে নিসীদিত্ৱা, ইমা গাথা অভাসথ.

১০. ‘‘‘যো মে সত্তাহং মণ্ডপং, ধাৰযী সালছাদিতং;

তমহং কিত্তযিস্সামি, সুণাথ মম ভাসতো.

১১. ‘‘‘দেৱভূতো মনুস্সো ৱা, হেমৱণ্ণো ভৱিস্সতি;

পহূতভোগো হুত্ৱান, কামভোগী ভৱিস্সতি.

১২. ‘‘‘সট্ঠি নাগসহস্সানি, সব্বালঙ্কাৰভূসিতা;

সুৱণ্ণকচ্ছা মাতঙ্গা, হেমকপ্পনৱাসসা.

১৩. ‘‘‘আৰূড়্হা গামণীযেহি, তোমৰঙ্কুসপাণিভি;

সাযং পাতো [সাযপাতো (পী.)] উপট্ঠানং, আগমিস্সন্তিমং নৰং;

তেহি নাগেহি পৰিৱুতো, ৰমিস্সতি অযং নৰো.

১৪. ‘‘‘সট্ঠি অস্সসহস্সানি, সব্বালঙ্কাৰভূসিতা;

আজানীযাৱ জাতিযা, সিন্ধৱা সীঘৱাহিনো.

১৫. ‘‘‘আৰূড়্হা গামণীযেহি, ইল্লিযাচাপধাৰিভি;

পৰিৱাৰেস্সন্তিমং নিচ্চং, বুদ্ধপূজাযিদং ফলং.

১৬. ‘‘‘সট্ঠি ৰথসহস্সানি, সব্বালঙ্কাৰভূসিতা;

দীপা অথোপি ৱেযগ্ঘা, সন্নদ্ধা উস্সিতদ্ধজা.

১৭. ‘‘‘আৰূড়্হা গামণীযেহি, চাপহত্থেহি ৱম্মিভি;

পৰিৱাৰেস্সন্তিমং নিচ্চং, বুদ্ধপূজাযিদং ফলং.

১৮. ‘‘‘সট্ঠি গামসহস্সানি, পৰিপুণ্ণানি সব্বসো;

পহূতধনধঞ্ঞানি, সুসমিদ্ধানি সব্বসো;

সদা পাতুভৱিস্সন্তি, বুদ্ধপূজাযিদং ফলং.

১৯. ‘‘‘হত্থী অস্সা ৰথা পত্তী, সেনা চ চতুৰঙ্গিনী;

পৰিৱাৰেস্সন্তিমং নিচ্চং, বুদ্ধপূজাযিদং ফলং.

২০. ‘‘‘অট্ঠাৰসে কপ্পসতে, দেৱলোকে ৰমিস্সতি;

সহস্সক্খত্তুং ৰাজা চ, চক্কৱত্তী ভৱিস্সতি.

২১. ‘‘‘সতানং তীণিক্খত্তুঞ্চ, দেৱৰজ্জং কৰিস্সতি;

পদেসৰজ্জং ৱিপুলং, গণনাতো অসঙ্খিযং.

২২. ‘‘‘তিংসকপ্পসহস্সম্হি, ওক্কাককুলসম্ভৱো;

গোতমো নাম গোত্তেন, সত্থা লোকে ভৱিস্সতি.

২৩. ‘‘‘তস্স ধম্মেসু দাযাদো, ওৰসো ধম্মনিম্মিতো;

সব্বাসৱে পৰিঞ্ঞায, ৱিহৰিস্সতিনাসৱো’.

২৪. ‘‘তিংসকপ্পসহস্সম্হি, অদ্দসং লোকনাযকং;

এত্থন্তৰমুপাদায, গৱেসিং অমতং পদং.

২৫. ‘‘লাভা ময্হং সুলদ্ধং মে, যমহঞ্ঞাসি সাসনং;

তিস্সো ৱিজ্জা অনুপ্পত্তা, কতং বুদ্ধস্স সাসনং.

২৬. ‘‘নমো তে পুৰিসাজঞ্ঞ, নমো তে পুৰিসুত্তম;

তৱ ঞাণং পকিত্তেত্ৱা, পত্তোম্হি অচলং পদং.

২৭. ‘‘যং যং যোনুপপজ্জামি, দেৱত্তং অথ মানুসং;

সব্বত্থ সুখিতো হোমি, ফলং মে ঞাণকিত্তনে.

২৮. ‘‘ইদং পচ্ছিমকং ময্হং, চৰিমো ৱত্ততে ভৱো;

নাগোৱ বন্ধনং ছেত্ৱা, ৱিহৰামি অনাসৱো.

২৯. ‘‘কিলেসা ঝাপিতা ময্হং, ভৱা সব্বে সমূহতা;

নাগোৱ বন্ধনং ছেত্ৱা, ৱিহৰামি অনাসৱো.

৩০. ‘‘স্ৱাগতং ৱত মে আসি, মম বুদ্ধস্স সন্তিকে;

তিস্সো ৱিজ্জা অনুপ্পত্তা, কতং বুদ্ধস্স সাসনং.

৩১. ‘‘পটিসম্ভিদা চতস্সো, ৱিমোক্খাপি চ অট্ঠিমে;

ছড়ভিঞ্ঞা সচ্ছিকতা, কতং বুদ্ধস্স সাসনং’’.

ইত্থং সুদং আযস্মা ভদ্দালিত্থেৰো ইমা গাথাযো অভাসিত্থাতি.

ভদ্দালিত্থেৰস্সাপদানং পঠমং.