৯. জতুকণ্ণিত্থেৰঅপদানং

২৭৬. ‘‘নগৰে হংসৱতিযা, সেট্ঠিপুত্তো অহোসহং;

সমপ্পিতো কামগুণে, পৰিচাৰেমহং তদা.

২৭৭. ‘‘ততো [তযো (সী.)] পাসাদমাৰুয্হ, মহাভোগে ৱলঞ্জকো [উব্বিদ্ধা গেহলুঞ্জকা (ক.), উব্বিদ্ধাগেহলঞ্ছকা (সী.)];

তত্থ নচ্চেহি গীতেহি, পৰিচাৰেমহং তদা.

২৭৮. ‘‘তূৰিযা আহতা ময্হং, সম্মতাড়সমাহিতা;

নচ্চন্তা [ৰঞ্জন্তী (স্যা.), ৰজ্জন্তা (ক.)] ইত্থিযো সব্বা, হৰন্তিযেৱ মে মনো.

২৭৯. ‘‘চেলাপিকা [চেলাৱকা (স্যা.), ৱেলামিকা (পী.)] লামণিকা [ৱামনিকা (স্যা. পী.)], কুঞ্জৱাসী তিমজ্ঝিকা [কুঞ্জৱা সীহিমজ্ঝিতা (স্যা.), কুজ্জা ৱা সীহিমজ্ঝিকা (পী.)];

লঙ্ঘিকা সোকজ্ঝাযী চ, পৰিৱাৰেন্তি মং সদা.

২৮০. ‘‘ৱেতাড়িনো কুম্ভথূনী, নটা চ নচ্চকা বহূ;

নটকা নাটকা চেৱ, পৰিৱাৰেন্তি মং সদা.

২৮১. ‘‘কপ্পকা ন্হাপকা সূদা, মালাকাৰা সুপাসকা [সুমাপকা (সী. স্যা.)];

জল্লা মল্লা চ তে সব্বে, পৰিৱাৰেন্তি মং সদা.

২৮২. ‘‘এতেসু কীড়মানেসু, সিক্খিতে কতুপাসনে;

ৰত্তিন্দিৱং ন জানামি, ইন্দোৱ তিদসঙ্গণে.

২৮৩. ‘‘অদ্ধিকা পথিকা সব্বে, যাচকা ৱৰকা বহূ;

উপগচ্ছন্তি তে নিচ্চং, ভিক্খযন্তা মমং ঘৰং.

২৮৪. ‘‘সমণা ব্ৰাহ্মণা চেৱ, পুঞ্ঞক্খেত্তা অনুত্তৰা;

ৱড্ঢযন্তা মমং পুঞ্ঞং, আগচ্ছন্তি মমং ঘৰং.

২৮৫. ‘‘পটগা [পটকা (সী. স্যা.), পদকা (পী.)] লটুকা [লটকা (সী.)] সব্বে, নিগণ্ঠা পুপ্ফসাটকা;

তেদণ্ডিকা একসিখা, আগচ্ছন্তি মমং ঘৰং.

২৮৬. ‘‘আজীৱকা ৱিলুত্তাৱী, গোধম্মা দেৱধম্মিকা;

ৰজোজল্লধৰা এতে, আগচ্ছন্তি মমং ঘৰং.

২৮৭. ‘‘পৰিত্তকা সন্তিপত্তা [পৰিৱত্তকা সিদ্ধিপত্তা (সী. স্যা. পী.)], কোধপুগ্গনিকা [কোণ্ডপুগ্গণিকা (সী.), কোণ্ডপুগ্গলিকা (পী.)] বহূ;

তপস্সী ৱনচাৰী চ, আগচ্ছন্তি মমং ঘৰং.

২৮৮. ‘‘ওড্ডকা দমিড়া চেৱ, সাকুড়া মলৱাড়কা [মলযালকা (সী. স্যা. পী.)];

সৱৰা যোনকা চেৱ, আগচ্ছন্তি মমং ঘৰং.

২৮৯. ‘‘অন্ধকা মুণ্ডকা সব্বে, কোটলা হনুৱিন্দকা [কোলকা সানুৱিন্দকা (সী. পী.)];

আৰাৱচীনৰট্ঠা চ, আগচ্ছন্তি মমং ঘৰং.

২৯০. ‘‘অলসন্দকা [অলসন্তা (ক.)] পল্লৱকা, ধম্মৰা নিগ্গমানুসা [বব্বৰা ভগ্গকাৰুসা (সী.)];

গেহিকা [ৰোহিতা (সী.), বাহিকা (পী.)] চেতপুত্তা চ, আগচ্ছন্তি মমং ঘৰং.

২৯১. ‘‘মাধুৰকা কোসলকা, কলিঙ্গা [কাসিকা (সী.)] হত্থিপোৰিকা;

ইসিণ্ডা মক্কলা চেৱ, আগচ্ছন্তি মমং ঘৰং.

২৯২. ‘‘চেলাৱকা আৰব্ভা [অৰম্মা (সী. পী.)] চ, ওঘুড়্হা [ওক্কলা (সী.)] মেঘলা বহূ;

খুদ্দকা সুদ্দকা চেৱ, আগচ্ছন্তি মমং ঘৰং.

২৯৩. ‘‘ৰোহণা সিন্ধৱা চেৱ, চিতকা এককণ্ণিকা;

সুৰট্ঠা অপৰন্তা চ, আগচ্ছন্তি মমং ঘৰং.

২৯৪. ‘‘সুপ্পাৰকা কুমাৰা [কিকুমাৰা (সী. পী.)] চ, মল্লসোৱণ্ণভূমিকা [মলযা সোণ্ণভূমিকা (সী. স্যা. পী.)];

ৱজ্জীতঙ্গা [ৱজ্জী তাৰা (সী.), ৱজ্জীহাৰা (স্যা. পী.)] চ তে সব্বে, আগচ্ছন্তি মমং ঘৰং.

২৯৫. ‘‘নড়কাৰা পেসকাৰা, চম্মকাৰা চ তচ্ছকা;

কম্মাৰা কুম্ভকাৰা চ, আগচ্ছন্তি মমং ঘৰং.

২৯৬. ‘‘মণিকাৰা লোহকাৰা, সোণ্ণকাৰা চ দুস্সিকা;

তিপুকাৰা চ তে সব্বে, আগচ্ছন্তি মমং ঘৰং.

২৯৭. ‘‘উসুকাৰা ভমকাৰা, পেসকাৰা চ গন্ধিকা;

ৰজকা তুন্নৱাযা চ, আগচ্ছন্তি মমং ঘৰং.

২৯৮. ‘‘তেলিকা কট্ঠহাৰা চ, উদহাৰা চ পেস্সিকা;

সূপিকা সূপৰক্খা চ, আগচ্ছন্তি মমং ঘৰং.

২৯৯. ‘‘দোৱাৰিকা অনীকট্ঠা, বন্ধিকা [ৱন্দিকা (সী.), গন্থিকা (স্যা.), সন্দিকা (পী.)] পুপ্ফছড্ডকা;

হত্থাৰুহা হত্থিপালা, আগচ্ছন্তি মমং ঘৰং.

৩০০. ‘‘আনন্দস্স মহাৰঞ্ঞো [আনন্দস্স নাম ৰঞ্ঞো (স্যা.), অৰিন্দমনাম ৰঞ্ঞো (পী.)], মমত্থস্স [পমত্তস্স (সী. পী.), সমগ্গস্স (স্যা.)] অদাসহং;

সত্তৱণ্ণেন ৰতনেন, ঊনত্থং [ঊনত্তং (সী. স্যা. পী.)] পূৰযামহং.

৩০১. ‘‘যে মযা কিত্তিতা সব্বে, নানাৱণ্ণা বহূ জনা;

তেসাহং চিত্তমঞ্ঞায, তপ্পযিং ৰতনেনহং.

৩০২. ‘‘ৱগ্গূসু ভাসমানাসু, ৱজ্জমানাসু ভেৰিসু;

সঙ্খেসু ধমযন্তেসু, সকগেহে ৰমামহং.

৩০৩. ‘‘ভগৱা তম্হি সমযে, পদুমুত্তৰনাযকো;

ৱসীসতসহস্সেহি, পৰিক্খীণাসৱেহি সো.

৩০৪. ‘‘ভিক্খূহি সহিতো ৱীথিং, পটিপজ্জিত্থ চক্খুমা;

ওভাসেন্তো দিসা সব্বা, দীপৰুক্খোৱ জোততি.

৩০৫. ‘‘ৱজ্জন্তি ভেৰিযো সব্বা, গচ্ছন্তে লোকনাযকে;

পভা নিদ্ধাৱতে তস্স, সতৰংসীৱ উগ্গতো.

৩০৬. ‘‘কৱাটন্তৰিকাযাপি, পৱিট্ঠেন চ ৰস্মিনা;

অন্তোঘৰেসু ৱিপুলো, আলোকো আসি তাৱদে.

৩০৭. ‘‘পভং দিস্ৱান বুদ্ধস্স, পাৰিসজ্জে অৱোচহং;

নিস্সংসযং বুদ্ধসেট্ঠো, ইমং ৱীথিমুপাগতো.

৩০৮. ‘‘খিপ্পং ওৰুয্হ পাসাদা, অগমিং অন্তৰাপণং;

সম্বুদ্ধং অভিৱাদেত্ৱা, ইদং ৱচনমব্ৰৱিং.

৩০৯. ‘‘‘অনুকম্পতু মে বুদ্ধো, জলজুত্তমনাযকো;

ৱসীসতসহস্সেহি, অধিৱাসেসি সো মুনি’.

৩১০. ‘‘নিমন্তেত্ৱান সম্বুদ্ধং, অভিনেসিং সকং ঘৰং;

তত্থ অন্নেন পানেন, সন্তপ্পেসিং মহামুনিং.

৩১১. ‘‘ভুত্তাৱিং কালমঞ্ঞায, বুদ্ধসেট্ঠস্স তাদিনো;

সতঙ্গিকেন তূৰিযেন, বুদ্ধসেট্ঠং উপট্ঠহিং.

৩১২. ‘‘পদুমুত্তৰো লোকৱিদূ, আহুতীনং পটিগ্গহো;

অন্তোঘৰে নিসীদিত্ৱা, ইমা গাথা অভাসথ.

৩১৩. ‘‘‘যো মং তূৰিযেহুপট্ঠাসি, অন্নপানঞ্চদাসি মে;

তমহং কিত্তযিস্সামি, সুণাথ মম ভাসতো.

৩১৪. ‘‘‘পহূতভক্খো হুত্ৱান, সহিৰঞ্ঞো সভোজনো;

চতুদীপে একৰজ্জং, কাৰযিস্সতিযং নৰো.

৩১৫. ‘‘‘পঞ্চসীলে সমাদায, দসকম্মপথে ততো;

সমাদায পৱত্তেন্তো, পৰিসং সিক্খাপযিস্সতি.

৩১৬. ‘‘‘তূৰিযসতসহস্সানি, ভেৰিযো সমলঙ্কতা;

ৱজ্জযিস্সন্তিমং নিচ্চং, উপট্ঠানস্সিদং ফলং.

৩১৭. ‘‘‘তিংসকপ্পসহস্সানি, দেৱলোকে ৰমিস্সতি;

চতুসট্ঠিক্খত্তুং দেৱিন্দো, দেৱৰজ্জং কৰিস্সতি.

৩১৮. ‘‘‘চতুসট্ঠিক্খত্তুং ৰাজা, চক্কৱত্তী ভৱিস্সতি;

পদেসৰজ্জং ৱিপুলং, গণনাতো অসঙ্খিযং.

৩১৯. ‘‘‘কপ্পসতসহস্সম্হি, ওক্কাককুলসম্ভৱো;

গোতমো নাম গোত্তেন, সত্থা লোকে ভৱিস্সতি.

৩২০. ‘‘‘উপপজ্জতি যং যোনিং, দেৱত্তং অথ মানুসং;

অনূনভোগো হুত্ৱান, মনুস্সত্তং গমিস্সতি.

৩২১. ‘‘‘অজ্ঝাযকো ভৱিত্ৱান, তিণ্ণং ৱেদান পাৰগূ;

উত্তমত্থং গৱেসন্তো, চৰিস্সতি মহিং ইমং.

৩২২. ‘‘‘সো পচ্ছা পব্বজিত্ৱান, সুক্কমূলেন চোদিতো;

গোতমস্স ভগৱতো, সাসনেভিৰমিস্সতি.

৩২৩. ‘‘‘আৰাধযিত্ৱান সম্বুদ্ধং, গোতমং সক্যপুঙ্গৱং;

কিলেসে ঝাপযিত্ৱান, অৰহাযং ভৱিস্সতি’.

৩২৪. ‘‘ৱিপিনে ব্যগ্ঘৰাজাৱ, মিগৰাজাৱ কেসৰী;

অভীতো ৱিহৰামজ্জ, সক্যপুত্তস্স সাসনে.

৩২৫. ‘‘দেৱলোকে মনুস্সে ৱা, দলিদ্দে দুগ্গতিম্হি ৱা;

নিব্বত্তিং মে ন পস্সামি, উপট্ঠানস্সিদং ফলং.

৩২৬. ‘‘ৱিৱেকমনুযুত্তোম্হি, উপসন্তো নিৰূপধি;

নাগোৱ বন্ধনং ছেত্ৱা, ৱিহৰামি অনাসৱো.

৩২৭. ‘‘কিলেসা ঝাপিতা ময্হং…পে… ৱিহৰামি অনাসৱো.

৩২৮. ‘‘স্ৱাগতং ৱত মে আসি…পে… কতং বুদ্ধস্স সাসনং.

৩২৯. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা জতুকণ্ণিত্থেৰো ইমা গাথাযো অভাসিত্থাতি.

জতুকণ্ণিত্থেৰস্সাপদানং নৱমং.