১০. উদেনত্থেৰঅপদানং

৩৩০. ‘‘হিমৱন্তস্সাৱিদূৰে, পদুমো নাম পব্বতো;

অস্সমো সুকতো ময্হং, পণ্ণসালা সুমাপিতা.

৩৩১. ‘‘নদিযো সন্দৰে তত্থ, সুপতিত্থা মনোৰমা;

অচ্ছোদকা সীতজলা, সন্দৰে নদিযো সদা.

৩৩২. ‘‘পাঠীনা পাৱুসা মচ্ছা, বলজা মুঞ্জৰোহিতা;

সোভেন্তা নদিযো এতে, ৱসন্তি নদিযা সদা.

৩৩৩. ‘‘অম্বজম্বূহি সঞ্ছন্না, কৰেৰিতিলকা তথা;

উদ্দালকা পাটলিযো, সোভেন্তি মম অস্সমং.

৩৩৪. ‘‘অঙ্কোলকা বিম্বিজালা, মাযাকাৰী চ পুপ্ফিতা;

গন্ধেন উপৱাযন্তা, সোভেন্তি মম অস্সমং.

৩৩৫. ‘‘অতিমুত্তা সত্তলিকা, নাগা সালা চ পুপ্ফিতা;

দিব্বগন্ধং সম্পৱন্তা, সোভেন্তি মম অস্সমং.

৩৩৬. ‘‘কোসম্বা সড়লা নীপা, অট্ঠঙ্গাপি চ পুপ্ফিতা [অট্ঠঙ্গা চ সুপুপ্ফিতা (সী.), কট্ঠঙ্গা চ সুপুপ্ফিতা (পী.)];

দিব্বগন্ধং সম্পৱন্তা, সোভেন্তি মম অস্সমং.

৩৩৭. ‘‘হৰীতকা আমলকা, অম্বজম্বুৱিভীতকা;

কোলা ভল্লাতকা বিল্লা, ফলানি বহু অস্সমে.

৩৩৮. ‘‘কলম্বা কন্দলী তত্থ, পুপ্ফন্তি মম অস্সমে;

দিব্বগন্ধং [দিব্বগন্ধা (সী. স্যা. পী.) এৱং পৰত্থপি] সম্পৱন্তা, সোভেন্তি মম অস্সমং.

৩৩৯. ‘‘অসোকপিণ্ডিৱাৰী চ [অসোকপিণ্ডী চ ৱৰী (সী. স্যা.), অসোকপিণ্ডী চ ৱাৰী (পী.)], নিম্বৰুক্খা চ পুপ্ফিতা;

দিব্বগন্ধং সম্পৱন্তা, সোভেন্তি মম অস্সমং.

৩৪০. ‘‘পুন্নাগা গিৰিপুন্নাগা, তিমিৰা তত্থ পুপ্ফিতা;

দিব্বগন্ধং সম্পৱন্তা, সোভেন্তি মম অস্সমং.

৩৪১. ‘‘নিগ্গুণ্ডী সিৰিনিগ্গুণ্ডী, চম্পৰুক্খেত্থ পুপ্ফিতা;

দিব্বগন্ধং সম্পৱন্তা, সোভেন্তি মম অস্সমং.

৩৪২. ‘‘অৱিদূৰে পোক্খৰণী, চক্কৱাকূপকূজিতা;

মন্দালকেহি সঞ্ছন্না, পদুমুপ্পলকেহি চ.

৩৪৩. ‘‘অচ্ছোদকা সীতজলা, সুপতিত্থা মনোৰমা;

অচ্ছা ফলিকসমানা, সোভেন্তি মম অস্সমং.

৩৪৪. ‘‘পদুমা পুপ্ফৰে তত্থ, পুণ্ডৰীকা চ উপ্পলা;

মন্দালকেহি সঞ্ছন্না, সোভেন্তি মম অস্সমং.

৩৪৫. ‘‘পাঠীনা পাৱুসা মচ্ছা, বলজা মুঞ্জৰোহিতা;

ৱিচৰন্তাৱ তে তত্থ, সোভেন্তি মম অস্সমং.

৩৪৬. ‘‘কুম্ভীলা সুসুমাৰা চ, কচ্ছপা চ গহা বহূ;

ওগহা অজগৰা চ, সোভেন্তি মম অস্সমং.

৩৪৭. ‘‘পাৰেৱতা ৰৱিহংসা, চক্কৱাকা নদীচৰা;

দিন্দিভা সাড়িকা চেত্থ, সোভেন্তি মম অস্সমং.

৩৪৮. ‘‘নযিতা অম্বগন্ধী চ, কেতকা তত্থ পুপ্ফিতা;

দিব্বগন্ধং সম্পৱন্তা, সোভেন্তি মম অস্সমং.

৩৪৯. ‘‘সীহা ব্যগ্ঘা চ দীপী চ, অচ্ছকোকতৰচ্ছকা;

অনুসঞ্চৰন্তা পৱনে, সোভেন্তি মম অস্সমং.

৩৫০. ‘‘জটাভাৰেন ভৰিতা, অজিনুত্তৰৱাসনা;

অনুসঞ্চৰন্তা পৱনে, সোভেন্তি মম অস্সমং.

৩৫১. ‘‘অজিনানিধৰা এতে, নিপকা সন্তৱুত্তিনো;

অপ্পাহাৰাৱ তে সব্বে, সোভেন্তি মম অস্সমং.

৩৫২. ‘‘খাৰিভাৰং গহেত্ৱান, অজ্ঝোগয্হ ৱনং তদা;

মূলফলানি ভুঞ্জন্তা, ৱসন্তি অস্সমে তদা.

৩৫৩. ‘‘ন তে দাৰুং আহৰন্তি, উদকং পাদধোৱনং;

সব্বেসং আনুভাৱেন, সযমেৱাহৰীযতি.

৩৫৪. ‘‘চুল্লাসীতিসহস্সানি, ইসযেত্থ সমাগতা;

সব্বেৱ ঝাযিনো এতে, উত্তমত্থগৱেসকা.

৩৫৫. ‘‘তপস্সিনো ব্ৰহ্মচাৰী, চোদেন্তা অপ্পনাৱ তে;

অম্বৰাৱচৰা সব্বে, ৱসন্তি অস্সমে তদা.

৩৫৬. ‘‘পঞ্চাহং সন্নিপতন্তি, একগ্গা সন্তৱুত্তিনো;

অঞ্ঞোঞ্ঞং অভিৱাদেত্ৱা, পক্কমন্তি দিসামুখা.

৩৫৭. ‘‘পদুমুত্তৰো নাম জিনো, সব্বধম্মান পাৰগূ;

তমন্ধকাৰং ৱিধমং, উপ্পজ্জি তাৱদে জিনো.

৩৫৮. ‘‘মম অস্সমসামন্তা, যক্খো আসি মহিদ্ধিকো;

সো মে সংসিত্থ সম্বুদ্ধং, জলজুত্তমনাযকং.

৩৫৯. ‘‘এস বুদ্ধো সমুপ্পন্নো, পদুমুত্তৰো মহামুনি;

খিপ্পং গন্ত্ৱান সম্বুদ্ধং, পযিৰূপাস মাৰিস.

৩৬০. ‘‘যক্খস্স ৱচনং সুত্ৱা, ৱিপ্পসন্নেন চেতসা;

অস্সমং সংসামেত্ৱান, নিক্খমিং ৱিপিনা তদা.

৩৬১. ‘‘চেড়েৱ ডয্হমানম্হি, নিক্খমিত্ৱান অস্সমা;

একৰত্তিং নিৱাসেত্ৱা [নিৱসিত্ৱা (সী.), নিৱাসেন (?)], উপগচ্ছিং ৱিনাযকং.

৩৬২. ‘‘পদুমুত্তৰো লোকৱিদূ, আহুতীনং পটিগ্গহো;

চতুসচ্চং পকাসেন্তো, দেসেসি অমতং পদং.

৩৬৩. ‘‘সুফুল্লং পদুমং গয্হ, উপগন্ত্ৱা মহেসিনো;

পসন্নচিত্তো সুমনো, বুদ্ধস্স অভিৰোপযিং.

৩৬৪. ‘‘পূজযিত্ৱান সম্বুদ্ধং, জলজুত্তমনাযকং;

একংসং অজিনং কত্ৱা, সন্থৱিং লোকনাযকং.

৩৬৫. ‘‘যেন ঞাণেন সম্বুদ্ধো, ৱসতীহ অনাসৱো;

তং ঞাণং কিত্তযিস্সামি, সুণাথ মম ভাসতো.

৩৬৬. ‘‘‘সংসাৰসোতং ছিন্দিত্ৱা, তাৰেসি সব্বপাণিনং;

তৱ ধম্মং সুণিত্ৱান, তণ্হাসোতং তৰন্তি তে.

৩৬৭. ‘‘‘তুৱং সত্থা চ কেতু চ, ধজো যূপো চ পাণিনং;

পৰাযণো পতিট্ঠা চ, দীপো চ দ্ৱিপদুত্তম [দিপদুত্তম (সী. স্যা. পী.)].

৩৬৮. ‘‘‘যাৱতা গণিনো লোকে, সত্থৱাহা পৱুচ্চৰে;

তুৱং অগ্গোসি সব্বঞ্ঞু, তৱ অন্তোগধাৱ তে.

৩৬৯. ‘‘‘তৱ ঞাণেন সব্বঞ্ঞু, তাৰেসি জনতং বহুং;

তৱ দস্সনমাগম্ম, দুক্খস্সন্তং কৰিস্সৰে.

৩৭০. ‘‘‘যে কেচিমে গন্ধজাতা, লোকে ৱাযন্তি চক্খুম;

তৱ গন্ধসমো নত্থি, পুঞ্ঞক্খেত্তে মহামুনে’.

৩৭১. ‘‘‘তিৰচ্ছানযোনিং নিৰযং, পৰিমোচেসি [পৰিমোচেহি (স্যা. ক.)] চক্খুম;

অসঙ্খতং পদং সন্তং, দেসেসি [দেসেহি (স্যা. ক.)] ত্ৱং মহামুনে’.

৩৭২. ‘‘পদুমুত্তৰো লোকৱিদূ, আহুতীনং পটিগ্গহো;

ভিক্খুসঙ্ঘে নিসীদিত্ৱা, ইমা গাথা অভাসথ.

৩৭৩. ‘‘‘যো মে ঞাণং অপূজেসি, পসন্নো সেহি পাণিভি;

তমহং কিত্তযিস্সামি, সুণাথ মম ভাসতো.

৩৭৪. ‘‘‘তিংসকপ্পসহস্সানি, দেৱলোকে ৰমিস্সতি;

সহস্সক্খত্তুং ৰাজা চ, চক্কৱত্তী ভৱিস্সতি’.

৩৭৫. ‘‘সুলদ্ধলাভং লদ্ধোম্হি, তোসযিত্ৱান সুব্বতং;

সব্বাসৱে পৰিঞ্ঞায, ৱিহৰামি অনাসৱো.

৩৭৬. ‘‘কিলেসা ঝাপিতা ময্হং…পে… ৱিহৰামি অনাসৱো.

৩৭৭. ‘‘স্ৱাগতং ৱত মে আসি…পে… কতং বুদ্ধস্স সাসনং.

৩৭৮. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা উদেনো থেৰো ইমা গাথাযো অভাসিত্থাতি.

উদেনত্থেৰস্সাপদানং দসমং.

মেত্তেয্যৱগ্গো একচত্তালীসমো.