৮. তোদেয্যত্থেৰঅপদানং

২২৪. ‘‘ৰাজা অজিতঞ্জযো [ৰাজাসি ৱিজযো (সী. অট্ঠ.), ৰাজা ৱিজিতজযো (স্যা.)] নাম, কেতুমতীপুৰুত্তমে;

সূৰো ৱিক্কমসম্পন্নো, পুৰমজ্ঝাৱসী তদা.

২২৫. ‘‘তস্স ৰঞ্ঞো পমত্তস্স, অটৱিযো সমুট্ঠহুং;

ওতাৰা [উত্তৰা (স্যা.), ওচৰা (পী.)] তুণ্ডিকা চেৱ, ৰট্ঠং ৱিদ্ধংসযুং তদা.

২২৬. ‘‘পচ্চন্তে কুপিতে খিপ্পং, সন্নিপাতেসিৰিন্দমো;

ভটে চেৱ বলত্থে চ, অৰিং নিগ্গাহযি তদা.

২২৭. ‘‘হত্থাৰোহা অনীকট্ঠা, সূৰা চ চম্মযোধিনো;

ধনুগ্গহা চ উগ্গা চ, সব্বে সন্নিপতুং তদা.

২২৮. ‘‘আড়াৰিকা চ কপ্পকা, ন্হাপকা মালকাৰকা;

সূৰা ৱিজিতসঙ্গামা, সব্বে সন্নিপতুং তদা.

২২৯. ‘‘খগ্গহত্থা চ পুৰিসা, চাপহত্থা চ ৱম্মিনো;

লুদ্দা ৱিজিতসঙ্গামা, সব্বে সন্নিপতুং তদা.

২৩০. ‘‘তিধাপভিন্না মাতঙ্গা, কুঞ্জৰা সট্ঠিহাযনা;

সুৱণ্ণকচ্ছালঙ্কাৰা, সব্বে সন্নিপতুং তদা.

২৩১. ‘‘খমা সীতস্স উণ্হস্স, উক্কাৰুহৰণস্স চ;

যোধাজীৱা কতকম্মা, সব্বে সন্নিপতুং তদা.

২৩২. ‘‘সঙ্খসদ্দং ভেৰিসদ্দং, অথো উতুজ [উদ্ধৱ (সী.), উদ্দট (স্যা.)] সদ্দকং;

এতেহি তে হাসযন্তা, সব্বে সন্নিপতুং তদা.

২৩৩. ‘‘তিসূলকোন্তিমন্তেহি [তিসূলকোন্তমন্তেহি (সী.), কৱচেহি তোমৰেহি (সী.), ধনূহি তোমৰেহি (স্যা.)] চ;

কোট্টেন্তানং নিপাতেন্তা [কোট্টযন্তা নিৱত্তেন্তা (স্যা.)], সব্বে সন্নিপতুং তদা.

২৩৪. ‘‘কিমেৱাতিনিসামেত্ৱা [কৱচানিৱাসেত্ৱা (স্যা.)], সৰাজা অজিতঞ্জযো [অজিনং জিনো (সী.), অজিতঞ্জিনো (স্যা.)];

সট্ঠি পাণসহস্সানি, সূলে উত্তাসযিং তদা.

২৩৫. ‘‘সদ্দং মানুসকাকংসু, অহো ৰাজা অধম্মিকো;

নিৰযে পচ্চমানস্স, কদা অন্তো ভৱিস্সতি.

২৩৬. ‘‘সযনেহং তুৱট্টেন্তো, পস্সামি নিৰযে তদা;

ন সুপামি দিৱাৰত্তিং, সূলেন তজ্জযন্তি মং.

২৩৭. ‘‘কিং পমাদেন ৰজ্জেন, ৱাহনেন বলেন চ;

ন তে পহোন্তি ধাৰেতুং, তাপযন্তি [তাসযন্তি (সী. স্যা.)] মমং সদা.

২৩৮. ‘‘কিং মে পুত্তেহি দাৰেহি, ৰজ্জেন সকলেন চ;

যংনূন পব্বজেয্যাহং, গতিমগ্গং ৱিসোধযে.

২৩৯. ‘‘সট্ঠি নাগসহস্সানি, সব্বালঙ্কাৰভূসিতে;

সুৱণ্ণকচ্ছে মাতঙ্গে, হেমকপ্পনৱাসসে.

২৪০. ‘‘আৰূড়্হে গামণীযেহি, তোমৰঙ্কুসপাণিভি;

সঙ্গামাৱচৰে ঠানে, অনপেক্খো ৱিহাযহং;

সককম্মেন সন্তত্তো, নিক্খমিং অনগাৰিযং.

২৪১. ‘‘সট্ঠি অস্সসহস্সানি, সব্বালঙ্কাৰভূসিতে;

আজানীযেৱ জাতিযা, সিন্ধৱে সীঘৱাহনে.

২৪২. ‘‘আৰূড়্হে গামণীযেহি, চাপহত্থেহি ৱম্মিভি;

পহাৰেত্ৱান [পহাযিত্ৱান (সী. পী.), ছড্ডযিত্ৱান (স্যা.)] তে সব্বে, নিক্খমিং অনগাৰিযং.

২৪৩. ‘‘সট্ঠি ৰথসহস্সানি, সব্বালঙ্কাৰভূসিতে;

দীপে অথোপি ৱেযগ্ঘে, সন্নদ্ধে উস্সিতদ্ধজে;

তে সব্বে পৰিহাৰেত্ৱা [পৰিৱজ্জেত্ৱা (স্যা.), পৰিহাযিত্ৱা (পী.)], পব্বজিং অনগাৰিযং.

২৪৪. ‘‘সট্ঠি ধেনুসহস্সানি, সব্বা কংসূপধাৰণা;

তাযোপি [গাৱিযো (স্যা.), ধেনুযো (ক.)] ছড্ডযিত্ৱান, পব্বজিং অনগাৰিযং.

২৪৫. ‘‘সট্ঠি ইত্থিসহস্সানি, সব্বালঙ্কাৰভূসিতা;

ৱিচিত্তৱত্থাভৰণা, আমুক্কমণিকুণ্ডলা.

২৪৬. ‘‘অড়াৰপম্হা হসুলা, সুসঞ্ঞা তনুমজ্ঝিমা;

তা হিত্ৱা কন্দমানাযো, পব্বজিং অনগাৰিযং.

২৪৭. ‘‘সট্ঠি গামসহস্সানি, পৰিপুণ্ণানি সব্বসো;

ছড্ডযিত্ৱান তং ৰজ্জং, পব্বজিং অনগাৰিযং.

২৪৮. ‘‘নগৰা নিক্খমিত্ৱান, হিমৱন্তমুপাগমিং;

ভাগীৰথীনদীতীৰে, অস্সমং মাপযিং অহং.

২৪৯. ‘‘পণ্ণসালং কৰিত্ৱান, অগ্যাগাৰং অকাসহং;

আৰদ্ধৱীৰিযো পহিতত্তো, ৱসামি অস্সমে অহং.

২৫০. ‘‘মণ্ডপে ৰুক্খমূলে ৱা, সুঞ্ঞাগাৰে চ ঝাযতো;

ন তু ৱিজ্জতি তাসো মে, ন পস্সে ভযভেৰৱং.

২৫১. ‘‘সুমেধো নাম সম্বুদ্ধো, অগ্গো কাৰুণিকো মুনি;

ঞাণালোকেন জোতন্তো, লোকে উপ্পজ্জি তাৱদে.

২৫২. ‘‘মম অস্সমসামন্তা, যক্খো আসি মহিদ্ধিকো;

বুদ্ধসেট্ঠম্হি উপ্পন্নে, আৰোচেসি মমং তদা.

২৫৩. ‘‘বুদ্ধো লোকে সমুপ্পন্নো, সুমেধো নাম চক্খুমা;

তাৰেতি জনতং সব্বং, তম্পি সো তাৰযিস্সতি.

২৫৪. ‘‘যক্খস্স ৱচনং সুত্ৱা, সংৱিগ্গো আসি তাৱদে;

বুদ্ধো বুদ্ধোতি চিন্তেন্তো, অস্সমং পটিসামযিং.

২৫৫. ‘‘অগ্গিদাৰুঞ্চ ছড্ডেত্ৱা, সংসামেত্ৱান সন্থতং;

অস্সমং অভিৱন্দিত্ৱা, নিক্খমিং ৱিপিনা অহং.

২৫৬. ‘‘ততো চন্দনমাদায, গামা গামং পুৰা পুৰং;

দেৱদেৱং গৱেসন্তো, উপগচ্ছিং ৱিনাযকং.

২৫৭. ‘‘ভগৱা তম্হি সমযে, সুমেধো লোকনাযকো;

চতুসচ্চং পকাসেন্তো, বোধেতি জনতং বহুং.

২৫৮. ‘‘অঞ্জলিং পগ্গহেত্ৱান, সীসে কত্ৱান চন্দনং;

সম্বুদ্ধং অভিৱাদেত্ৱা, ইমা গাথা অভাসহং.

২৫৯. ‘‘‘ৱস্সিকে পুপ্ফমানম্হি, সন্তিকে উপৱাযতি;

ত্ৱং ৱীৰ গুণগন্ধেন, দিসা সব্বা পৱাযসি.

২৬০. ‘‘‘চম্পকে নাগৱনিকে, অতিমুত্তককেতকে;

সালেসু পুপ্ফমানেসু, অনুৱাতং পৱাযতি.

২৬১. ‘‘‘তৱ গন্ধং সুণিত্ৱান, হিমৱন্তা ইধাগমিং;

পূজেমি তং মহাৱীৰ, লোকজেট্ঠ মহাযস’.

২৬২. ‘‘ৱৰচন্দনেনানুলিম্পিং, সুমেধং লোকনাযকং;

সকং চিত্তং পসাদেত্ৱা, তুণ্হী অট্ঠাসি তাৱদে.

২৬৩. ‘‘সুমেধো নাম ভগৱা, লোকজেট্ঠো নৰাসভো;

ভিক্খুসঙ্ঘে নিসীদিত্ৱা, ইমা গাথা অভাসথ.

২৬৪. ‘‘‘যো মে গুণে পকিত্তেসি, চন্দনঞ্চ অপূজযি;

তমহং কিত্তযিস্সামি, সুণাথ মম ভাসতো.

২৬৫. ‘‘‘আদেয্যৱাক্যৱচনো, ব্ৰহ্মা উজু পতাপৱা;

পঞ্চৱীসতিকপ্পানি, সপ্পভাসো ভৱিস্সতি.

২৬৬. ‘‘‘ছব্বীসতিকপ্পসতে, দেৱলোকে ৰমিস্সতি;

সহস্সক্খত্তুং ৰাজা চ, চক্কৱত্তী ভৱিস্সতি.

২৬৭. ‘‘‘তেত্তিংসক্খত্তুং দেৱিন্দো, দেৱৰজ্জং কৰিস্সতি;

পদেসৰজ্জং ৱিপুলং, গণনাতো অসঙ্খিযং.

২৬৮. ‘‘‘ততো চুতোযং মনুজো, মনুস্সত্তং গমিস্সতি;

পুঞ্ঞকম্মেন সংযুত্তো, ব্ৰহ্মবন্ধু ভৱিস্সতি.

২৬৯. ‘‘‘অজ্ঝাযকো মন্তধৰো, তিণ্ণং ৱেদান পাৰগূ;

তিলক্খণেন সম্পন্নো, বাৱৰী নাম ব্ৰাহ্মণো.

২৭০. ‘‘‘তস্স সিস্সো ভৱিত্ৱান, হেস্সতি মন্তপাৰগূ;

উপগন্ত্ৱান সম্বুদ্ধং, গোতমং সক্যপুঙ্গৱং.

২৭১. ‘‘‘পুচ্ছিত্ৱা নিপুণে পঞ্হে, ভাৱযিত্ৱান অঞ্জসং [হাসযিত্ৱান মানসং (স্যা.), ভাৱযিত্ৱান সঞ্চযং (ক.)];

সব্বাসৱে পৰিঞ্ঞায, ৱিহৰিস্সতিনাসৱো’.

২৭২. ‘‘তিৱিধগ্গি নিব্বুতা ময্হং, ভৱা সব্বে সমূহতা;

সব্বাসৱে পৰিঞ্ঞায, ৱিহৰামি অনাসৱো.

২৭৩. ‘‘কিলেসা ঝাপিতা ময্হং…পে… ৱিহৰামি অনাসৱো.

২৭৪. ‘‘স্ৱাগতং ৱত মে আসি…পে… কতং বুদ্ধস্স সাসনং.

২৭৫. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা তোদেয্যো থেৰো ইমা গাথাযো অভাসিত্থাতি.

তোদেয্যত্থেৰস্সাপদানং অট্ঠমং.