৭. হেমকত্থেৰঅপদানং

১৮৩. ‘‘পব্ভাৰকূটং নিস্সায, অনোমো নাম তাপসো;

অস্সমং সুকতং কত্ৱা, পণ্ণসালে ৱসী তদা.

১৮৪. ‘‘সিদ্ধং তস্স তপো কম্মং, সিদ্ধিপত্তো সকে বলে;

সকসামঞ্ঞৱিক্কন্তো, আতাপী নিপকো মুনি.

১৮৫. ‘‘ৱিসাৰদো সসমযে, পৰৱাদে চ কোৱিদো;

পট্ঠো ভূমন্তলিক্খম্হি, উপ্পাতম্হি চ কোৱিদো.

১৮৬. ‘‘ৱীতসোকো নিৰাৰম্ভো, অপ্পাহাৰো অলোলুপো;

লাভালাভেন সন্তুট্ঠো, ঝাযী ঝানৰতো মুনি.

১৮৭. ‘‘পিযদস্সী নাম সম্বুদ্ধো, অগ্গো কাৰুণিকো মুনি;

সত্তে তাৰেতুকামো সো, কৰুণায ফৰী তদা.

১৮৮. ‘‘বোধনেয্যং জনং দিস্ৱা, পিযদস্সী মহামুনি;

চক্কৱাড়সহস্সম্পি, গন্ত্ৱা ওৱদতে মুনি.

১৮৯. ‘‘মমুদ্ধৰিতুকামো সো, মমস্সমমুপাগমি;

ন দিট্ঠো মে জিনো পুব্বে, ন সুতোপি চ কস্সচি.

১৯০. ‘‘উপ্পাতা সুপিনা ময্হং, লক্খণা সুপ্পকাসিতা;

পট্ঠো ভূমন্তলিক্খম্হি, নক্খত্তপদকোৱিদো.

১৯১. ‘‘সোহং বুদ্ধস্স সুত্ৱান, তত্থ চিত্তং পসাদযিং;

তিট্ঠন্তো [ভুঞ্জন্তো (সী. পী. ক.)] ৱা নিসিন্নো ৱা, সৰামি নিচ্চকালিকং.

১৯২. ‘‘মযি এৱং সৰন্তম্হি, ভগৱাপি অনুস্সৰি;

বুদ্ধং অনুস্সৰন্তস্স, পীতি মে হোতি তাৱদে.

১৯৩. ‘‘কালঞ্চ পুনৰাগম্ম, উপেসি মং মহামুনি;

সম্পত্তেপি ন জানামি, অযং বুদ্ধো মহামুনি.

১৯৪. ‘‘অনুকম্পকো কাৰুণিকো, পিযদস্সী মহামুনি;

সঞ্জানাপেসি অত্তানং, ‘অহং বুদ্ধো সদেৱকে’.

১৯৫. ‘‘সঞ্জানিত্ৱান সম্বুদ্ধং, পিযদস্সিং মহামুনিং;

সকং চিত্তং পসাদেত্ৱা, ইদং ৱচনমব্ৰৱিং.

১৯৬. ‘‘‘অঞ্ঞে [সব্বে (স্যা.)] পীঠে চ পল্লঙ্কে, আসন্দীসু নিসীদৰে;

তুৱম্পি সব্বদস্সাৱী, নিসীদ ৰতনাসনে’.

১৯৭. ‘‘সব্বৰতনমযং পীঠং, নিম্মিনিত্ৱান তাৱদে;

পিযদস্সিস্স মুনিনো, অদাসিং ইদ্ধিনিম্মিতং.

১৯৮. ‘‘ৰতনে চ নিসিন্নস্স, পীঠকে ইদ্ধিনিম্মিতে;

কুম্ভমত্তং জম্বুফলং, অদাসিং তাৱদে অহং.

১৯৯. ‘‘মম হাসং জনেত্ৱান, পৰিভুঞ্জি মহামুনি;

তদা চিত্তং পসাদেত্ৱা, সত্থাৰং অভিৱাদযিং.

২০০. ‘‘পিযদস্সী তু ভগৱা, লোকজেট্ঠো নৰাসভো;

ৰতনাসনমাসীনো, ইমা গাথা অভাসথ.

২০১. ‘‘‘যো মে ৰতনমযং পীঠং, অমতঞ্চ ফলং অদা;

তমহং কিত্তযিস্সামি, সুণাথ মম ভাসতো.

২০২. ‘‘‘সত্তসত্ততি কপ্পানি, দেৱলোকে ৰমিস্সতি;

পঞ্চসত্ততিক্খত্তুঞ্চ, চক্কৱত্তী ভৱিস্সতি.

২০৩. ‘‘‘দ্ৱত্তিংসক্খত্তুং দেৱিন্দো, দেৱৰজ্জং কৰিস্সতি;

পদেসৰজ্জং ৱিপুলং, গণনাতো অসঙ্খিযং.

২০৪. ‘‘‘সোণ্ণমযং ৰূপিমযং, পল্লঙ্কং সুকতং বহুং;

লোহিতঙ্গমযঞ্চেৱ, লচ্ছতি ৰতনামযং.

২০৫. ‘‘‘চঙ্কমন্তম্পি মনুজং, পুঞ্ঞকম্মসমঙ্গিনং;

পল্লঙ্কানি অনেকানি, পৰিৱাৰেস্সৰে তদা.

২০৬. ‘‘‘কূটাগাৰা চ পাসাদা, সযনঞ্চ মহাৰহং;

ইমস্স চিত্তমঞ্ঞায, নিব্বত্তিস্সন্তি তাৱদে.

২০৭. ‘‘‘সট্ঠি নাগসহস্সানি, সব্বালঙ্কাৰভূসিতা;

সুৱণ্ণকচ্ছা মাতঙ্গা, হেমকপ্পনৱাসসা [হেমকপ্পনিৱাসনা (সী. স্যা.), হেমকপ্পনিৱাসসা (ক.)].

২০৮. ‘‘‘আৰূড়্হা গামণীযেহি, তোমৰঙ্কুসপাণিভি;

ইমং পৰিচৰিস্সন্তি, ৰত্নপীঠস্সিদং ফলং.

২০৯. ‘‘‘সট্ঠি অস্সসহস্সানি, সব্বালঙ্কাৰভূসিতা;

আজানীযাৱ জাতিযা, সিন্ধৱা সীঘৱাহিনো.

২১০. ‘‘‘আৰূড়্হা গামণীযেহি, ইল্লিযাচাপধাৰিভি;

তেপিমং পৰিচৰিস্সন্তি, ৰত্নপীঠস্সিদং ফলং.

২১১. ‘‘‘সট্ঠি ৰথসহস্সানি, সব্বালঙ্কাৰভূসিতা;

দীপা অথোপি ৱেযগ্ঘা, সন্নদ্ধা উস্সিতদ্ধজা.

২১২. ‘‘‘আৰূড়্হা গামণীযেহি, চাপহত্থেহি ৱম্মিভি;

পৰিৱাৰেস্সন্তিমং নিচ্চং, ৰত্নপীঠস্সিদং ফলং.

২১৩. ‘‘‘সট্ঠি ধেনুসহস্সানি, দোহঞ্ঞা পুঙ্গৱূসভে;

ৱচ্ছকে জনযিস্সন্তি, ৰত্নপীঠস্সিদং ফলং.

২১৪. ‘‘‘সোড়সিত্থিসহস্সানি, সব্বালঙ্কাৰভূসিতা;

ৱিচিত্তৱত্থাভৰণা, আমুক্কমণিকুণ্ডলা.

২১৫. ‘‘‘অড়াৰপম্হা হসুলা, সুসঞ্ঞা তনুমজ্ঝিমা;

পৰিৱাৰেস্সন্তিমং নিচ্চং, ৰত্নপীঠস্সিদং ফলং.

২১৬. ‘‘‘অট্ঠাৰসে কপ্পসতে, গোতমো নাম চক্খুমা;

তমন্ধকাৰং ৱিধমিত্ৱা, বুদ্ধো লোকে ভৱিস্সতি.

২১৭. ‘‘‘তস্স দস্সনমাগম্ম, পব্বজিস্সতিকিঞ্চনো;

তোসযিত্ৱান সত্থাৰং, সাসনেভিৰমিস্সতি.

২১৮. ‘‘‘তস্স ধম্মং সুণিত্ৱান, কিলেসে ঘাতযিস্সতি;

সব্বাসৱে পৰিঞ্ঞায, নিব্বাযিস্সতিনাসৱো’.

২১৯. ‘‘ৱীৰিযং মে ধুৰধোৰয্হং, যোগক্খেমাধিৱাহনং;

উত্তমত্থং পত্থযন্তো, সাসনে ৱিহৰামহং.

২২০. ‘‘ইদং পচ্ছিমকং ময্হং, চৰিমো ৱত্ততে ভৱো;

সব্বাসৱা পৰিক্খীণা, নত্থি দানি পুনব্ভৱো.

২২১. ‘‘কিলেসা ঝাপিতা ময্হং…পে… ৱিহৰামি অনাসৱো.

২২২. ‘‘স্ৱাগতং ৱত মে আসি…পে… কতং বুদ্ধস্স সাসনং.

২২৩. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা হেমকো থেৰো ইমা গাথাযো অভাসিত্থাতি;

হেমকত্থেৰস্সাপদানং সত্তমং.

সত্তৰসমং ভাণৱাৰং.